វិញ្ញាបនបត្រសម្គាល់ម្ចាស់អចលនវត្ថុចំនួន ៦.៤៣១ប័ណ្ណ នៃចំនួនក្បាលដីសរុប ៧.៩៨៧ក្បាលដី ឋិតក្នុងភូមិចំនួន៧ នៃឃុំខ្ចាស់ ស្រុកសូទ្រនិគម ខេត្តសៀមរាប ត្រូវបានប្រគល់ជូនបងប្អូនប្រជាពលរដ្ឋដែលជាម្ចាស់ដី ដើម្បីយកទៅប្រើប្រាស់ជាផ្លូវការ នៅព្រឹកថ្ងៃទី៣០ ខែតុលា ឆ្នាំ២០២៣នេះ។
មានប្រសាសន៍ក្នុងឱកាសនោះ លោក ពិន ប្រាកដ អភិបាលរងខេត្តសៀមរាប បានបញ្ជាក់ថា ការចែកវិញ្ញាបនបត្រសម្គាល់ម្ចាស់អចលនវត្ថុជូនបងប្អូនប្រជាពលរដ្ឋនាពេលនេះ មានគោលបំណងលើកស្ទួយជីវភាពរបស់បងប្អូន កាត់បន្ថយនូវទំនាស់ដីធ្លីតាមរយៈការចុះបញ្ជីដីធ្លីមានលក្ខណៈជាប្រព័ន្ធ ស្របតាមគោលនយោបាយជាតិ ស្តីពីដីធ្លី និងច្បាប់ភូមិបាលកម្ពុជា។ ជាមួយគ្នានោះវិស័យដីធ្លីរដ្ឋបាលខេត្តសៀមរាប ដែលមានមន្ទីររៀបចំដែនដី នគរូបនីយកម្ម សំណង់ និងសុរិយោដី ជាសេនាធិកា ក្នុងការរៀបចំបង្កើតឲ្យមានក្រុមការងារចុះបញ្ជីដីធ្លីតាមបណ្តាស្រុក-ក្រុង ចំនួន ៦ក្រុង-ស្រុក លើក្រុង-ស្រុក ទាំង១២ នៅទូរទាំងខេត្តសៀមរាប។ កន្លងមកទោះបីជាមានឧបសគ្គ និងបញ្ហាស្មុគស្មាញមួយចំនួនក៏ដោយ ក៏អាជ្ញាធរមូលដ្ឋានគ្រប់លំដាប់ថ្នាក់បានធ្វើការដោះស្រាយបញ្ហាប្រឈមជូនបងប្អូនប្រជាពលរដ្ឋរហូតទទួលបានលទ្ធផលល្អប្រសើ។
លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានឲ្យដឹងថា វិញ្ញាបនបត្រសម្គាល់ម្ចាស់អចលនវត្ថុ ដែលបានប្រគល់ជុនប្អូនប្រជាពលរដ្ឋក្នុងឃុំខ្ចាស់ ស្រុសូទ្រនិគម មានចំនួន ៦.៤៣១ប័ណ្ណ នៃចំនួនក្បាលដីសរុប ៧.៩៨៧ក្បាលដី ក្នុងចំណោមភូមិចំនួន៧ មាន៖ ភូមិថ្មី ភូមិគោកសង្កែ ភូមិខ្ទាស់ ភូមិថ្លាត ភូមិក្បូន ភូមិជ្រៃ និងភូមិយាងទេស។ ចំពោះក្បាលដីមួយចំនួនទៀត ដែលនៅមិនទាន់អាចចេញប័ណ្ណជូនបាន គឺដោយសារក្បាលដីទាំងនោះមានការពាក់ព័ន្ធនឹងក្បាលដីគ្មានទិន្នន័យ ក្បាលដីជាប់ពាក់ព័ន្ធបណ្តឹងទប់ស្កាត់ ការបណ្តឹងជំទាស់តវ៉ាពាក់ព័ន្ធនឹងផ្លូវ អូរ ប្រឡាយ និងក្បាលដីមួយចំនួនទៀត មានជាប់បុរាណដ្ឋាន។ ចំពោះក្បាលដីដែលជាប់ពាក់ព័ន្ធនឹងបណ្ដឹងទំនាស់តវ៉ា គណៈកម្មការរដ្ឋបាលខេត្តនឹងបន្តសម្របសម្រួល ដោះស្រាយជាបន្តបន្ទាប់ជាមួយម្ចាស់បណ្តឹងទាំងអស់នោះ ហើយក្បាលដីដែលពាក់ព័ន្ធនឹងបុរាណដ្ឋាន រដ្ឋបាលខេត្តនឹងបន្តសហការជាមួយអាជ្ញាធរជាតិអប្សរា មន្ទីរ-អង្គភាពពាក់ព័ន្ធ ដើម្បីពិនិត្យ និងដោះស្រាយ ស្របតាមនីតិវិធី និងច្បាប់ជាធរមាន។
បើតាម លោក វិញ ប៉ូរ៉ា អនុប្រធានការិយាល័យ នៃសាខាពន្ធដារខេត្តសៀមរាប បានធ្វើការផ្សព្វផ្សាយអំពីកាតព្វកិច្ចពន្ធលើវិស័យអចលនទ្រព្យ ជូនដល់បងប្អូនប្រជាពលរដ្ឋដែលបានមកទទួលវិញ្ញាបនប័ត្រសម្គាល់អចលវត្ថុ និងបានអំពាវនាវអោយប្រជាពលរដ្ឋ សូមអញ្ជើញទៅប្រកាស និងបង់ពន្ធតាមពេលវេលាកំណត់ ដែលជាការចូលរួមលើកកម្ពស់វប្បធ៌មនៃការបង់ពន្ធ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
