នៅរសៀលថ្ងៃទី៣០ ខែវិច្ឆិកា ឆ្នាំ២០២៣នេះ ឯកឧត្ដម Patrick Muphy ឯកអគ្គរដ្ឋទូតសហរដ្ឋអាមេរិក ប្រចាំប្រទេសកម្ពុជា បានអញ្ជើញបំពេញទស្សនកិច្ច នៅអាកាសយានដ្ឋានអន្ដរជាតិសៀមរាប-អង្គរ ដើម្បីពិនិត្យមើលលទ្ធភាព និងស្វែងយល់ពីសក្ដានុពុលនៃអាកាសយានដ្ឋានមួយនេះ ដើម្បីគាំទ្រដល់អ្នកទេសចរអាមេរិក ក៏ដូចអ្នកទេសចរផ្សេងទៀតដែលបានទៅកំសាន្ដនៅទឹកដីអង្គរ។
បើតាម ឯកឧត្ដម ស៊ិន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យ រដ្ឋលេខាធិការដ្ឋានអាកាសចរណ៍ស៊ីវិល មានប្រសាសន៍ថា ដើម្បីផ្ដល់ការគាំទ្រដល់ការធ្វើដំណើររបស់អ្នកទេសចរគ្រប់ជាតិសាសន៍ ក្រោយពីការបើកដំណើរការហោះហើរ នៃអាកាសយានដ្ឋានអន្ដរជាតិសៀមរាប-អង្គរ។ ឯកឧត្ដម ឯកអគ្គរដ្ឋទូត បានពិនិត្យមើលពីការអភិវឌ្ឍន៍នូវអាកាសយានដ្ឋានមួយនេះ ព្រោះចង់ដឹងពីភាពទំនើប និងអស្ចារ្យរបស់វា ដើម្បីសុខសុវត្ថិភាពទេសចររបស់ខ្លួន ក៏ដូចជាអ្នកទេសចរជាច្រើនទៀត ដែលបានធ្វើដំណើរចុះចតនៅអាកាសយានដ្ឋានមួយនេះ ជាពិសេសធានានូវសុវត្ដិភាពអ្នកទេសចរ។ ក្នុងនោះ ឯកឧត្តម បានថ្លែងការកោតសរសើរ ដល់ថ្នាក់ដឹកនាំប្រទេសកម្ពុជា ដែលបានសាងសង់នូវព្រលានយន្ដហោះមួយនេះ ដែលមានភាពអស្ចារ្យ និងទំនើបបំផុត។
ឯកអគ្គរដ្ឋទូតសហរដ្ឋអាមេរិក Patrick Muphy បានបង្ហាញថា អាកាសយានដ្ឋានអន្ដរជាតិមួយនេះ នឹងក្លាយជាជាកម្លាំងទាញសេដ្ឋកិច្ចដ៏ធំមួយ ដោយមិនត្រឹមតែលើកស្ទួយវិស័យទេសចរណ៍ប៉ុណ្ណោះទេ តែអាចនឹងផ្តល់អត្ថប្រយោជន៍ សម្រាប់វិស័យកសិកម្ម វិស័យបច្ចេកវិទ្យា និងវិស័យផ្សេងទៀត ជាពិសេសក៏អាចជាកន្លែងដឹកជញ្ជូនទំនិញតាមផ្លូវអាកាសដ៏សំខាន់ និងជាសមិទ្ធផលជាប្រវត្តិសាស្រ្តមួយរបស់កម្ពុជាដ៏ធំសម្រាប់នៅកម្ពុជាទាំងបច្ចុប្បន្ន និងនាពេលអនាគត។
សូមជម្រាបថា អាកាសយាន្តដ្ឋានអន្តរជាតិសៀមរាបអង្គរ មានចំណតសម្រាប់ចតអាកាសយានចំនួន ៣៨ចំណត និងអាចទទួលអ្នកដំណើរ តាមផ្លូវអាកាសបាន៧លាននាក់ក្នុងមួយឆ្នាំ សម្រាប់ឆ្នាំ២០២៣ និងឈានទៅទទួលអ្នកដំណើរបាន១២លាននាក់ ក្នុងមួយឆ្នាំ ចាប់ពីឆ្នាំ២០៤០៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
