ក្រសួងអប់រំ យុវជន និងកីឡា នៅព្រឹកថ្ងៃទី៣០ ខែវិច្ឆិកា ឆ្នាំ២០២៣នេះ បានរៀបចំកម្មវិធីប្រកួតប្រជែងស្នាដៃយុវជន សតវត្សរ៍ទី២១ ក្រោមប្រធានបទ “STEM និងការផលិតអាហារ” នៅមជ្ឈមណ្ឌលជាតិយុវជនកម្ពុជាខេត្តសៀមរាប ដែលកម្មវិធីនេះចាប់ពីថ្ងៃទី៣០ ខែវិច្ឆិកា ដល់ថ្ងៃទី០២ ខែធ្នូ ឆ្នាំ២០២៣ ដោយមានយុវជនមកពីទូទាំង ២៥រាជធានី-ខេត្តបានចូលរួម។
លោក ស៊ីវ គឹមសេង អនុប្រធាន នាយកដ្ឋានយុវជន បានបញ្ជាក់ថា កម្មវិធីប្រគួតប្រជែងស្នាដៃនេះ មានគោលបំណងដើម្បីជំរុញឱ្យសិស្សានុសិស្ស លោកគ្រូអ្នកគ្រូ បង្កើនការយកចិត្តទុកដាក់កាន់តែខ្លាំងក្លាលើការសិក្សា និងស្រាវជ្រាវ និងលើកទឹកចិត្តដល់យុវជនឱ្យមានគំនិតផ្តួចផ្តើមបង្កើតថ្មី និងច្នៃប្រឌិតនូវអ្វីដែលជាលទ្ធផល បានមកពីការស្រាវជ្រាវ ទាក់ទង និងវិទ្យាសាស្រ្ត បច្ចេកវិទ្យា វិស្វកម្មនិងគណិតវិទ្យា។ កម្មវិធីនេះក៏ជាការផ្តល់ឱកាសដល់យុវជនចែករំលែកបទពិសោធ និងការធ្វើបទបង្ហាញស្នាដៃរបស់ខ្លួនដែលបានមកពីការស្រាវជ្រាវទៅដល់យុវជនដទៃ ពិសេសជម្រុញដល់យុវជនមានសេចក្តីក្លាហាន ហ៊ានចូលរួមចែលរំលែក និងទទួលយកបទពិសោធថ្មីៗ បង្កើតបានជាមូលធនមនុស្សដែលមានសក្តានុពលឆ្លើយតបទៅនឹងទីផ្សារការងារ និងអភិវឌ្ឍខ្លួន ឱ្យក្លាយទៅជាពលរដ្ឋឌីជីថលមានតម្លៃនៅក្នុងសង្គមឌីជីថល នៃបដិវត្តឧស្សាហកម្ម៤.០ គឺយុវជនម្នាក់ ត្រូវមានជំនាញ និងបំណិនមួយយ៉ាងតិចសម្រាប់ជីវិត។
ឯកឧត្តមបណ្ឌិត ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា រាជរដ្ឋាភិបាលកម្ពុជា បានចាត់ទុកការអភិវឌ្ឍយុវជន គឺជាអាទិភាព និងជាកម្លាំងមូលដ្ឋានដ៏រឹងមាំមួយ ក្នុងការចូលរួមអភិវឌ្ឍសេដ្ឋកិច្ច និងសង្គមជាតិ។ ដើម្បីបង្ហាញពីការប្តេជ្ញាចិត្តក្នុងការអភវឌ្ឍន៍យុវជន រាជរដ្ឋាភិបាលបានដាក់ចេញនូវគោលនយោបាយជាតិស្ដីពីការអភិវឌ្ឍន៍យុវជនកម្ពុជា ដែលមានចក្ខុវិស័យវែងឆ្ងាយក្នុងការប្រមូលផ្តុំកម្លាំងពីគ្រប់មជ្ឈដ្ឋានក្នុងសង្គមជាតិ សំដៅចូលរួមចំណែកអភិវឌ្ឍយុវជនឱ្យមានសម្បទាគ្រប់ជ្រុងជ្រោយ ឆ្លើយតបទៅនឹងការអភិវឌ្ឍជាសកលនៃបដិវត្តន៍ឧស្សាហកម្ម៤.០នៃយុគសម័យឌីជីថល។
