ជាគ្រូពេទ្យកំពុងប្រកបវិជ្ជាជីវៈ ត្រូវមានជំនាញមាំទាំ និងទាន់សម័យកាល នៃការវិវត្តវិទ្យាសាស្រ្តវិជ្ជាសាស្រ្ត បច្ចេកទេសសម្ភារៈ ជាពិសេសភាពប្រែប្រួលនៃជំងឺ និងវិធីសាស្រ្តនៃការព្យាបាលថ្មីៗ ពេលគ្រូពេទ្យមានជំនាញគ្រប់គ្រាន់ត្រូវបំពេញការងារប្រកបដោយសីលធម៏បវិជ្ជាជីវៈដើម្បីព្យាបាលអ្នកជំងឺឲ្យកាន់តែមានប្រសិទ្ធិភាព ។ ជាមួយគ្នានោះគ្រូពេទ្យមិនមែនបង្កើតឡើងសម្រាប់ឲ្យអ្នកប្រកបរបរនេះធ្វើជាអ្នកមាននោះទេ ពោលវិជ្ជាជីវៈជាគ្រូពេទ្យនេះ ជាវិជ្ជាជីវៈបែបករណីកិច្ច។
ឯកឧត្ដម ធា គ្រុយ រដ្ឋលេខាធិការនៃក្រសួងសុខាភិបាល និងជាប្រធានក្រុមប្រឹក្សាគណៈគ្រូពេទ្យជាតិកម្ពុជា បានថ្លែងបែបនេះនៅក្នុងសន្នីសិទប្រចាំឆ្នាំលើកទី៧ របស់មន្ទីរពេទ្យកុមារអង្គរខេត្ដសៀមរាប ក្រោមប្រធានបទ ”បច្ចុប្បន្នភាពជំងឺកុមារ៤” ដែលធ្វើឡើងនៅសាលសន្និសីទសុខា ខេត្ដសៀមរាប ព្រឹកថ្ងៃទី២៨ ខែតុលា ឆ្នាំ២០២៣នេះ រួមនឹងវត្តមានក្រុមគ្រូពេទ្យជាច្រើនរូបចូលរួម។
ព័ត៌មានជាតិ ថ្មីៗ
ឯកឧត្ដម ធា គ្រុយ បន្ថែមថាការរៀបចំសន្និសីទថ្ងៃនេះ បានផ្តល់ការចែករំលែកនូវបទពិសោធន៍ និងចំណេះដឹង ដល់សិក្ខាកាម ដើម្បីយកទៅអនុវត្ត និង ចែករំលែកបន្ត ក្នុងការពង្រឹង ការបង្កើនគុណភាពព្យាបាលជំងឺនៅតាមមន្ទីរពេទ្យ និងមូលដ្ឋាន ផ្តល់សេវាសុខាភិបាលនានានៅក្នុងប្រទេសកម្ពុជា អនុវត្តតាមកម្រិតជំនាញប្រកបដោយប្រសិទ្ធិភាព និងមានវិជ្ជាជីវៈច្បាស់លាស់ ពិសេសចូលរួមកាត់បន្ថយអត្រាមរណៈភាពទារកនិងកុមារឱ្យនៅកម្រិតទាបស្របតាមផែនការយុទ្ធសាស្ត្រជាតិរបស់ក្រសួងសុខាភិបាលកម្ពុជា។
ឯកឧត្តមវេជ្ជបណ្ឌិត ក្រុស សារ៉ាត់ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្ដសៀមរាប បានលើឡើងថាមន្ទីរពេទ្យកុមារអង្គរ បានផ្ដល់ការពិនិត្យព្យាបាល និងថែទាំសុខភាពដល់កុមារក្រីក្រកម្ពុជាប្រកបដោយគុណភាពខ្ពស់ និងឥតគិតកម្រៃ ចូលរួមពង្រឹងប្រព័ន្ធសុខាភិបាលតាមរយៈការបណ្ដុះបណ្តាលវេជ្ជបណ្ឌិតគិលានុបដ្ឋាក និងបុគ្គលិកសុខាភិបាល ព្រមទាំងផ្តល់ការអប់រំសុខភាព និងវិធានការការពារជំងឺដង្កាត់ផ្សេងៗដល់ប្រជាពលរដ្ឋនៅក្នុងសហគមន៍ ខេត្តសៀមរាប ដែលនេះពិតជាបានចូលរួមចំណែកយ៉ាងច្រើនជាមួយរាជរដ្ឋាភិបាលកម្ពុជា ជាពិសេសអាជ្ញាធរខេត្តសៀមរាបលើវិស័យសុខាភិបាល ។
លោកវជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរ ខេត្តសៀមរាប បានឲ្យដឹងថាសន្និសីទនេះ នឹងបែងចែកជាបីផ្នែកសំខាន់ៗដែលក្នុងនោះ៖
ផ្នែកទី១ យើងផ្ដោតទៅលើសេរី ករណីនៃការចម្លងរោគតាមឈាមធ្ងន់ធ្ងរ ផលវិបាកលើស្បែកនិងសាច់ដុំដែលបង្កឡើងដោយសារពាង្គកាយមិនប្រក្រតីទាក់ទងនឹងពស់ចឹក គ្រុនឈាមដែលមានជំងឺរលាកខ្នែងពោះវៀន និងកូវីដ១៩។
ផ្នែកទី២ បង្ហាញអំពីជំនួយអាហារូបត្ថម្ភដោយការចាក់បញ្ចូលតាមពោះ និង ការតាមដានជំងឺទារកមិនគ្រប់ខែធ្ងន់ធ្ងរ និងតួនាទីរបស់ជាតិដែកក្នុងការគ្រប់គ្រងភាពស៊ាំរបស់កុមារ និងសមាមាត្រជាតិដែក/វីតាមីន C ដែលល្អបំផុត សម្រាប់ការបង្កើនការស្រូបយកជាតិដែក ។
ផ្នែកទី៣ បង្ហាញអំពីលទ្ធផលនៃអ្នកជំងឺដែលត្រូវការឧបករណ៍ជំនួយការដក ដង្ហើមនៅក្នុងផ្នែកសង្គ្រោះបន្ទាន់ និងជំងឺធ្ងន់នៃមន្ទីរពេទ្យកុមារអង្គរ និងការសិក្សាស្រាវជ្រាវអំពីការ គ្រប់គ្រងជំងឺហឺតកុមារនៅក្នុងគ្លីនិកផ្លូវដង្ហើមដែលទើបបង្កើតថ្មីនៅមន្ទីរពេទ្យកុមារអង្គរ។
អត្ថបទ និងរូបភាព៖ លោក ធន់ ពូថេ
