សិក្ខាកាមមកពីគ្រួសារខ្វះខាតនៅខេត្ដសៀមរាប ចំនួន៥៩នាក់ បានបញ្ចប់ការបណ្ដុះបណ្ដាលផ្នែកវិស័យទេសចរណ៍ពីអង្គការស្លាបព្រាកម្ពុជា ដែលការបណ្តុះបណ្ដាលនេះមានរយៈពេល ១ឆ្នាំ និងបានរៀបចំពិធីប្រគល់វិញ្ញាបនបត្របញ្ជាក់ការសិក្សា នាព្រឹកថ្ងៃទី៣០ ខែតុលា ឆ្នាំ២០២៣នេះ។
លោកស្រី ម៉ៅ សុផានី នាយិកា នៃអង្គការស្លាបព្រាកម្ពុជា បានបញ្ជាក់ថា អង្គការបានខិតខំយ៉ាងសកម្មក្នុងការផ្តល់ឲ្យយុវជនដែលខ្វះលទ្ធភាព នៅក្នុងប្រទេសកម្ពុជា ដើម្បីឲ្យពួកគាត់អាចពឹងពាក់ខ្លួនឯងបាន តាមរយះការផ្តល់នូវការអប់រំ បណ្តុះបណ្តាល និងឱកាសការងារ នៅក្នុងឧស្សាហកម្មបដិសណ្ឋារកិច្ច និងប្រើប្រាស់វិធីសាស្រ្តដែលមានសារះសំខាន់ដែលផ្តោតទៅលើការអភិវឌ្ឍបំណិនជីវិត ដើម្បីឲ្យសហគមន៍កម្ពុជា ជាកន្លែងដែលមនុស្សគ្រប់រូបមានឱកាសស្មើគ្នា និងមានឯករាជ្យភាព និងសមត្ថភាព ដើម្បីបង្កើតជីវិតផ្ទាល់ខ្លួនឲ្យកាន់តែប្រសើរ។ ហើយនៅក្នុងឆ្នាំសិក្សា២០២២-២០២៣នេះ អង្គការស្លាបព្រាកម្ពុជា បានបណ្ដុះបណ្ដាលសិក្ខាកាមចំនួន៥៩នាក់ លើជំនាញសេវាកម្មម្ហូបអាហារ និងភេសជ្ជៈ និងគេហៈកិច្ច ជំនាញធ្វើម្ហូប ជំនាញបារីស្តា/ឆុងកាហ្វេ និងការបំប៉នសមត្ថភាពអតីតសិស្ស ចំនួន២៥នាក់ទៀតផង។
ក្នុងនាមអាជ្ញាធរខេត្ត លោក យុន លីនណេ អភិបាលរងខេត្តសៀមរាប បានលើកឡើងថា វិញ្ញាបនបត្របញ្ជាក់ការសិក្សានេះ សម្រាប់ជួយឱ្យសិក្ខាកាម មានលទ្ធភាពស្វែងរកឱកាសការងារល្អៗ ដើម្បីខ្លួនឯង គ្រួសារ និងសង្គមជាតិ។ លោកបានលើកទឹកចិត្តនិងណែនាំដល់សិក្ខាកាមដែលទើបបញ្ចប់វគ្គ ឱ្យស្គាល់ច្បាស់អំពីខ្លួនឯង និងធ្វើការដឹងគុណដល់ខ្លួនឯង តាមរយៈប្រព្រឹត្តិតែអំពើល្អ ដឹងគុណដល់មាតាបិតាអាណាព្យាបាលដែលពួកគាត់មានថ្ងៃនេះ និងជាពិសេសដឹងគុណដល់ប្រមុខដឹកនាំរាជរដ្ឋាភិបាលដែលបាននាំសុខសន្តិភាព ឱ្យមានការអភិវឌ្ឍន៍ប្រទេសជាតិ បើគ្មានសន្តិភាពទេយើងក៏គ្មានថ្ងៃនេះដែរ ។
មានប្រសាសន៍ក្នុងឱកាសនោះ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ បានថ្លែងថា ការបង្កើតឱកាសការងារដល់យុជន ដើម្បីទទួលបានប្រាក់ចំណូលសមរម្យ និងមានវិថីអភិវឌ្ឍន៍ជំនាញច្បាស់លាស់ជាតួនាទីរបស់គ្រប់ភាគីពាក់ព័ន្ធ។ ការអភិវឌ្ឍធនធានមនុស្ស ក្រសួងទេសចរណ៍បានដាក់ចុះនូវយុទ្ធនាការ “បុគ្គលិកម្នាក់ ជំនាញមួយ (One Employee, One Skill)” ដែលមានបញ្ជូលក្នុងផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ដោយផ្តោតលើទាំងបរិមាណ និងគុណភាព ដើម្បីឆ្លើយតបទៅនឹងតម្រូវការនៃការអភិវឌ្ឍន៍វិស័យទេសចរណ៍ ដែលមានតម្រូវការអ្នកជំនាញប្រមាណ ១,១លាននាក់ នៅឆ្នាំ២០៣០ និងប្រមាណ ១,៤លាននាក់ នៅឆ្នាំ២០៣៥ និងឆ្ពោះទៅសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ SDG 4 និង SDG 8។
យោងតាមរបាយការណ៍របស់មន្ទីរទេសចរណ៍ខេត្តសៀមរាប បានឲ្យដឹងថា គិតត្រឹម៩ខែ ឆ្នាំ២០២៣នេះ មូលដ្ឋានអាជីវកម្មទេសចរណ៍ក្នុងខេត្តសៀមរាប ទើបតែបើកដំណើរការឡើងវិញបានចំនួន៧១% នៃចំនួនអាជីវកម្មសរុប ១,១៦៥ទីតាំង ក្នុងនោះសណ្ឋាគារបានបើកឡើងវិញប្រមាណ១៤៨ទីតាំង ស្មើនឹង៧៩២៦បន្ទប់ ស្មើនឹង ៦៥% ផ្ទះសំណាក់ ២១៣ទីតាំងស្មើនឹង៣,៧៣៥បន្ទប់ និងភោជនីយដ្ឋាន ១២០ទីតាំង ស្មើនឹង ៦១% ខណៈដែលចំនួនទេសចរដែលមកដល់ខេត្តសៀមរាបវិញ មានជើងហោះហើរចូលចំនួនជាង២០ជើងក្នុងមួយថ្ងៃ ហើយមានអ្នកដំណើរចំនួនចន្លោះពី ២,០០០ ទៅ ២,៦០០នាក់។ហើយភ្ញៀវទេសចរអន្តរជាតិដែលទិញបណ្ណចូលទស្សនារមណីយដ្ឋានអង្គរមានចំនួនសរុបប្រមាណ ៥៤ម៉ឺននាក់ ក្នុងរយៈពេល៩ខែឆ្នាំ២០២៣៕
អត្ថបទ និងរូបភាព៖ លោក បូ សាវី , លោក យូ វង្ស
កែសម្រួល៖ លោក អ៊ុន ណារាជ្យ