ឯកឧត្តមបណ្ឌិត ស៊ាន បូរ៉ាត មានប្រសាសន៍ទៀតថា កម្មវិធីប្រគួតប្រជែងស្នាដៃយុវជនសតវត្សរ៍ទី២១ គឺជាវេទិកាមួយដ៏មានសារៈសំខាន់សម្រាប់យុវជន ព្រោះយុវជនជាតួអង្គដ៏សំខាន់ក្នុងការទទួលយកនូវបច្ចេកវិទ្យាថ្មីៗ និងជាសរសៃឈាមនៅក្នុងការអភិវឌ្ឍសេដ្ឋកិច្ចសង្គមជាតិ ដើម្បីធ្វើការអនុវត្តជាក់ស្តែងលើទ្រឹស្ដីដែលបានសិក្សារៀនសូត្រនៅសាលារៀន ពាក់ព័ន្ធនឹងមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM)។ មូលដ្ឋានយ៉ាងសំខាន់ដែលយុវជនសតវត្សរ៍ទី២១ ដែលត្រូវតែយកចិត្តទុកដាក់ និងសិក្សារៀនសូត្រឱ្យបានស៊ីជម្រៅ ដើម្បីបំពេញនូវសក្តានុពល និងរក្សាបាននូវភាពប្រគួតប្រជែងទាំងក្នុងកម្រិតតំបន់និងអន្តរជាតិ ជាពិសេសគឺប្រែក្លាយខ្លួនជាមូលធនមនុស្សប្រកបដោយថាមពល និងមានសម្បទាចំនួន៤ គឺ៖វិជ្ជាសម្បទា បំណិនសម្បទា ចរិយាសម្បទា និងកាយសម្បទា។
ឯកឧត្តមរដ្ឋលេខាធិការ ក៏បានក្រើនរំលឹកដល់យុវជនទាំងអស់ប្រឹងប្រែងបន្ថែមទៀត ខណៈបច្ចុប្បន្នបច្ចេកវិទ្យាឌីជីថលកំពុងបោះជំហ៊ានយ៉ាងលឿន ហើយបានក្លាយជាកាតាលីករក្នុងការជំរុញកំណើនសេដ្ឋកិច្ច។ ទោះបីស្ថិតក្នុងកាលៈទេសៈណាក៏បច្ចេកវិទ្យាឌីជីថលអាចមានសក្តានុពលខ្ពស់ និងទូលំទូលាយក្នុងការផ្តល់លទ្ធភាពឱ្យប្រទេសមួយអាចមានសេដ្ឋកិច្ចលូតលាស់ឬអភិវឌ្ឍបានយ៉ាងឆាប់រហ័ស និងប្រែក្លាយពីប្រទេសដែលពឹងផ្អែកលើឧស្សាហកម្មប្រពៃណីទៅជាឧស្សាហកម្មទំនើបក្នុងរយៈពេលដ៏ខ្លីបាន ដោយក្នុងនោះហើយការសិក្សាលើមុខវិជ្ជា STEM បាននឹងកំពុងដើរតួនាទីយ៉ាងសំខាន់ក្នុងការងារនេះ។ ក្នុងនោះដើម្បីឆ្លើយតបទៅនឹងយុទ្ធសាស្ត្រចបញ្ចកោណដំណាក់កាលទី១ និងការសម្រួចអាទិភាពកំណែទម្រង់វិស័យអប់រំ គឺការពង្រឹងការសិក្សាក្រៅម៉ោងក្នុងគោលបំណងពង្រឹងសីលធម៌ សុជីវធម៌ ឥរិយាបទ និងការងារសម័គ្រចិត្តសម្រាប់សិស្សានុសិស្ស អនុវិស័យការអភិវឌ្ឍយុវជន នៃក្រសួងអប់រំ យុវជន និងកីឡា ក្នុងមួយឆ្នាំៗតែងតែផ្តល់ឱកាសដល់យុវជនកម្ពុជា ធ្វើការដុសខាត់ និងបង្ហាញសមត្ថភាព តាមរយៈកម្មវិធីជាច្រើន បន្ថែមលើកម្មវិធីប្រគួតប្រជែងស្នាដៃយុវជនសតវត្សរ៍ទី២១ ជាច្រើនកម្មវិធីផងដែរ៕
អត្ថបទ និងរូបភាព៖ លោក ទ្រា ពន្លឺ, បូ សាវី
កែសម្រួល៖ លោក អ៊ុន ណារាជ្យ
