ទីតាំងចាក់សំរាមមួយកន្លែងស្ថិតនៅក្រោយវត្តប្រាសាទបន្ទាយស្រី ក្នុងឃុំដំដែក ស្រុកសូទ្រនិគម ខេត្តសៀមរាប បានធ្វើឲ្យប៉ះពាល់ដល់ការរស់នៅ និងសុខភាពប្រជាពលរដ្ឋក្នុងភូមិចំនួន៣ រួមមានភូមិស្រែធ្នង ភូមិបន្ទាយស្រី និងភូមិដំដែកលើ ក្នុងឃុំដំដែកនេះ រយៈប្រមាណ៣ឆ្នាំមកហើយ។
បើតាមការឲ្យដឹងពី លោក ផាន់ សាយ មេឃុំដំដែក បានឲ្យដឹងថា សំរាមដែលយកមកចាក់ និងដុតកំទេចនៅទីតាំងនេះ គឺដឹកយកមកពីផ្សារដំដែក ក្នុងស្រុកសូទ្រនិគម ដោយក្រុមហ៊ុនឯកជនមួយ ជួលដោយប្រធានភាស៊ីផ្សារដំដែក។
លោកផាន់ សាយបានបន្តថា កន្លងមកនៅពេលឡានសំរាមដឹកសំរាមមកចាក់ នៅពុំមានរណ្ដៅត្រឹមត្រូវទេ ក្រោយមកគេក៏បានរៀបចំជីកជារណ្ដៅដើម្បីចាក់សំរាមដុត ហើយនៅពេលយកមកចាក់ និងដុត វាបានបង្កជាក្លិនមិនល្អដល់ប្រជាពលរដ្ឋ ដែលរស់នៅក្បែទីតាំងនោះ។
ជាការបញ្ជាក់បន្ថែម លោកមេឃុំ បានឲ្យដឹងទៀតថា រណ្ដៅដែលគេយកសំរាមមកចាក់នេះ មានចំនួន៤ ទៅ៥រណ្ដៅដែលមានទំហំ៥ម៉ែតការ៉េ រីឯប្រជាពលរដ្ឋបីភូមិ ដែលជួបផលប៉ះពាល់ ប្រហែលតែ៥០% នៃចំនួនប្រជាពលរដ្ឋសរុប៥៩៦គ្រួរសារ ពាក់ព័ន្ធបញ្ហានេះ ក្រោយពីប្រជាពលរដ្ឋសំណូមពរមកលោក លោកបានរាយការណ៍ ទៅកាន់គណៈអភិបាលស្រុក ដើម្បីធ្វើការដោះស្រាយរួចរាល់ហើយ។
អ្នកស្រី លី រស់នៅក្នុងឃុំដំដែក ក្បែទីតាំងចាក់សំរាមនេះ បាននិយាយថា ក្លិនសំរាមបានប៉ះពាល់ខ្លាំងដល់សុខភាពមនុស្សតូចធំ នៅពេលក្លិនស្អុយជះមកម្ដងៗ គ្រួសារអ្នកស្រីមិនអានទទួលអាហារបានទេ។
ប្រជាពលរដ្ឋរស់នៅក្នុងមូលដ្ឋាននេះដែរ លោក អ៊ុម ធឿន បានលើកឡើងថា ពួកគាត់បានតែត្រឹមរាយការណ៍ ហើយអាជ្ញាធរបានត្រឹមតែនិយាយដោះស្រាយ តែមិនឃើញមានសកម្មអ្វីសោះ។
លោក ម៉ក់ ប្រុស អភិបាលស្រុកសូទ្រនិគម បានមានប្រសាសន៍ថា កន្លងមកលោកក៏បានចុះទៅពិនិត្យទីតាំងចាក់សំរាមនេះហើយ អ្វីដែលជាសំណូមពររបស់ប្រជាពលរដ្ឋ លោកបានចាត់ចែងនិងទំនាក់ទំនងទៅកាន់ភាគីពាក់ព័ន្ធហើយ ដើម្បីទៅរៀបចំទីលានចាក់សំរាមរបស់ពួកគាត់ ប៉ុន្តែពេលខ្លះម្ចាស់ផ្សារពុំបានចូលរួមដោយផ្ទាល់នោះទេ ពេលខ្លះឲ្យកូនរបស់ខ្លួនមកជំនួស។
