នៅសាលាខេត្តសៀមរាប ថ្ងៃទី៥ ខែមករា ឆ្នាំ២០២៤ សមាគមក្រុមប្រឹក្សាថ្នាក់មូលដ្ឋានខេត្តសៀមរាប បានបើកកិច្ចប្រជុំ លើកទី៥ អាណត្តិទី៣ ក្នុងគោលបំណង ពិនិត្យមើលវឌ្ឍនភាព នៃការអនុវត្តសកម្មភាពរបស់សមាគមសម្រាប់ឆ្នាំ២០២៣ និងពិនិត្យលើការអនុវត្ត ចំណូល ចំណាយប្រចាំឆ្នាំ ដើម្បីធ្វើការឆ្លុះបញ្ចាំងជាមួយ ផែនការ សកម្មភាព ថវិកាឆ្នាំ២០២៣ ព្រមទាំងលើកទិសដៅសកម្មភាពការងារ និងថវិកាឆ្នាំ២០២៤។
កិច្ចប្រជុំអញ្ជើញជាអធិបតីពីសំណាក់ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប លោក សុខ ថុល អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលខេត្តសៀមរាប និង ឯកឧត្តម សយ កុសល ប្រធានសម្ព័ន្ធភាពជាតិក្រុមប្រឹក្សាថ្នាក់មូលដ្ឋាន ព្រមទាំងមានការចូលរួមពីសមាជិក សមាជិកាក្រុមប្រឹក្សាសមាគម ក្រុមប្រឹក្សាថ្នាក់មូលដ្ឋានក្នុងខេត្តនិងតំណាងមន្ទីរជុំវិញខេត្ត ដៃគូអភិវឌ្ឍន៍ សង្គមស៊ីវិលសរុបចំនួន ១៥០រូប។
ថ្លែងបើកកិច្ចប្រជុំនេះ ឯកឧត្តម អ៊ាន ឃុន លើកឡើងថា៖ កិច្ចប្រជុំប្រចាំឆ្នាំនេះ ជាសក្ខីភាព ឆ្លុះបញ្ចាំងពីការអនុវត្ត យ៉ាងត្រឹមត្រូវនូវលក្ខន្តិកៈរបស់សមាគម ដែលជា “នីតិបុគ្គល” តំណាងឱ្យសំឡេង និង ជាអ្នកការពារផលប្រយោជន៍រួមរបស់ក្រុមប្រឹក្សាក្រុង ស្រុក និងឃុំ សង្កាត់ទាំងអស់ ក្នុងខេត្តសៀមរាប ព្រមទាំងជាអ្នក អភិវឌ្ឍសមត្ថភាព និងបង្កើនប្រសិទ្ធភាពនៃការផ្តល់សេវាសាធារណៈ ដែលនឹងរួមចំណែកលើកកម្ពស់គុណភាពនៃជីវភាពរស់នៅ និងសុខុមាលភាពរបស់ប្រជាពលរដ្ឋ តាមរយៈអភិបាលកិច្ចតាមបែបប្រជាធិបតេយ្យនៅមូលដ្ឋាន។
ឯកឧត្តម ប្រធានក្រុមប្រឹក្សាខេត្ត បន្ថែមថា ក្នុងទស្សនវិស័យនេះ រាជរដ្ឋាភិបាល តាមរយៈក្រសួងមហាផ្ទៃ បានសម្របសម្រួល និងគាំទ្រទាំងស្រុងចំពោះគំនិតផ្តួចផ្តើមបង្កើតឱ្យមាន “សមាគម ក្រុមប្រឹក្សា ឃុំ សង្កាត់នៅតាមរាជធានី ខេត្ត” និង “សម្ព័ន្ធភាពជាតិក្រុមប្រឹក្សាឃុំ សង្កាត់” នៅឆ្នាំ២០០៦ ដែលជាតំណាងឱ្យសំឡេងរបស់ក្រុមប្រឹក្សាឃុំ សង្កាត់នៅទូទាំងប្រទេស។
ឯកឧត្តម ប្រធានក្រុមប្រឹក្សាខេត្ត ក៏បានថ្លែងកោតសរសើរ និងវាយតម្លៃខ្ពស់ចំពោះការខិតខំប្រឹងប្រែង និងការសាមគ្គីគ្នារបស់ថ្នាក់ដឹកនាំសមាគមក្រុមប្រឹក្សាថ្នាក់មូលដ្ឋានខេត្តសៀមរាប តាំងពីឆ្នាំទី១រហូតដល់ ឆ្នាំទី៥ នៃអាណត្តិទី៣ ដែលជាឆ្នាំចុងក្រោយនៃអណត្តិរបស់ខ្លួន និងនាំមកនូវសមិទ្ធផលចំបងៗជូនដល់សមាជិកក្រុមប្រឹក្សាក្រុង ស្រុក ឃុំ សង្កាត់ ស្របគោលបំណង និងទិសដៅរបស់សមាគម ក្នុងការលើកកម្ពស់ឋានៈ និងសមត្ថភាពរបស់ក្រុមប្រឹក្សាក្រុងស្រុក ឃុំសង្កាត់។
គួររំលឹកថា ក្រុមប្រឹក្សារាជធានី ខេត្ត ក្រុង ស្រុក ខណ្ឌ ត្រូវបានបង្កើតឡើងនៅឆ្នាំ២០០៩។ តាមរយៈមហាសន្និបាតលើកទី១ នាថ្ងៃទី២៧-២៨ ខែមីនា ឆ្នាំ២០១៣ សមាគមអាជ្ញាធរមូលដ្ឋានចំនួនពីរត្រូវបានបង្កើតឡើងនៅថ្នាក់ជាតិ គឺសមាគមជាតិក្រុមប្រឹក្សារាជធានី ខេត្ត ជាតំណាងសម្លេងរបស់ក្រុមប្រឹក្សារាជធានី ខេត្តនៅទូទាំងប្រទេស និងសម្ព័ន្ធភាពជាតិឃុំ សង្កាត់។ នៅថ្ងៃទី៣០-៣១ ខែកក្កដា ឆ្នាំ២០១៤ មហាសន្និបាតត្រូវបានរៀបចំឡើង ដោយបញ្ចូលក្រុមប្រឹក្សាក្រុង ស្រុក ខណ្ឌ បង្កើតជា “សម្ព័ន្ធភាពជាតិសមាគមក្រុមប្រឹក្សាក្រុង ស្រុក ខណ្ឌ ឃុំ សង្កាត់ នៃព្រះរាជាណាចក្រកម្ពុជា” និងត្រូវបានហៅកាត់ថា “សម្ព័ន្ធភាពជាតិក្រុមប្រឹក្សាថ្នាក់មូលដ្ឋាន”។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
