នៅថ្ងៃទី០៥ ខែមករា ឆ្នាំ២០២៤នេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សហការជាមួយគណៈកម្មាធិការទទួលបន្ទុកសេដ្ឋកិច្ចនិងសង្គម កិច្ចសម្រាប់អាស៊ីនិងប៉ាស៊ីហ្វិក របស់អង្គការសហប្រជាជាតិ ដែលហៅកាត់ថាUNESCAP បានរៀបចំសិក្ខាសាលាស្តីពីការប្រើប្រាស់សេវាក្រោមដំបូលតែមួយសម្រាប់សហគ្រិនស្ត្រី” នៅសណ្ឋាគារអមតៈ ក្នុងក្រុងសៀមរាប ក្រោមអធិបតីភាព ឯកឧត្តម ឈា ឡាយហ៊ី ទីប្រឹក្សាក្រសួង និងជាប្រធាននាយកដ្ឋានសហគ្រាសធុនតូច និងមធ្យម និងសិប្បកម្ម នៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដែលមានសិក្ខាកាមចូលរួមចំនួន៣៥នាក់ មកពីមន្ទីរអង្គភាពពាក់ព័ន្ឋ សមាគមសហគ្រិនស្ត្រីនៅកម្ពុជាខេត្តសៀមរាប សមាគមសហគ្រិនវ័យក្មេងកម្ពុជាប្រចាំខេត្ត សម្ព័ន្ឋសមាគមសហគ្រាសធុនតូចនិងមធ្យមកម្ពុជាប្រចាំខេត្ត និង ម្ចាស់សហគ្រាសជាស្ត្រី ។
ឯកឧត្តម ឈា ឡាយហ៊ី មានប្រសាសន៍ថា៖ ស្រ្តីជាឆ្អឹងខ្នងក្នុងការជួយជំរុញអភិវឌ្ឍន៍សេដ្ឋកិច្ចជាតិ ដែលជានិច្ចកាល ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រោមការដឹកនាំប្រកបដោយចក្ខុវិស័យ វែងឆ្ងាយរបស់ឯកឧត្តមដ្ឋមន្ត្រី ហែម វណ្ណឌី តែងតែគាំទ្រលើកទឹកចិត្តដល់សហគ្រាសធុនតូច និងមធ្យម និង សហការជាមួយដៃគូអភិវឌ្ឍន៍ទាំងថ្នាក់ជាតិ និងអន្តរជាតិ ដើម្បីជួយផ្ដល់ការគាំទ្រទាំងថវិកា និងបច្ចេកទេសសម្រាប់ ជំរុញសហគ្រាសធុនតូច និងមធ្យម ក្នុងគោលដៅពង្រឹងសមត្ថភាពដល់សហគ្រិន ជាពិសេស សហគ្រិនជាស្ត្រី តាមការអនុវត្តន៍គោលនយោបាយ ផែនការយុទ្ធសាស្ត្ររបស់រាជរដ្ឋាភិបាល សំដៅជំរុញអភិវឌ្ឍន៍ សហគ្រាសធុនតូចនិងមធ្យម តាមផែនការសកម្មភាព និងវិធីសាស្ត្ររបស់ខ្លួន ពិសេសក្រោយដំណាក់កាលជម្ងឺ រាតត្បាត កូវីដ-១៩ ។
ឯកឧត្តមបន្តថា ៖ ក្នុងទស្សនៈវិស័យដ៏វែងឆ្ងាយ នៃការអនុវត្តយុទ្ធសាស្ត្របញ្ចកោណដំណាក់កាលទី១ នីតិកាលទី៧ នៃ រដ្ឋសភារាជរដ្ឋាភិបាលកម្ពុជា ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើកំណែទម្រង់អភិបាលកិច្ចល្អ តាមបែបប្រជាធិបតេយ្យដ៏ទូលំទូលាយ និងស៊ីជម្រៅ នៅរដ្ឋបាលថ្នាក់ក្រោមជាតិ ហើយរាជរដ្ឋាភិបាលបានគាំទ្រ និងជ្រុំជ្រែងយ៉ាងពេញទំហឹងទាំងផ្នែកច្បាប់ និងលិខិតបទដ្ឋានពាក់ព័ន្ធជាច្រើន ពិសេសគឺការពង្រឹងការគ្រប់គ្រងរោងចក្រ និងសិប្បកម្ម ដើម្បីគាំទ្រដល់វិស័យឯកជន លើការផលិតផលិតផលឲ្យមានគុណភាព សុវត្ថិភាព និងអនុលោមតាមស្តង់ដារ ត្រឹមត្រូវតាមលក្ខខ័ណ្ឌតម្រូវនៃច្បាប់ ក៏ដូចជាការលើកស្ទួយកិត្យានុភាព និងមោទនភាពអំពីផលិតផលរបស់ជាតិយើង។
ឯកឧត្តម បន្តទៀតថា ចំពោះការអភិវឌ្ឍសេដ្ឋកិច្ចជាតិ និងសង្គម រាជរដ្ឋាភិបាលកម្ពុជា បានដាក់ចេញនូវវិធានការកែទម្រង់ មុតស្រួចជាបន្តបន្ទាប់ ដើម្បីកែលម្អបរិយាកាសធុរកិច្ច និងការវិនិយោគនៅកម្ពុជា ដែលក្នុងន័យនេះ រាជរដ្ឋាភិបាល បាននឹងកំពុងលើកកម្ពស់ការធ្វើឌីជីថលូបនីយកម្ម ទាំងក្នុងវិស័យផលិតកម្ម, ឧស្សាហកម្ម, សេវាកម្ម ពាណិជ្ជ កម្ម និងរដ្ឋាភិបាលឌីជីថល (Digital Government) និងបានដាក់ចេញនូវក្របខណ្ឌគោលនយោបាយសេដ្ឋកិច្ច និងសង្គមឌីជីថល ដែលជាមានវិធានការមុតស្រួច ដើម្បីជំរុញកំណើនសេដ្ឋកិច្ចជាតិ ដូចជា ការដាក់ឱ្យអនុវត្តន៍នូវថ្នាលចុះបញ្ជីពាណិជ្ជកម្មតាម ប្រព័ន្ធអេឡិចត្រូនិក ដោយចំណាយពេលខ្លី ក្នុងការបើកក្រុមហ៊ុនអាជីវកម្ម ជាដើម។
សូមជំរាបថា៖ គោលបំណងសំខាន់នៃសិក្ខាសាលានេះ គឺ ៖ ១- ផ្សព្វផ្សាយអំពីគោលការណ៍ណែនាំលើការចុះបញ្ជីក្រោមដំបូលតែមួយដល់ភាគីពាក់ព័ន្ធសំខាន់ៗ រួមទាំងសហគ្រិនស្ត្រី និងអ្នកបង្កើតគោលនយោបាយ , ២- ផ្សព្វផ្សាយអំពីអត្ថប្រយោជន៍ និងនីតិវិធីនៃការចុះបញ្ជីអាជីវកម្មតាមផ្ទាលបច្ចេកវិទ្យាព័ត៌មានរបស់ក្រសួងឧស្សាហកម្មវិទ្យាសាស្ត្រ បច្ចេកវិទ្យា និងនវានុវត្តន៍ និងទី៣- ដើម្បីប្រមូលធាតុចូលនានា ពិសេសបញ្ហាប្រឈមរបស់សហគ្រិនស្រ្តីលើការផលិត និងការចូលទីផ្សារ ហើយលទ្ធផលពីសិក្ខាសាលាពិគ្រោះយោបល់នេះ និងបន្ទាប់ពីគៀងគរធាតុចូលបន្ថែមរួចរាល់ហើយ គោលការណ៍ណែនាំនេះត្រូវបានកសាងឡើង និងពិនិត្យចប់សព្វគ្រប់ក្នុងការបោះពុម្ព និងចុះផ្សព្វផ្សាយ ព្រមទាំងត្រៀមដាក់អនុវត្តយ៉ាងទូលំទូលាយទៅដល់គ្រប់ស្ថាប័ន និងដៃគូភាគីពាក់ព័ន្ធទាំងអស់ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