លោក អភិបាលស្រុកសូទ្រនិគម បានបន្តទៀតថា ជាវិធានការណ៍បន្តទៀត លោកបានសម្របសម្រួលជាមួយម្ចាស់ផ្សារ ដើម្បីកាត់បន្ថយផលប៉ះពាល់ដល់បងប្អូនប្រជាពលរដ្ឋដែលរស់នៅក្បែរទីតាំងចាក់សំរាមនេះ ទន្ទឹមនឹងនោះ បច្ចុប្បន្នលោកក៏បាននិងកំពុងធ្វើការទំនាក់ទំនងមកខាងមន្ទីរបរិស្ថានខេត្ត ដើម្បីរៀបចំប្រជុំចុះពិនិត្យស្ថានភាពជាក់ស្ដែងនៃកាចោលសំរាមក្នុងផ្សារ នឹងទីតាំងចាក់សំរាមរបស់ម្ចាស់ផ្សារ ថាតើត្រូវរៀបចំរបៀបណា។
លោកអភិបាលស្រុក ក៏បានសំណូមពរផងដែរ ដល់ប្រជាពលរដ្ឋ សូមទុកពេលវេលា ឲ្យខាងរដ្ឋបាលស្រុក ដើម្បីស្វែងដោះស្រាយ ព្រោះបញ្ហា មិនអាចធ្វើដោះស្រាយក្នុងរយៈពេលភ្លាមៗបានទេ ព្រោះការរកទីតាំងចាក់សំរាមថ្មីមានការលំបាក ម្យ៉ាងទៀតទីនោះវាគឺជាទីតាំងរបស់ឯកជន។
បើតាមការឲ្យដឹងពី លោក ណម គឹមអ៊ន អនុប្រធានការិយាល័យគាំពារបរិស្ថាន នៃមន្ទីរបរិស្ថានខេត្តសៀមរាប បាននិយាយថា ក្រសួងបរិស្ថាន បានសម្រេចផ្ដល់ឡដុតសំរាមតាមបែបបច្ចេកទេសចំនួនមួយ សម្រាប់ស្រុកសូទ្រនិគម ប៉ុន្តែមន្ទីរកំពុងទំនាក់ទំនងជាមួយគណៈអភិបាលស្រុកសូទ្រនិគម ដើម្បីស្វែងរកទីតាំងសាងសង់ ហើយទីតាំងដែលកំពុងសិក្សាបឋមគឺនៅក្នុងឃុំកំពង់ឃ្លាំង។
គួររំលឹកថាកាលពីឆ្នាំ ២០១៥ កន្លងទៅ ក្រសួងបរិស្ថាន រួមសហការជាមួយ ក្រសួងសេដ្ឋកិច្ច និងហិរញ្ញវត្ថុ និងក្រសួងមហាផ្ទៃ បានសម្រេចបង្កើតកញ្ចប់ថវិកាសេវាអនាម័យបរិស្ថាន និងទម្លាក់កញ្ចប់ថវិកាប្រមាណ ៥ពាន់លានរៀល ជូនទៅរដ្ឋបាលក្រុងស្រុកនៅទូទាំងប្រទេស សម្រាប់ឲ្យអាជ្ញាធរទាំងនោះអនុវត្តមុខងារគ្រប់គ្រងសំរាមសំណល់រឹង សំណល់រាវ សម្រាប់នៅទីប្រជុំជន។
អត្ថបទ និង រូបថត ៖ លោក ធន់ ពូថេ
កែសម្រួលអត្ថបទ ៖ លោក សេង ផល្លី
