នៅព្រឹកថ្ងៃទី៣១ ខែតុលា ឆ្នាំ២០២៣ រដ្ឋបាលខេត្តសៀមរាប បានបន្តរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត លើកទី៥ អាណត្តិទី៣ ដែលជាគោលដៅទី៤ សម្រាប់ស្រុកសូទ្រនិគម និងស្រុកប្រាសាទបាគង នៅបរិវេណវត្តប្រាសាទបន្ទាយស្រី ក្នុងស្រុកស្រុកសូទ្រនិគម ដើម្បីផ្ដល់ព័ត៌មានជូនប្រជាពលរដ្ឋអំពីសមិទ្ធផលដែលក្រុមប្រឹក្សាសម្រេចបានកន្លងមក និងទទួលសំណួរ-សំណូមពររបស់ប្រជាពលរដ្ ដើម្បីធ្វើការឆ្លើយតប និងដោះស្រាយ។
អង្គវេទិកាបានប្រព្រឹត្តិទៅក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោក ពិន ប្រាកដ អភិបាលរងខេត្ត រួមនឹងវត្តមានឯកឧត្ដម លោកជំទាវសមាជិកក្រុមប្រឹក្សាខេត្ត ថ្នាក់ដឹកនាំមន្ទីរ-អង្គភាពក្នុងខេត្ត អាជ្ញាធរមូលដ្ឋាន និងប្រជាពលរដ្ឋជាច្រើននាក់ទៀត។
វេទិកានាពេលនេះដែរ ក្រុមការងារទទួលបាននូវសំណួរ-សំណូមពរពីបងប្អូនប្រជាពលរដ្ឋសរុបចំនួន៤៥ ក្នុងនោះ៖ ផ្ទាល់មាត់ចំនួន១២ និងជាលាយល័ក្ខអក្សរ ចំនួន៣៣ ដែលពាក់ព័ន្ធទៅលើបញ្ហាហេដ្ឋារចនាសម្ព័ន្ធ វិស័យអប់រំ អគ្គីសនី បញ្ហាលំនៅឋាននៅតំបន់អាជ្ញាធរជាតិអប្សរា និងទំនាស់ដីធ្លីដែលមិនទាន់បានដោះស្រាយ។ ជាមួយគ្នានោះតំណាងមន្ទីរ-អង្គភាពពាក់ព័ន្ធ ក៏បានធ្វើការបកស្រាយបំភ្លឺជូនដល់អង្គវេទិកាទាំងមូលនូវសំណួរ-សំណូមពរមួយចំនួន ដោយឡែកសំណួរ-សំណូមពរដែលនៅសល់ក្រុមការងារនឹងបញ្ជូនទៅកាន់មន្ទីរ-អង្គភាពជំនាញ ដើម្បីពិភាក្សារកដំណោះស្រាយបន្ត និងឆ្លើយតបទៅកាន់ប្រជាពលរដ្ឋវិញនៅពេលក្រោយ។
មានប្រសាសន៍ក្នុងឱកាសនោះ ឯកឧត្តម អ៊ាន ឃុន ថ្លែងថា វេទិការថ្ងៃនេះមានសារៈសំខាន់ណាស់ក្នុងការជួយជំរុញដល់ដល់ការអនុវត្តមុខងាររបស់អ្នកពាក់ព័ន្ធ រួមនឹងអាជ្ញាធរមូលដ្ឋានឲ្យកាន់តែមានប្រសិទ្ធភាព ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន និងជួយជំរុញដល់ការអភិវឌ្ឍសេដ្ឋកិច្ចសង្គម សំដៅលើកកម្ពស់គុណភាពជីវិត កាត់បន្ថយភាពក្រីក្ររបស់បងប្អូនប្រជាពលរដ្ឋនៅតាមបណ្ដាក្រុង-ស្រុក នៃខេត្តសៀមរាបទាំងមូល តាមរយះការចូលរួមលើកឡើងនូវទុក្ខកង្វល់ បញ្ហាប្រឈម និងសំណូមពរនានារបស់ប្រជាពលរដ្ឋនៅក្នុងវេទិកានេះ មកធ្វើការពិភាក្សាស្រាយបំភ្លឺឲ្យបានច្បាស់លាស់ ប្រកបដោយតម្លាភាព នឹងឈានទៅរកការដោះស្រាយជូនបានចំគោលដៅ មានប្រសិទ្ធិភាព និងទាន់ពេលវេលាផងដែរ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
