បន្ទាប់ពីធ្វើការបូកសរុបការវាយតម្លៃរបស់អ្នកទេសចរណ៍ ដែលបានទៅទស្សនាកន្លែងទេសចរណ៍ល្បីៗនៅជុំវិញពិភពលោករួចមក គេហទំព័រប្រឹក្សាយោបល់អន្តរជាតិដ៏ធំមួយឈ្មោះ Trip Advisor បានសម្រេចថា ប្រាសាទអង្គរវត្តគឺជា កន្លែងទេសចរណ៍ដ៏ល្អបំផុត ក្នុងចំណោមតំបន់ទេសចរណ៍ទាំង២៥ លើពិភពលោក សម្រាប់ឆ្នាំ២០១៨។
ក្នុងសន្និសីទសារព័ត៌មានក្រោយពិធីប្រគល់-ទទួលពានរង្វាន់ លោកស្រី សារ៉ា ម៉ាធ្យូយ៍ ប្រធានផ្នែកទីផ្សារតំបន់អាស៊ីប៉ាស៊ីហ្វិច តំណាងរបស់ក្រុមហ៊ុនTrip Advisor បានលើកឡើងថា ការផ្ដល់ចំណាត់ថ្នាក់លេខ១ ដល់ប្រាសាទអង្គរវត្តរបស់ប្រទេសកម្ពុជា ជាទីកន្លែងទេសចរណ៍ដ៏អស្ចារ្យបំផុតលើពិភពលោកក្នុងឆ្នាំ២០១៨នេះ ធ្វើឡើងតាមរយៈការស្រង់មតិរយៈពេល១២ខែ លើចំណាប់អារម្មណ៍ និងទស្សនៈរបស់អ្នកទេសចរណ៍រាប់លាននាក់ជុំវិញពិភពលោក កាលពីថ្ងៃទី២២ ខែឧសភា ឆ្នាំ២០១៨។
ឯកឧត្តម ឃឹម ប៊ុនសុង អភិបាលខេត្តសៀមរាប បានមានប្រសាសន៍ថា៖ កន្លងមកកម្ពុជាក៏ធ្លាប់បានទទួលពានរង្វាន់លំដាប់ថ្នាក់ពិភពលោកពីស្ថាប័នវាយតម្លៃអន្តរជាតិផ្សេងៗទៀត នៅឆ្នាំ២០១៤ អង្គរវត្តជាប់ចំណាត់ថ្នាក់លេខ១ ជាតំបន់បុរាណវិទ្យា និងប្រវត្តិសាស្ត្រដ៏ទាក់ទាញបំផុតលើពិភពលោក នៅលើគេហទំព័រ អាកឃីអូឡូជីកខល (archaeological) ។ នៅឆ្នាំ២០១៦ អង្គរវត្តបានជាប់ចំណាត់ថ្នាក់លេខ១ ជារមណីយដ្ឋានទេសចរណ៍វប្បធម៌ដ៏ល្បីល្បាញលើពិភពលោក នៅលើគេហទំព័រ ឡូនលី ភ្លែនណេត (Lonely Planet)។ បន្ថែមពីនេះ នៅឆ្នាំ២០១៨នេះ អតីតរាជធានីអង្គរ ក៏ទទួលបានជ័យលាភីជារាជធានីទេសចរណ៍ និងវប្បធម៌ពិភពលោកផងដែរ។
មានប្រសាសន៍នាឱកាសនោះដែរ ឯកឧត្តម សុខ សង្វារ អគ្គនាយករង ទទួលបន្ទុកនាយកដ្ឋានអភិវឌ្ឍន៍ទេសចរណ៍អង្គរ នៃអាជ្ញាធរជាតិអប្សរា បានបង្ហាញសុទិដិ្ឋនិយមថា តាមរយៈការផ្ដល់ចំណាត់ថ្នាក់លេខ១ ជូនដល់ប្រាសាទអង្គរវត្ត ជាទីកន្លែងទេសចរណ៍ដ៏អស្ចារ្យបំផុតលើពិភពលោកក្នុងឆ្នាំ២០១៨នេះ តំបន់រមណីយដ្ឋានអង្គរទាំងមូលនឹងទទួលបានកំណើនភ្ញៀវទេសចរអន្តរជាតិជាច្រើនបន្ថែមទៀត ជាមួយគ្នានោះវិស័យទេសចរណ៍នៅកម្ពុជា ក៏ត្រូវបានផ្សព្វផ្សាយទៅកាន់ពិភពលោកកាន់តែទូលំទូលាយទៀតផងដែរ។
បន្ទាប់ពីបញ្ចប់ពិធីប្រគល់-ទទួលពានរង្វាន់ ពីតំណាងរបស់ក្រុមហ៊ុនTrip Advisor ដ៏ល្បីមួយនេះហើយ គណៈអធិបតី ប្រតិភូ នៃក្រុមហ៊ុន TripAdvisor រួមជាមួយភ្ញៀវកិត្តិយស ក៏បានដង្ហែជ័យលាភីនេះ ដោយជិះរ៉ឺម៉កបន្តទៅចូលរួមកម្សាន្តសប្បាយ នៅក្នុងពិធីជប់លៀងដ៏អធិកអធមមួយនៅតំបន់ Pub Street នារាត្រី ក្នុងក្រុងសៀមរាប៕
អត្ថបទ និង រូបថត ៖ លោក សេង ផល្លី
