លោក ហេង គឹមឡេង ប្រធាននាយកដ្ឋានទ្រទ្រង់បច្ចេកទេសនិងអន្តរវិស័យនៃអាជ្ញាធរជាតិអប្សរា បានឲ្យដឹងថា ផ្លូវអង្គរឃ្យុងយូ ឬផ្លូវ៦០ម៉ែត្រនេះ បានស្ថាបនាឡើងកាលពីឆ្នាំ២០០២ ក្រោមជំនួយឧបត្ថម្ភរបស់ទីភ្នាក់ងារបារាំង (ADF) ហើយនៅឆ្នាំ២០០៦ អាជ្ញាធរជាតិអប្សរាក៏បានចំណាយថវិកាមួយចំនួនដើម្បីធ្វើផ្លូវគ្រួសក្រហមសងខាងផ្លូវ និងបន្តសង់ផ្លូវមកខាងកើតហួសរង្វង់មូល ចំនួន៤គីឡូម៉ែត្របន្ថែមទៀត ដើម្បីអបអរសាទរព្រឹត្តិការណ៍វប្បធម៌អង្គរឃ្យុងយូ ដែលជាកិច្ចសហប្រតិបត្តិការរវាងតំបន់បេតិកភណ្ឌចំនួន២ គឺអង្គរ និងឃ្យុងយូ ហើយក្រោយមកនៅឆ្នាំ២០១០ អាជ្ញាធរជាតិអប្សរាក៏បានស្ថាបនាផ្លូវ៦០ម៉ែត្រ ប្រវែង៩.៦៧៩ម៉ែត្រ ចាប់ពីផ្លូវបំបែកត្រាំនាគ រហូតដល់បុរីរដ្ឋបាលខេត្តសៀមរាប បច្ចុប្បន្នជាទីស្នាក់ការអាជ្ញាធរជាតិអប្សរា ។
លោក ហេង គឹមឡេង បានបញ្ជាក់ទៀតថា បើគិតមកដល់ពេលនេះ ផ្លូវ៦០ម៉ែត្រនេះ មានរយៈពេល១៦ឆ្នាំ ហើយ ផ្លូវនេះ បានបម្រើផលប្រយោជន៍ដល់ប្រជាជន និងអ្នកទេសចរទាំងឆ្លងកាត់និងដឹកជញ្ជូនទំនិញ ប៉ុន្តែ១៦ឆ្នាំនេះ បានធ្វើឲ្យផ្លូវខូចទ្រង់ទ្រាយ ទ្រុឌទ្រោមដោយចៀសមិនផុត តែអាជ្ញាធរជាតិអប្សរាក៏តែងយកចិត្តទុកដាក់ជួសជុល ថែទាំជាប្រចាំផងដែរ ហើយសម្រាប់ឆ្នាំ២០១៨នេះ អាជ្ញាធរជាតិអប្សរា គ្រោងនឹងស្ថាបនានិងពង្រីកកំណាត់ផ្លូវនេះឲ្យរួចរាល់ទាំងស្រុងប្រវែង៨៦០ម៉ែត្រ ពីស្ពាននាគរហូតដល់រង្វង់មូល ដោយចាប់ដំណើរការនៅខែសីហានេះ ដែលពង្រីកទំហំទទឹងផ្លូវរហូតដល់១០ម៉ែត្រ ខណៈផ្លូវចាស់ប្រវែង៨ម៉ែត្រ ដោយអ៊ុតកៅស៊ូ ហើយគូសគំនូសបែងចែកផ្លូវសងខាងចំនួន១,៥០ម៉ែត្រ សម្រាប់ម៉ូតូកង់ និង៧ម៉ែត្រសម្រាប់រថយន្តទៅមក ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
ព័ត៌មានជាតិ ថ្មីៗ
