ថ្នាក់ដឹកនាំលាសា រួមនឹងលោកគ្រូអ្នកគ្រូ សិស្សានុសិស្សនៃវិទ្យាល័យសម្តេចឪ ក្រុងសៀមរាប និងមាតាបិតាអាណាព្យាបាលសិស្ស នៅថ្ងៃចុងសប្ដាហ៍កន្លងទៅនេះ បានរៀបចំពិធីអភិសេធរូបសំណាកចំនួន៣អង្គរ រួមមាន៖ ព្រះអង្គសូរ្យវរ្ម័នទី២ ព្រះបាទជ័យវរ្ម័នទី៧ និងព្រះនាងឥន្ទ្រទេវី និងរៀបចំរាប់បាត្រព្រះសង្ឃ ៧០អង្គ ដើមី្បឧទិ្ទសបុណ្យកុសលជូនដល់បុព្វបុរស និងអ្នកសេ្នហាជាតិ ដែលបានពលីជីវិតក្នុងបុព្វហេតុរំដោះជាតិមាតុភូមិ ពីបនប្រល័យពូជសាសន៍ ប៉ុល ពត នាថ្ងៃ ៧មករា ១៩៧៩ និងអបអរសាទរខួបលើកទី៤៥ នៃទិវាជ័យជម្នះ ៧មករា ១៩៧៩-៧មករា ២០២៤ ។
បើតាមលោកបណ្ឌិត ឈិន តៃឈាង នាយកវិទ្យាល័យសម្តេចឪ បានឲ្យដឹងថា ការរៀបចំដាក់តាំងរូបសំណាកទាំង ៣ព្រះអង្គ នាពេលនេះ គឺដើម្បីជាការក្រើនរំលឹកដល់ស្មារតីសិស្សានុសិស្សគ្រប់រូប បានយល់បានស្គាល់ អំពីតម្លៃនៃវប្បធម៌ជាតិ សំខាន់ចំពោះពីស្នាដៃរបស់បុព្វបុរសដូនតាខ្មែរយើង។ ព្រះអង្គទាំងបីនេះ ហើយបានធ្វើឲ្យប្រទេសកម្ពុជា នាសម័យអង្គរមានភាពរុងរឿង។ ពិសេសព្រះនាងឥន្ទ្រទេវី ទ្រង់ជម្រុញវិស័យសិល្បៈ អក្សរសាស្រ្ត វប្បធម៌ជាតិ ឲ្យមានសន្ទុះរីកចម្រើនជឿនលឿនយ៉ាងខ្លាំងក្លា។ ដោយសារចំណេះដឹងដ៏ខ្ពង់ខ្ពស់ និងចរិយាល្អឥតខ្ចោះ ព្រះនាងឥន្ទ្រទេវី បានក្លាយជានារី ម្នាក់ដែលមានតម្លៃជាអមតៈគួរឲ្យកោតស្ងប់ស្ងែងយ៉ាងក្រៃលែង។
លោកបណ្ឌិត ឈិន តៃឈាង មានប្រសាសន៍ថា ស្របជាមួយនឹងនឹងពិធិអភិសេធនៅថ្ងៃនេះដែរ ក៏មានការនិមន្តព្រះសង្ឃ ដើមី្បប្រោះព្រហ្មសុំពរជ័យឆ្នាំថ្មី ក៏ជាការរំលឹកនូវគុណថ្ងៃជ័យជម្នះ ៧មករា ដែលជាជីវិតទី២ របស់យើងគ្រប់គ្នា និងរាប់បាត្រដើម្បីឧទ្ទិសមគ្គផល កុសលផលបុណ្យជូនដល់វិញ្ញាណក្ខ័ន្ធ វីរៈភាពកម្មាភិបាល យុទ្ធជនយុទ្ធនារី ដែលបានលះបង់ អាយុជីវិត ក្នុងការសង្គ្រោះជាតិនិងប្រជាជន ឲ្យរួចផុតពីរបបប្រល័យពូជសាសន៍ ប៉ុល ពត និង អ្នកសេ្នហាជាតិគ្រប់ជំនាន់ ដែលបានពលីជីវិតក្នុងបុព្វហេតុរំដោះជាតិ កសាងការពារជាតិមាតុភូមិ ដើមី្បភាពសុខសាន្តដល់ប្រជាពលរដ្ឋកម្ពុជាទាំងមូល។
លោកបន្តថា ដោយគុណថ្ងៃជ័យជម្នះ ៧មករានេះហើយ ធ្វើឲ្យប្រទេសកម្ពុជាយើងមានសុខសន្តិភាពពេញលេញ ក្រោមកិច្ចដឹកនាំរបស់សម្តេចតេជោ ហ៊ុន សែន កំពូលស្ថាបនិក បិតាសន្តិភាព ក៏ដូចសម្តេចធិបតី ហ៊ុន ម៉ាណែត នាយករដ្ឋមន្ត្រី នៃនីតិកាលទី៧ បានយកចិត្តទុកដាក់ខ្ពស់ ក្នុងវិស័យបណ្តុះបណ្តាលធនធានមនុស្សនៅកម្ពុជា ឲ្យមានការរីកចម្រើនទាំងពេលបច្ចុប្បន្ន និងទៅអនាគត៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
