នាព្រឹកថ្ងៃទី៨ ខែមករា ឆ្នាំ២០២៣នេះ នៅសាលាខេត្តសៀមរាប បានបើកកិច្ចប្រជុំពិភាក្សានៃក្រុមសម្របសម្រួលវិស័យសន្តិសុខស្បៀង និងអាហាររូបត្ថម្ភក្នុងខេត្តសៀមរាប ដឹកនាំដោយលោក ចឹក គឹមជុន នាយករងរដ្ឋបាលសាលាខេត្ត ដោយមានការចូលរួមពីសំណាក់លោក លោកស្រី ជាថ្នាក់ដឹកនាំមន្ទីរ អង្គភាពពាក់ព័ន្ធនានាក្នុងខេត្តជាច្រើនរូប ។
លោក ចឹក គឹមជុន បានលើកឡើងថា វិស័យសន្តិសុខស្បៀង និងអាហាររូបត្ថម្ភ ជាបញ្ហាអន្តរវិស័យតម្រូវឱ្យមានកិច្ចសហការល្អ ការសម្របសម្រួល ការអន្តរាគមន៍ និងការវិនិយោគក្នុងវិស័យកសិកម្ម សុខាភិបាល អប់រំ ទឹកស្អាត និងអនាម័យ ឧស្សាហកម្ម ពាណិជ្ជកម្ម ការគ្រប់គ្រងធនធានទឹក គាំពារសង្គម យេនឌ័រ បរិស្ថាន និងវិស័យពាក់ព័ន្ឋនានា ចូលរួមយ៉ាងល្អ ដើម្បីចូលរួមដោះស្រាយរាល់បញ្ហាដែលប្រឈម បើទោះបីបច្ចុប្បន្ននេះមិនមានបញ្ហាលើវិស័យសន្តិសុខស្បៀង និងអាហាររូបត្ថម្ភក៏ដោយ ក៏យើងត្រូវបម្រុងជាមុន ដើម្បីគ្រប់គ្រងស្ថានការបានល្អ ដែលតម្រូវឱ្យមន្ទីរដែលពាក់ព័ន្ធទាំងអស់ ត្រូវធ្វើរបាយការណ៍ប្រចាំឆ្នាំ២០២៣ និងយកមកពិភាក្សាបន្ត ធ្វើជាគោល ក្នុងការយកមកធ្វើគម្រោងផែនការ និងអនុវត្តបន្តក្នុងឆ្នាំ២០២៤ ។
លោកបានបន្តថា កិច្ចប្រជុំនៅថ្ងៃនេះ គឺដើម្បីប្រមូលធាតុចូលសំខាន់ៗ ដែលមន្ទីរ អង្គភាព និង អង្គការដៃគូ ពិនិត្យមើលវឌ្ឍនភាពការងារដែលបានអនុវត្តក្នុងឆ្នាំ២០២៣កន្លងមក និង រៀបចំជាផែនការសម្រាប់អនុវត្តបន្តនៅឆ្នាំខាងមុខទៀត ប៉ុន្តែត្រូវពិនិត្យ ពិចារណាឲ្យបានល្អិតល្អន់លើលទ្ធផលការងារសម្រេចបានកន្លងមក ថាតើដំណើរការប្រដោយភាពរលូន ឬមួយក៏មានឧបសគ្គ ឬក៏មានបញ្ហាប្រឈមកើតមានឡើងក្នុងអំឡុងពេលដែលកំពុងអនុវត្ត បើទោះបីជាយើងបានដោះស្រាយរួចរាល់ហើយក៏ដោយ ក៏យើងត្រូវដាក់ចូលក្នុងផែនការការងារសម្រាប់អនុវត្តបន្តដែរ ដើម្បីកុំឲ្យកើតមានចំពោះការអនុវត្តនៅឆ្នាំក្រោយៗទៀត ពិសេសដើម្បីបង្កភាពងាយស្រួលក្នុងការវាយតម្លៃ និងលើទិសដៅបន្តឲ្យមានភាពជាក់លាក់។
លោក ចឹក គឹមជុន បន្តទៀតថា ការយល់ដឹងពីសារៈសំខាន់ នៃវិស័យសន្តិសុខស្បៀង និងអាហារូបត្ថម្ភ គឺជាមូលដ្ឋានគ្រឺះសម្រាប់អភិវឌ្ឍមូលធនមនុស្ស សេដ្ឋកិច្ច និងសង្គមជាតិ ហេតុនេះយើងត្រូវបង្កើនចំណេះដឹង ដល់សមាជិកក្រុមដឹកនាំសម្របសម្រួលវិស័យសន្តិសុខស្បៀង និងអាហារូបត្ថម្ភ ឱ្យយល់ដឹងពីសារៈសំខាន់ និងលើកស្ទួយវិស័យនេះសម្រាប់ការអភិវឌ្ឍនៅមូលដ្ឋាន និងជំរុញឱ្យពួកគាត់ចេះវិភាគ និងចាត់ជាបញ្ហាអាទិភាព ព្រមទាំងបញ្ជ្រាបការងារនៃវិស័យនេះទៅក្នុងដំណើរការកសាងផែនការ ពិសេសទៅទៀត គឺផ្សព្វផ្សាយពីបញ្ហានានា ឱ្យប្រជាពលរដ្ឋបានយល់ដឹងពីហានិភ័យផ្សេងៗ ដូច្នេះតាមរយៈកិច្ចប្រជុំនេះ មន្ទីរ អង្គភាពពាក់ព័ន្ធទាំងអស់ នឹងរៀបចំផែនការសកម្មភាពអនុវត្តសម្រាប់ក្រោយ កាន់តែបានល្អប្រសើរ ដើម្បីជួយអន្តរាគមន៍ដល់តម្រូវការរបស់ប្រជាពលរដ្ឋ ទាំងដោយផ្ទាល់ និង ដោយប្រយោល កាន់តែមានប្រសិទ្ធភាពខ្ពស់ ៕
អត្ថបទ និងរូបភាព៖ លោក ហាំ ម៉េងហួត
កែសម្រួល៖ លោក លីវ សាន្ត
