យ៉ាងហោចភូមិចំនួន៣ នៃស្រុកបន្ទាយស្រី ខេត្តសៀមរាប ក្នុងនោះមាន ភូមិតានី ភូមិថ្នល់ ក្នុងឃុំរុនតាឯក និង ភូមិត្បែង ក្នុងឃុំត្បែង ត្រូវបានលិចជាអន្លើៗ ដោយសារភ្លៀងធ្លាក់ខ្លំាង ហូរធ្លាក់មកពីលើភ្នំគូលែន ក្នុងខេត្តសៀមរាប កាលពីយប់ថ្ងៃទី០៨ ខែសីហាម្សិលមិញនេះ។
លោក ណុប វុធ្ធី អភិបាលស្រុកបន្ទាយស្រីខេត្តសៀមរាប បានបញ្ជាក់ថា មូលហេតុដែលបណ្ដាលឲ្យកើតមានជំនន់ទឹកភ្លៀងនេះ បណ្តាលឱ្យលិចផ្លូវមួយចំនួន និងផ្ទះរបស់អ្នកភូមិជាអន្លើៗនេះ ដោយតែប្រព័ន្ធលូរហូរឆ្លងកាត់ផ្លូវ៦៧ មានការកកស្ទះ ដែលធ្វើឱ្យទឹកភ្លៀង មិនអាចហូរឆ្លងកាត់ទៅម្ខាងទៀត មិនរួចក៍បណ្តាលឱ្យលិចផ្ទះអ្នកភូមិតែម្តង។ ចំពោះជំនន់ទឹកភ្លៀងនេះ បណ្តាលឱ្យលិចផ្លូវមួយចំនួន និងផ្ទះរបស់អ្នកភូមិ ហើយបញ្ហានេះអាជ្ញាធរបានកំពុងតែជួយដោះស្រាយ ដោយមិនទុកឲ្យជំនន់ទឹកភ្លៀងនេះកកស្ទះបានយូរឡើយ ដោយអាជ្ញាធរសង្ឃឹមថាទឹកនឹងស្រកអស់ទៅវិញនៅល្ងាចថ្ងៃទី០៩ខែសីហានេះ។
នៅព្រឹកថ្ងៃទី០៩ខែសីហានេះ លោក នួន គ្រឹះស្នា ប្រធានមន្ទីរធនធានទឹក និងឧតុនិយមខេត្តសៀមរាប បានឲ្យទូរទស្សន៍ជាតិខេត្តសៀមរាបដឹងថា សម្រាប់ស្ថានភាពទឹកនៅទូទាំងខេត្តសៀមរាមិនមានបញ្ហានោះទេ រហូតមកដល់ព្រឹកថ្ងៃទី០៩ខែសីហានេះ កម្ពស់ទឹកស្ទឹងស្រែងស្ថិតនៅកម្រិត ៣,០៥ម៉ែត្រ កម្ពស់ទឹកត្រូវប្រកាសអាសន្ន មានកម្រិត ៨,០០ម៉ែត្រ កម្ពស់ទឹកស្ទឹងសៀមរាបស្ថិតនៅកម្រិត ១,៨៥ ម៉ែត្រ កម្ពស់ទឹកត្រូវប្រកាសអាសន្ន មានកម្រិត ៨,៥០ម៉ែត្រ និងកម្ពស់ទឹកស្ទឹងជីក្រែងស្ថិតនៅកម្រិត ០,៥០ម៉ែត្រ កម្ពស់ទឹកត្រូវប្រកាសអាសន្ន មានកម្រិត ៨,៥០ម៉ែត្រ ។ ទោះជាយ៉ាងណាក៏ដោយ អាជ្ញាធរគ្រប់លំដាប់ថ្នាក់ បានត្រៀមជានិច្ច ក្នុងការតាមដានអំពីស្ថានភាពទឹកនេះ ប្រសិនបើមានករណីទឹកជំនន់ អាជ្ញាធរនឹងចុះទៅកាន់មូលដ្ឋាន ដើម្បីជួយសង្រ្គោះប្រជាពលរដ្ឋឲ្យបានទាន់ពេលវេលា៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
