នារសៀលថ្ងៃទី៣០ ខែតុលា ឆ្នាំ២០២៣ ព្រះយសមុនីវង្សី បណ្ឌិត រឹត ស៊ីធីម ព្រះគ្រូសូត្រស្តាំវត្តពោធិបន្ទាយជ័យ ក្រុងសៀមរាប បានផ្តួចផ្តើមសហការជាមួយព្រះចៅអធិការ មន្ត្រីសង្ឃខេត្ត និងសប្បុរសជនក្នុងក្រុងសៀមរាប បាននាំយកសម្ភារៈផ្ទះបាយ និងគ្រឿងឧបភោគបរិភោគ ចែកជូនដល់ប្រជាពលរដ្ឋដែលមានជីវភាពខ្វះខាត់ដែលមានលំនៅឋានក្បែរវត្ត ចំនួន ៤២គ្រួសារ ដើម្បីជាការសម្រួលដល់ជីវភាពប្រចាំថ្ងៃ។
ព្រះយសមុនីវង្សី បណ្ឌិត រឹត ស៊ីធីម មានសង្ឃដិកាថា អំណោយជាគ្រឿងឧបភោគបរិភោគ និងសម្ភារៈប្រើប្រាស់ រួមនឹងថវិកាដែលបាននាំមកចែកជូនបងប្អូននាពេលនេះ គឺបានមកពីការប្រគេនរបស់ប្រជាពុទ្ឋបរិស័ទក្នុងពិធីបុណ្យផ្សេងៗនាពេលកន្លងទៅ ហើយព្រះសង្ឃសន្សំទុកសម្រាប់ចែកជូនគ្រួសារដែលជួបហានិភ័យដោយប្រការផ្សេងៗ សម្រាប់ដោះស្រាយការលំបាកមួយគ្រា។
ក្នុងនាមអាជ្ញាធរមូលដ្ឋាន លោក ម៉ៃ សាម៉េត ចៅសង្កាត់សៀមរាប បានចាត់ទុកសកម្មភាពរបស់ព្រះសង្ឃនាពេលនេះ ក៏ដូចចាពេលកន្លងមក ថាជាគុណធម៍ និងជាវប្បធម៌ចែករំលែកដល់អ្នកមានជីវភាពខ្វះខាត ជាមួយរាជរដ្ឋាភិបាល។ ម្យ៉ាងទៀតក៏បានរួមចំណែកជាមួយអាជ្ញាធរភូមិ/សង្កាត់ ដើម្បីជួយដល់ប្រជាពលរដ្ឋដែលកំពុងខ្វះខាតបានទាន់ពេលវេលាផងដែរ។ លោកបានថ្លែងអំណរព្រះគុណ និងអំណរគុណដល់សប្បុរសជន និងមន្ត្រីសង្ឃខេត្ត ព្រះចៅអធិការនៅក្នុងក្រុងសៀមរាបព្រមទាំងសប្បុរសជន ដែលបានផ្តល់ស្បៀងរដល់គ្រួសារក្រីក្រនាពេលនេះ។ ជាមួយគ្នានោះលោកចៅសង្កាត់ ក៏បានណែនាំដល់បងប្អូនទាំងអស់ ត្រូវយកចិត្តទុកដាក់ថែទាំសុខភាព ដូចជាការបរិភោគ ត្រូវរក្សាអនាម័យ ដើម្បីចៀសវាងជំងឺរាគរុសផ្សេងៗ ជាពិសេសត្រូវសហការផ្តល់ដំណឹងជូនអាជ្ញាធរ និងសមត្ថកិច្ច រាល់ពេលឃើញមានសកម្មភាពដែលនាំឱ្យប៉ះពាល់ដល់សន្តិសុខសណ្តាប់ធ្នាប់ក្នុងមូលដ្ឋាន ដូចជាករណីក្មេងទំនើង ការប្រើប្រាស់ឬចែកចាយគ្រឿងញៀន ដើម្បីសមត្ថកិច្ចចាត់វិធានការបង្ក្រាប និងទប់ស្កាត់ទាន់ពេលវេលា សំដៅរួមចំណែកអនុវត្តឱ្យមានប្រសិទ្ឋភាពនូវគោលការណ៍ភូមិឃុំសង្កាត់មានសុវត្ថិភាព ។
ព្រះបវរវិជ្ជា ទេព ភឿន ព្រះវិន័យធរគណខេត្ត និងជាព្រះចៅអធិការវត្តបុព្វទិសារាម មានថេរៈដីកាថា ក្នុងនាមសាលាគណខេត្ត ក៍ដូចជាចៅអធិការវត្តនានាក្នុងទូទាំងខេត្ត គឺតែងតែគិតគូរពីសុខទុក្ខ និងការលំបាករបស់បងប្អូនប្រជាពលរដ្ឋ និងបានសហការគ្នាកៀងគររកជំនួយសប្បុរសធម៌ពីសប្បុរសជនជិតឆ្ងាយ ដើម្បីយកមកចែកជូនគ្រួសារខ្វះខាតជួបការលំបាកផ្នែកជីវភាពប្រចាំថ្ងៃ ស្របតាមពុទ្ឋឱវាទរបស់ព្រះសម្មាសម្ពុទ្ឋបរមគ្រូនៃយើងដែលបានត្រាស់ទូន្មានទុកឱ្យយើងទាំងអស់គ្នាត្រូវចេះរួមសុខរួមទុក្ខ ជួយទុក្ខធុរៈ សង្គ្រោះ និងសម្រាលទុក្ខលំបាកគ្នាទៅវិញទៅមក ព្រោះថាការលំបាករបស់អាជ្ញាធរមូលដ្ឋាន និងបងប្អូនប្រជាពុទ្ឋបរិស័ទក៍ជាការលំបាករបស់ព្រះសង្ឃដែរ ដូច្នេះហើយក្នុងនាមមិត្តរួមជាតិ មិត្តរួមសាសន៍ គឺតែងតែជួយគិតគូរ និងផ្តល់ជូនគ្នាទៅវិញទៅមកទៅតាមលទ្ឋភាពដែលក្រុមព្រះសង្ឃមាន។ ព្រះអង្គក៏បានជំរុញដល់ព្រះភិក្ខុសង្ឃតាមអារាមនានា និងអាជ្ញាធរមូលដ្ឋាន សហការគ្នាបន្តគៀងគរដល់សប្បុរសជន ចែករំលែកនូវធនធានថវិកាក៏ដូចជាសម្ភារនិងគ្រឿងឧបភោគផ្សេងៗដើម្បីទុកត្រៀមបំរុងចែករំលែកដល់គ្រួសារខ្វះខាតជាក់ស្តែងតាមតែអាចធ្វើទៅបាន ត្បិតអីការខ្វះខាតគឺរមែងតែកើតមាននៅគ្រប់ប្រទេសនិងទីតំបន់បើទោះជាប្រទេសគេមួយចំនួនមានការអភិវឌ្ឍន៍និងជឿនលឿនយ៉ាងណាក្តីក៏រមែងមានអ្នកក្រក្សត់ខ្វះខាតដែរ។
សូមជំរាបថា ជនចាស់ជរា និងពលរដ្ឋមានជីវភាពខ្វះខាតទាំង៤២គ្រួសារក្នុងមួយគ្រួសារទទួលបាន៖ អង្ករ ២៥គីឡូក្រាម ទឹកត្រី១យួរ ទឹកស៊ីអ៊ីវ១យួរ ត្រីខ១យួរ មី១កេស សារុង១ ថវិកា៥ម៉ឺនរៀល និងសម្ភារៈផ្ទះបាយមួយចំនួនទៀត៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
