កាលពីរសៀលថ្ងៃទី៦ ខែមករា ឆ្នាំ២០២៤កន្លងទៅនេះ ឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហមកម្ពុជាខេត្ត បានចាត់ឯកឧត្តម គុជ លីណា អនុប្រធានគណៈកម្មាធិការសាខាកាកបាទក្រហមខេត្ត ព្រមទាំងសហការី នាំយកអំណោយប្រគល់ជូនបងប្អូនប្រជាពលរដ្ឋចំនួន ៣គ្រួសារដែលរងគ្រោះដោយសារអគ្គិភ័យ ស្ថិតនៅចំនុចភូមិទី៤ សង្កាត់ចុងឃ្នៀស ក្រុង និងខេត្តសៀមរាប។
បើតាមរបាយការណ៍របស់ លោក នួន ពុទ្ធារ៉ា ប្រធានអនុសាខាកាកបាទក្រហមកម្ពុជាក្រុងសៀមរាប បានឲ្យដឹងថា កាលពីវេលាម៉ោង១៦ និង១០នាទី រសៀលថ្ងៃទី០៦ ខែមករា ឆ្នាំ២០២៤ ស្ថិតនៅចំនុចភូមិទី៤ សង្កាត់ចុងឃ្នៀស ក្រុង និងខេត្តសៀមរាប មានករណីអគ្គិភ័យកើតឡើងបានបំផ្លិចបំផ្លាញផ្ទះប្រជាពលរដ្ឋ អស់ទាំងស្រុងចំនួន៣ខ្នង ដោយសារទុស្សេខ្សែភ្លើង។ គ្រួសាររងគ្រោះទាំង ៣គ្រួសារមាន៖ ឈ្មោះ សាយ គឹមសួរ, ឈ្មោះ ឡូយ ហុក គ្រួសារទាំងពីររស់នៅភូមិទី៤ សង្កាត់ចុងឃ្នៀស និងគ្រួសារឈ្មោះ ហួត លី រស់នៅភូមិទី៣ សង្កាត់ចុងឃ្នៀស ក្រុងសៀមរាប។
ឯកឧត្តម គុជ លីណា អនុប្រធានគណៈកម្មាធិការសាខា បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏ដូចជាឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហមកម្ពុជាខេត្ត ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬ និន្នាការនយោបាយណាមួយឡើយ ដូចដែលលើកឡើងថា «កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោល»។
ក្នុងឱកាសនោះឯកឧត្តម ក៏បានសម្តែងនូវការសោកស្តាយ ចំពោះការខូចខាតលំនៅដ្ឋានរបស់បងប្អូន ដោយគ្រោះអគ្គិភ័យ ម៉្យាងទៀតកាកបាទក្រហមកម្ពុជា ក៏មិនទុកឲ្យបងប្អូនរងគ្រោះណាម្នាក់ ហើយមិនបានយកចិត្តទុកដាក់ពីអាជ្ញាធរមូលដ្ឋាននោះទេ គឺកាកបាទក្រហមនៅគ្រប់ទីកន្លែង ជាមួយបងប្អូនគ្រប់វិនាទី មិនទុកឲ្យរងទុក្ខវេទនានោះឡើយ។ ចំពោះអំណោយទាំងនេះ គឺបានជួយសម្រួលនូវទុក្ខលំបាករបស់បងប្អូនបានមួយរយៈ ព្រមទាំងបានលើកទឹកចិត្តដល់ប្រជាពលរដ្ឋ និងត្រូវមានការប្រុងប្រយ័ត្នជានិច្ចនារដូវប្រាំងនេះ ចំពោះគ្រោះអគ្គិភ័យ និង គ្រោះធម្មជាតិ ដែលកើតមានឡើងគ្រប់ពេល និងនៅពេលចាកចេញពីលំនៅដ្ឋានសូមផ្តាច់ចរន្តអគ្គិសនីប្រើប្រាស់ និងមើលភ្លើងផ្សែងជុំវិញផ្ទះ ព្រមទាំងធ្វើការអប់រំកូនចៅឲ្យជៀសឆ្ងាយពីគ្រឿងញៀន និងប្រុងប្រយ័ត្ន ខ្ពស់ចំពោះគ្រោះថ្នាក់ចរាចរណ៍ និងត្រូវគោរពច្បាប់ចរាចរណ៍ និងសូមបងប្អូនកុំបាក់ទឹកចិត្តខិតខំបង្កបង្កើនផល និងដាំដំណាំរួមផ្សំសម្រាប់ទ្រទ្រង់ជីវភាពប្រចាំថ្ងៃ និងបង្កើនសេដ្ឋកិច្ចគ្រួសារឲ្យកាន់តែប្រសើឡើងវិញ ។
ចំពោះអំណោយមនុស្សធម៌ដែលសាខាខេត្ត និង អនុសាខាបានផ្ដល់ជូនក្នុងមួយគ្រួសារៗរួមមាន៖ អង្ករ ,មី , ទឹកត្រី, ទឹកស៊ីអ៉ីវ , មុង ,ភួយ សារុង ,ក្រម៉ា ,កន្ទេល , ចាន ,ឆ្នាំង ,ស្លាបព្រា ,កំសៀវ , ស័ង្កសី និងថវិកាសរុប ១លាន ៥០ម៉ឺនរៀល។
អត្ថបទ និងរូបភាព៖ សាខាកាកបាទក្រហមខេត្ត
កែសម្រួល៖ លោក លីវ សាន្ត
