ថ្លែងក្នុងពិធីចែកវិញ្ញាបនបត្រដល់សិក្ខាកាមមកពីគ្រួសារខ្វះខាតចំនួន ៣០០នាក់ នៅខេត្ដសៀមរាប ដែលបានបញ្ចប់ការបណ្ដុះបណ្ដាលរយៈពេល ៦ខែ លើផ្នែកបដិសណ្ឋារកិច្ចក្នុងវិស័យទេសចរណ៍ នាព្រឹកថ្ងៃទី៣១ ខែតុលា ឆ្នាំ២០២៣ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ បានលើកឡើងថា ការបង្កើតឱកាសការងារដល់យុជនដែលអាចស្វែងរកម្រៃបានសមរម្យ និងមានវិថីអភិវឌ្ឍន៍ជំនាញច្បាស់លាស់ គឺជាតួនាទីរបស់គ្រប់ភាគីពាក់ព័ន្ធដែលត្រូវអនុវត្ត។
ឯកឧត្តម ប៉ាក់ សុខុម មានប្រសាសន៍ថា ដើម្បីឆ្លើយតបនឹងការអភិវឌ្ឍធនធានមនុស្ស ក្រសួងទេសចរណ៍បានដាក់ចុះនូវយុទ្ធនាការ “បុគ្គលិកម្នាក់ ជំនាញមួយ (One Employee, One Skill)” ដែលមានបញ្ជូលក្នុងផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ដោយផ្តោតលើទាំងបរិមាណ និងគុណភាព ដើម្បីឆ្លើយតបទៅនឹងតម្រូវការនៃការអភិវឌ្ឍន៍វិស័យទេសចរណ៍ ដែលមានតម្រូវការអ្នកជំនាញប្រមាណ ១,១លាននាក់ នៅឆ្នាំ២០៣០ និងប្រមាណ ១,៤លាននាក់ នៅឆ្នាំ២០៣៥ និងឆ្ពោះទៅសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ SDG 4 និង SDG 8។ ឯកឧត្តមក៏បានជំរុញឲ្យសិក្ខាកាមទាំងអស់ដែលបានបញ្ចប់ការបណ្តុះបណ្ដាលនាពេលនេះ ត្រូវខិតខំអនុវត្តការងារដោយប្រើចំណេះជំនាញដែលទទួលបាន ប្រកបដោយផ្លែផ្កាល្អ។
ព័ត៌មានជាតិ ថ្មីៗ
បើតាមលោក លោក ហ្វ៊ីលីព សែតកៅ ប្រធានសមាគមក្លឹបទេសចរណ៍សៀមរាប បានឲ្យដឹងថា វគ្គបណ្តុះបណ្តាលដែលមានរយៈពេល ៦ខែនេះ សិក្ខាកាមបានសិក្សាលើទ្រឹស្តី ចំនួន២ខែ និងខែចុះកម្មសិក្សាក្នុងបណ្តាក្រុមហ៊ុនដៃគូរយៈពល៤ខែ។ ជាលទ្ធផលល្អសិស្សដែលចូលរួមវគ្គនេះ មានការងារធ្វើមានចំនួនសរុប ២១២នាក់ ស្មើរនឹង ៨៥.១៤%។ កម្មវិធីបណ្តុះបណ្តាលនេះផ្ដល់ជាផ្លែផ្កាយ៉ាងពិតប្រាកដ ការទទួលបានការងារដែលអាចជួយសម្រួលជីវភាពខ្លួនគេ និងមួយចំនែកសម្រាលបន្ទុកចំនាយដល់គ្រួសាររបស់គេ ក្នុងន័យលើកកម្ពស់សេដ្ឋកិច្ចគ្រួសារ កាត់បន្ថយការចំណាកស្រុកដោយខុសច្បាប់ និងផ្តោត ទៅលើការសិក្សាពេញមួយជីវិត ដែលយុទ្ធសាស្ត្ររបស់សមាគម និងស្វះស្វែងក្នុងការបន្ត បំពាក់បំប៉ន ដល់ប្អូនៗបន្តទៀតលើគម្រោងអភិវឌ្ឍន៍សមត្ថភាព(UPSKILL) & ស្តារលទ្ធ ភាពជំនាញ (RESKILL) ក៏ដូចជាការបើកឱកាសអោយប្អូនៗបន្តការសិក្សាដល់ថ្នាក់ឧត្តមសិក្សាជាមួយនឹងសកលវិទ្យាល័យដែលជាដៃគូរអភិវឌ្ឍន៍ធនធានមនុស្សជាអាទិ៍ដូចជា សាកលវិទ្យាល័យអង្គរ និងសាលាភាសារដទៃទៀតដែលសមាគមអាចធ្វើទៅបាន។ ជាពិសេសការផ្តោតបន្ថែមលើភាសាអង់គ្លេស និងភាសាចិន និងភាសាបរទេសបន្ថែមទៀត យ៉ាងហោចណាស់ប្អូនត្រូវមានជំនាញអាចនិយាយបានពីរភាសាដើម្បីភាពត្រៀមខ្លួន និងរួចរាល់ក្នុងការទទួលបដិសណ្ឋារកិច្ចទេសរណ៍ចិនមកព្រះរាជាណាចក្រកម្ពុជា។
ក្នុងនាមអាជ្ញាធរខេត្ត លោក យុន លីនណេ អភិបាលរងខេត្តសៀមរាប បានលើកឡើងថា វិញ្ញាបនបត្របញ្ជាក់ការសិក្សានេះ សម្រាប់ជួយឱ្យសិក្ខាកាម មានលទ្ធភាពស្វែងរកឱកាសការងារល្អៗ ដើម្បីខ្លួនឯង គ្រួសារ និងសង្គមជាតិ។ លោកបានលើកទឹកចិត្តនិងណែនាំដល់សិក្ខាកាមដែលទើបបញ្ចប់វគ្គ ឱ្យស្គាល់ច្បាស់អំពីខ្លួនឯង និងធ្វើការដឹងគុណដល់ខ្លួនឯង តាមរយៈប្រព្រឹត្តិតែអំពើល្អ ដឹងគុណដល់មាតាបិតាអាណាព្យាបាលដែលពួកគាត់មានថ្ងៃនេះ និងជាពិសេសដឹងគុណដល់ប្រមុខដឹកនាំរាជរដ្ឋាភិបាលដែលបាននាំសុខសន្តិភាព ឱ្យមានការអភិវឌ្ឍន៍ប្រទេសជាតិ បើគ្មានសន្តិភាពទេយើងក៏គ្មានថ្ងៃនេះដែរ៕
អត្ថបទ និងរូបភាព៖ លោក ជា ស្រស់ , យូ វង្ស
កែសម្រួល៖ លោក អ៊ុន ណារាជ្យ
