ក្រសួងផែនការ នៅព្រឹកថ្ងៃទី៣០ ខែវិច្ឆិកា ឆ្នាំ២០២៣នេះ បានបើកវគ្គបណ្តុះបណ្តាលស្ថិតិគណនេយ្យជាតិ និងសន្ទស្សន៍ថ្លៃថ្នាក់ខេត្តជូនដល់បណ្ដាមន្ទីរអង្គភាព និងស្ថាប័នពាក់ព័ន្ធក្នុងខេត្តសៀមរាប ក្នុងគោលបំណងដើម្បីពង្រឹងប្រព័ន្ធស្ថិតិគណនេយ្យជាតិ និងសន្ទស្សន៍ថ្លៃថ្នាក់ខេត្ត ដែលជាផ្នែកមួយនៃប្រព័ន្ធស្ថិតិជាតិដែលមានតួនាទីសំខាន់ណាស់ក្នុងការអភិវឌ្ឍន៍ប្រទេសជាតិ។
អគ្គនាយកវិទ្យាស្ថានជាតិស្ថិតិ នៃក្រសួងផែនការ ឯកឧត្តម ទ្រី ឫទ្ធា មានប្រសាសន៍ថា ប្រព័ន្ធស្ថិតិជាតិមានគន្លឹះសំខាន់ៗដូចជា៖ ស្ថិតិគណនេយ្យជាតិ និងសន្ទស្សន៍ថ្លៃ, ស្ថិតិជញ្ជីងទូទាត់, ស្ថិតិហិរញ្ញវត្ថុរដ្ឋាភិបាល, ស្ថិតិកសិកម្ម, ស្ថិតិនាំចេញ-នាំចូល។ល។ គឺជាបណ្ដុំសូចនាករស្ថិតិម៉ាក្រូសេដ្ឋកិច្ច ដែលត្រូវប្រមូល និងចងក្រងប្រចាំខែត្រីមាស និងប្រចាំឆ្នាំ ដែលការងារនេះស្របទៅនឹងទិសដៅរបស់រាជរដ្ឋាភិបាលកម្ពុជា ក្នុងអាណត្តិទី៧ ដែលបានដាក់ចេញនូវយុទ្ធសាស្ត្របញ្ចកោណដំណាក់កាលទី១ គឺអភិវឌ្ឍធនធានមនុស្សទៅជាមូលធនមនុស្ស និងបញ្ចកោណទី២ គឺជំរុញកំណើនសេដ្ឋកិច្ចជាតិ។
ឯកឧត្តម ទ្រី ឫទ្ធា មានប្រសាសន៍ទៀតថា ដើម្បីវាស់វែងកំណើនសេដ្ឋកិច្ចជាតិ យើងត្រូវមានស្ថិតិគណនេយ្យជាតិមួយ ដែលមានគុណភាពដែលអាចឆ្លើយតបទៅនឹងតម្រូវការនៃការវិវឌ្ឍសេដ្ឋកិច្ចទាំងថ្នាក់ជាតិ និងខេត្ត ដែលរាជរដ្ឋាភិបាលកម្ពុជា អាចប្រើប្រាស់បានជាសូចនាករមូលដ្ឋាន សំរាប់តាមដានវិភាគ វាយតម្លៃ រៀបចំគោលនយោបាយថ្នាក់ជាតិ និងខេត្ត និងការសំរេចចិត្តនានារបស់រាជរដ្ឋាភិបាល ឆ្លើយតបទៅនឹងបំរែបំរួលសេដ្ឋកិច្ចតំបន់ និងសកល ហើយរាល់គោលនយោបាយ កម្មវិធីរបស់រាជរដ្ឋាភិបាល បានយក GDP ជាគោល។
ព័ត៌មានជាតិ ថ្មីៗ
ឯកឧត្តមបន្ថែមថា ក្នុងន័យនេះរាជរដ្ឋាភិបាលកម្ពុជា និងក្រសួងផែនការ បានយកចិត្តទុកដាក់ និងបានជ្រើសរើសការពង្រឹងប្រព័ន្ធស្ថិតិគណនេយ្យជាតិ និងសន្ទស្សន៍ថ្លៃ ជាសកម្មភាពអទិភាពមួយក្នុងចំណោមសកម្មភាពអទិភាពជាច្រើន សម្រាប់ចងក្រងជាសូចនាករសេដ្ឋកិច្ចមួយដ៏សំខាន់ក្នុងការវាយតម្លៃការអនុវត្តគោលនយោបាយរបស់រដ្ឋាភិបាលកម្ពុជា ហើយបានអនុញ្ញត្តឲ្យរៀបចំវគ្គបណ្តុះបណ្តាលស្ថិតិគណនេយ្យ ជាតិនិងសន្ទស្សន៍ថ្លៃ ស្របតាមសៀវភៅណែនាំអង្គការសហប្រជាជាតិឆ្នាំ២០០៨ និងផ្តល់ការបណ្តុះបណ្តាលជំនាញគណនេយ្យជាតិ និងសន្ទស្សន៍ថ្លៃជូនមន្ត្រីផែនការ និងមន្ទីរជំនាញជុំវិញខេត្ត ដើម្បីឲ្យមន្ត្រីខេត្តមានលទ្ធភាពប្រមូល និងចងក្រងស្ថិតិគណនេយ្យជាតិ និងសន្ទស្សន៍ដោយខ្លួនឯងនាពេលអនាគត៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
