ក្រុមនិស្សិតជាង ១០០នាក់ មកពីសាកលវិទ្យាល័យខេមរៈ រាជធានីភ្នំពេញ បានធ្វើកម្មសិក្សានៅតាមប្រាសាទបុរាណមួយចំនួនក្នុងតំបន់អង្គរ ដើម្បីឈ្វែងយល់ពីប្រវត្ដិសាស្ដ្រស្ថាបត្យកម្មរបស់ខ្មែរ ក៍ដូចជាសិក្សាឱ្យបានយល់ដឹងបន្ថែមពីវប្បធម៌ ប្រពៃណី អរិយធម៌របស់ខ្លួនឱ្យកាន់តែច្បាស់ ដែលកម្មសិក្សានេះដែរមានរយៈពេល ៣ថ្ងៃ ចាប់ពីថ្ងៃទី២៧-២៩ ខែតុលា ឆ្នាំ២០២៣។
លោកបណ្ឌិត កុល សារូ សាស្ដ្រចារ្យនៃសាកលវិទ្យាល័យខេមរៈ និងជាអ្នកដឹកនាំក្រុមនិស្សិត បានឲ្យដឹងថា ក្រុមនិស្សិតទាំងនោះ បានចុះសិក្សាស្រាវជ្រាវនៅតាមសំណង់ប្រាសាទមួយចំនួនដែលស្ថិតនៅតំបន់អង្គរ ដើម្បីឈ្វែងយល់ពីសំណង់ប្រាសាទបុរាណមួយចំនួន និងដើម្បីយល់ដឹងបន្ថែមពីវប្បធម៌ អរិយធម៌ ប្រពៃណីរបស់ខ្មែរ ខណៈដែលពួកគាត់បានកំពុងសិក្សាទ្រឹស្ដីនៅសាលកលវិទ្យាល័យនោះ។ លោកបានបន្ដថា ក្រោយពេលបំពេញបេសសកម្ម ក្រុមនិស្សិតបានយល់ដឹងកាន់តែច្បាស់នូវវប្បធម៌របស់ខ្លួន ជាពិសេសពីបេតិកភ័ណ្ឌស្ថាបត្យកម្មសំណង់ប្រាសាទខ្មែរ។
បើតាមតំណាងក្រុមនិស្សិតដែលបានចុះកម្មសិក្សា បានឱ្យដឹងថា ការចុះកម្មសិក្សានេះ បានធ្វើឱ្យពួកគាត់ស្គាល់កាន់តែច្បាស់ពីសំណង់ស្ថាបត្យកម្មរបស់បុព្វការីជន ដែលបានបន្សល់ទុកឱ្យខ្មែរជំនាន់ក្រោយ។ ការសិក្សានូវវិស័យវប្បធម៌របស់កម្ពុជា គឺមានសារៈសំខាន់សម្រាប់និស្សិត ស្របពេលដែលប្រទេសជាតិមានសុខសន្ដិភាព។ ពួកគាត់ស្នើឱ្យសាកលវិទ្យាល័យខេមរៈ ឱ្យក្រុមនិស្សិតបន្ដចុះសិក្សាស្រាវជ្រាវនៅប្រាសាទបុរាណបន្ដទៀត ដើម្បីឱ្យនិស្សិតជំនាន់ក្រោយទៀត និងយកចំណេះដឹងទៅកសាងនិងអភិវឌ្ឍន៍ប្រទេសជាតិឱ្យទទួលបានជោគជ័យ។
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
