នៅព្រឹកថ្ងៃទី០៨ខែមករាឆ្នាំ២០២៤នេះ ព្រះវិភត្តិមុនីញាណ ហ៊ាក់ គឹមហ៊ត់ វិសារទោ ចៅអធិការវត្តអារញ្ញសាគរស្ថិតក្នុងក្រុងសៀមរាប ខេត្តសៀមរាប បាននាំយកសម្ភារៈនិងស្បៀងអាហារសង្គ្រោះបន្ទាន់ជូនគ្រួសាររងគ្រោះដោយសារអគ្គិភ័យនៅភ្នំក្រោម ចំនួន០៣គ្រួសារ ដែលក្នុងមួយគ្រួសារទទួលបាន ប្រឡុង១ឈុត , អង្គរ៥០គីឡូក្រាម, មី១កេស, ទឹកត្រី១យួ, ទឹកស៊ីអ៊ីវ១យួរ, ទឹកសុទ្ធ១កេស , ទឹកក្រូច១កេស , មុង ភួយ កន្ទេល ខ្នើយ កង្ហារ ចានបាយ ចានសម្លចំនួន២០ចាន ស្លាព្រាចំនួន១០ កែវចំនួន១ឡូ និងថវិកាចំនួន២០ម៉ឺនរៀល។
មានសង្ឃដីកាក្នុងឱកាសនោះ ព្រះតេជព្រះគុណ ហ៊ាក់ គឹមហ៊ត់ បានសម្តែងនូវការសោកស្តាយចំពោះគ្រោះថ្នាក់ដោយសារអគ្គិភ័យ បណ្តាឱ្យខូចខាតបាត់បង់ទ្រព្យសម្បត្តិដែលខំរកនិងសន្សំទុកជាយូរមកហើយ ដោយព្រះអង្គចាត់ទុកថានេះជាគ្រោះថ្នាក់ជាយថាហេតុ ដែលពុំមាននរណាចង់ឱ្យកើតមាននោះទេ ពាក្យចាស់ពោលផ្តាំហើយថា ស៊ូលិចទូកកុំតែភ្លើងឆេះផ្ទះ ហេតុនេះសូមផ្តាំផ្ញើដល់បងប្អូនប្រជាពលរដ្ឋទាំងអស់ រដូវប្រាំងរាំងហួតឈាមមកដល់ហើយ ចូរប្រុងប្រយ័ត្ន ការពារជាប់ជាប្រចាំនូវបញ្ហាអគ្គិភ័យ ពិសេសត្រូវត្រួតពិនិត្យឱ្យច្បាស់នូវភ្លើងចង្ក្រាន្ត ភ្លើងធូប និង ភ្លើងទៀន ដោយត្រូវពន្លត់ឱ្យអស់មុននឹងចាកចេញពីផ្ទះ ។
ព្រះតេជគុណ ហ៊ាក់ គឹមហ៊ត់ មានថេរដីកាបន្តថា៖ថវិកា សម្ភារៈមួយចំនួនតូច យកមកផ្តល់ជូននេះ គឺជាការចែករំលែកជួយគ្នាក្នុងគ្រាលំបាកទៅតាមលទ្ឋភាពដែលព្រះសង្ឃមាន ហើយជារឿយៗ ក្នុងនាមព្រះចៅអធិការវត្តអារញ្ញនេះ តែងតែបានចូលរួមក្នុងសកម្មភាពសង្គមជាច្រើន តាមរយៈសន្សំសំចៃ បែងចែកទុកដាក់នូវទេយ្យទានដែលទទួលបានពីការប្រគេនរបស់ញាតិញោម សម្រាប់ជួយទំនុកបំរុង ឧបត្ថម្ភដល់គ្រួសារប្រជាពលរដ្ឋណាខ្វះខាតជួបការលំបាកក្នុងជីវភាព និងមួយផ្នែកសម្រាប់ជួយការងារសង្គម ដែលនេះជាសង្គហៈសង្គ្រោះ ជួយដល់ញាតិញោមក្នុងគ្រាលំបាកខ្វះខាត។
គួររម្លឹកថា៖កាលពីល្ងាចថ្ងៃទី០៦ ខែមករា ឆ្នាំ២០២៤ មានករណីអគ្គិភ័យកើតឡើង បានឆេះផ្ទះប្រជាពលរដ្ឋដែលសង់ អំពីឈើអស់ទាំងស្រុង ចំនួន៣ខ្នង ដោយមូលហេតុទុស្សេខ្សែភ្លើង ស្ថិតនៅចំនុចភូមិទី៤ សង្កាត់ចុងឃ្នៀស ក្រុង សៀមរាប តែមិនបណ្តាលឱ្យគ្រោះថ្នាក់ដល់អាយុជីវិតមនុស្សឡើយ៕
អត្ថបទ និងរូបភាព៖ លោក យូ វង្ស
កែសម្រួល៖ លោក លីវ សាន្ត
