ដើម្បីលើកកម្ពស់ការសិក្សារៀនសូត្រ និងការបង្រៀននៅតាមបណ្ដាក្រុងស្រុក នៅទូទាំងប្រទេស ថ្នាក់ដឹកនាំក្រសួងអប់រំ យុវជន និងកីឡា នាំយកសម្ភារបរិក្ខារ សម្រាប់រដ្ឋបាលសាលារៀនប្រគល់ជូនដល់ គ្រឹះស្ថានសិក្សា របស់រដ្ឋចំនួន២២ ក្នុងស្រុកស្រីស្នំ ខេត្តសៀមរាប។
មានវត្តមាន ក្នុងបរិវេណវិទ្យាល័យ ២៨ មករា ស្រុកស្រីស្នំ ខេត្តសៀមរាប នៅព្រឹកថ្ងៃទី១៣ ខែសីហា ឆ្នាំ២០១៨ ឯកឧត្តម ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា និងជាប្រធានក្រុមការងារថ្នាក់ជាតិ ចុះជួយស្រុកស្រីស្នំ បានមានប្រសាសន៍ថា សម្ភារបរិក្ខារផ្នែករដ្ឋបាលសាលារៀននៅពេលនេះរួមមាន ម៉ាស៊ីនថតចម្លងចំនួន០៤ គ្រឿង ម៉ាស៊ីនព្រីនធ័រចំនួន១៥ គ្រឿង និងកំព្យូទ័រចំនួន១៧ គ្រឿង សម្រាប់ជួយសម្រួលដល់ការសិក្សារៀនសូត្រ និងការបង្រៀនរបស់លោកគ្រូអ្នកគ្រូ ក្នុងស្រុកស្រីស្នំ។
ឯកឧត្តម ស៊ាន បូរ៉ាត បានលើកឡើងថា៖ វិស័យអប់រំ ជាវិស័យអាទិភាពចំបង ក្នុងការស្ថាបនាជាតិ ក៏ដូចជាសម្រាប់ការរស់នៅក្នុងសង្គម ប្រកបទៅដោយសុខសន្តិភាព ស្ថេរភាពនយោបាយ និងធ្វើឲ្យសេដ្ឋកិច្ចសង្គមរីកចម្រើនជាដើម។ បច្ចុប្បន្ន រាជរដ្ឋាភិបាលអាណត្តិទី៥ ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានដាក់ចេញនូវយុទ្ធសាស្រ្តចតុកោណដំណាក់កាលទី៣ ដែលផ្តោតទៅលើការអភិវឌ្ឍន៍ចំនួន៤ ជាអទិភាព គឺកត្តាមនុស្ស ទឹក ផ្លូវ និងភ្លើង។ល។
ឯកឧត្តម បានបន្ថែមថា ដូច្នេះការអប់រំ និងចំណេះដឹងទូទៅ ជាយុទ្ធសាស្ត្រសម្រាប់ជួយទ្រទ្រង់ខឿនសេដ្ឋកិច្ចជាតិ ដែលនឹងធ្វើឲ្យប្រទេសនីមួយៗ មានការផ្លាស់ប្តូរ រីកចំរើនយ៉ាងឆាប់រហ័សផងដែរ។ ជាមួយគ្នានេះ ក្រសួងកំពុងអនុវត្តកម្មវិធីជំនាន់ថ្មីៗ បន្ថែមទៀត ដែលបានផ្តល់គុណភាពអប់រំ កាន់តែល្អប្រសើរជាងមុន ដល់សិស្សានុសិស្សក្នុងការប្រកួតប្រជែងនៅក្មុងតំបន់ក៏ដូចជាក្នុងសាកលលោក។
ឯកឧត្តម បានបញ្ជាក់ថា៖ ដើម្បីឲ្យវិស័យអប់រំនៅទូទាំងប្រទេសមានការរីកចម្រើន រាជរដ្ឋភិបាល បានកំពុងដំឡើងប្រាក់បៀរវត្សជារៀងរាល់ឆ្នាំ ជូនដល់លោកគ្រូអ្នកគ្រូ ទន្ទឹមនឹងនេះគ្រឹះស្ថានសិក្សាទាំងអស់របស់រដ្ឋត្រូវពង្រឹង និងពង្រីកសមត្ថភាពវិជ្ជាជីវ:របស់ខ្លួន ក្នុងនោះបច្ចេកវិទ្យាព័ត៌មានវិទ្យា គឺជាជំនាញមួយ មិនអាចខ្វះបានសម្រាប់ការអភិវឌ្ឍន៍អង្គភាព ស្ថាប័ន ហើយវាក៏ជាចំណេះដឹងដ៏សំខាន់ ក្នុងការចែករំលែកដល់សិក្សានុសិស្សរបស់យើងផងដែរ។
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
