ថវិកាជាង ១៣លានរៀល ទេយ្យវត្ថុ សំពត់សាដក គ្រឿងឧបភោគបរិភោគ និងទៀនចំណាំវស្សាមួយចំនួនធំ ត្រូវបាននាំយកទៅប្រគេន ដល់ព្រះសង្ឃគង់នៅវត្តចំនួន៥ ស្ថិតនៅតាមបណ្តោយព្រំដែនកម្ពុជា ថៃ ក្នុងស្រុកបន្ទាយអំពិល ខេត្តឧត្តរមានជ័យ។
ក្នុងបឋមកាល នៃរដូវចូលវស្សាឆ្នាំនេះ នាថ្ងៃទី១២ ខែសីហា ឆ្នាំ២០១៨ ព្រះសង្ឃនិងពុទ្ឋបរិស័ទក្នុងក្រុងសៀមរាបខេត្តសៀមរាប ដឹកនាំដោយព្រះគ្រូប្រាសាទរង្សី សាសនធរោ ឡាច លាង ព្រះគ្រូអនុក្រុងសៀមរាប និងជាព្រះគ្រូចៅអធិការវត្តទេពពោធិវង្ស ហៅវត្តថ្មី រួមជាមួយព្រះគ្រូចៅអធិការបណ្តាវត្តនានាក្នុងក្រុងសៀមរាប បាននាំយកថវិកាទៅប្រគេនដល់ វត្តចំនួន៥ ក្នុងនោះរួមមាន៖
១-វត្តគូ បច្ច័យចំនួន ២០០០០០០៛(ពីរលានរៀល)
២-វត្តជុបគគី បច្ច័យចំនួន ២០០០០០០៛ (ពីរលានរៀល)
៣-វត្តថ្មដូន បច្ច័យចំនួន ២០០០០០០៛ (ពីរលានរៀល)
៤-វត្តអូរទឹកចោល បច្ច័យចំនួន ២០០០០០០៛ (ពីរលានរៀល)
៥-វត្តប្រាសាទតាមាន់ បច្ច័យចំនួន ២០០០០០០៛ (ពីរលានរៀល)
រួមនឹងទេយ្យវត្ថុ សំពត់សាដក គ្រឿងឧបភោគបរិភោគ និងទៀនចំណាំវស្សាមួយចំនួន ដោយឡែក កងពលតូចថ្មើរ ជើងលេខ៤២ ប្រចាំទិសប្រាសាទតាមាន់ ទទួលបានថវិកាចំនួន ៣០០០០០០៛ (បីលានរៀល)ផងដែរ។
ក្នុងឱកាសនោះ ព្រះតេជគុណ ឡាច លាង បានមានសង្ឃដីកាឱ្យដឹងថា៖ នេះមិនមែនជាលើកទីមួយទេ ដែលព្រះសង្ឃ និងប្រជាពុទ្ឋបរិស័ទក្នុងក្រុងសៀមរាប សហការមូលមតិគ្នានាំយកទេយ្យវត្ថុ និងគ្រឿងឧបភោគបរិភោគមកកាន់ទីនេះ ព្រោះព្រះអង្គមើលឃើញថា វត្តមួយចំនួននៅតាមព្រំដែន មានសភាពខ្វះខាត និងមិនទាន់រីកចម្រើនដូចវត្ត នៅក្នុងទីប្រជុំជននៅឡើយទេ។ សកម្មភាពនេះដែរ សម្តែងឱ្យឃើញពី ការយកចិត្តទុកដាក់ គិតគូពីសុខទុក្ខ របស់ព្រះសង្ឃនៅទីជនបទ និងមិនដែលភ្លេចសោះឡើយពីការលំបាក ការលះបង់កម្លាំងកាយចិត្តរបស់វីរៈកងទ័ពខ្មែរ ដែលកំពុងបំពេញភារកិច្ច ក្នុងបុព្វហេតុការពារ និងកសាងជាតិមាតុភូមិរបស់យើងទាំងអស់គ្នា។
មានប្រសាសន៍អំពីសភាពការណ៍និងស្ថានភាពតាមបណ្តោយព្រំដែនថាបច្ចុប្បន្ននេះ លោក ឧត្តមសេនីយត្រី នាក់ វង្ស មេបញ្ជាការរង និងជានាយសេនាធិការកងពលតូចថ្មើរជើងលេខ៤២ ប្រចាំខ្សែត្រៀមជួរមុខនៃតំបន់ប្រាសាទតាមាន់ បានឱ្យដឹងថា នៅតាមបណ្តោយព្រំដែនក្នុងភូមិសាស្ត្រប្រាសាទតាមាន់ និងប្រាសាទតាក្របីគឺមានសភាពស្ងប់ស្ងាត់ពុំមានអ្វីប្រែប្រួលឡើយ តែយ៉ាងណាក៍ដោយក៍កងទ័ពនៅតែប្រុងស្មារតី និងប្រុងប្រយត្ន័ខ្ពស់ ពុំធ្វេសប្រហែសឡើយ។លោក ឧត្តមសេនីយ៍ត្រី ក៏បានបង្ហាញរបាយការណ៍ពីសកម្មភាពថ្មីៗថា៖ នៅថ្ងៃទី១២ខែសីហា២០១៨ដដែលនេះក្រៅពីការងារស្នូល ការពារខ្សែក្រវ៉ាត់ព្រំដែន ក្រោមការដឹកនាំ និងបញ្ជាផ្ទាល់ពីសំណាក់ ឯកឧត្តម ប៉ែន វយ មេបញ្ជាការកងពលតូចថ្មើរជើងលេខ៤២ បានដឹកនាំ កម្លាំងជួរមុខប្រចាំទិសប្រាសាទតាមាន់ ជាង២០០នាក់ របស់កងពលតូចថ្មើរជើងលេចលេខ៤២ ចូលរួមដាំកូនឈើចំនួន៥៦០០ដើម ក្នុងនោះកូននាងនួន១០០ដើម ឈើទាល៥០០ដើម ប្រេងខ្យល់៥០០០ដើម ដើម្បីការពារលំនឹងបរិស្ថាន និងលើកសម្រស់នៃភូមិសាស្ត្រតំបន់ប្រាសាទ ក៍ដូចជារក្សាសុខុមាលភាពដល់គ្រួសារនិងបងប្អូនកងទ័ពក្នុងទីនេះផងដែរ ។
បន្ទាប់ពីបានវេរប្រគេននូវទេយ្យវត្ថុ សំពត់សាដក គ្រឿងឧបភោគបរិភោគ និងទៀនចំណាំវស្សារួចមក ក្រុមប្រតិភូសង្ឃ និងពុទ្ឋបរិស័ទ ក៏បានឧទ្ទិសកុសលផលបុណ្យ ជូនដល់បុព្វការីជន សាច់សារលោកហិត កម្មាភិបាល យុទ្ធជន យុទ្ធនារី ដែលបានពលី មរណៈ ក្នុងបុព្វហេតុរំដោះនិងការពារជាតិមាតុភូមិកម្ពុជាគ្រប់សម័យកាល ញ៉ាំងឱ្យដំណើរការអភិវឌ្ឍន៍ប្រទេសជាតិ មានវឌ្ឃនភាពសំបូររុងរឿង ទទួលបានសិទ្ឋសេរីភាពនិងសន្តិសុខពេញពេញលេញតាំងពីបាតដៃទទេររហូតទទួលបានជីវភាពធូធារនិងរីកចម្រើន៌តឈប់ឈរមកដល់ពេលនេះ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
