សិស្សានុសិស្សមានជីវភាពខ្វះខាតចំនួន ២០០នាក់ មកពីបណ្ដាក្រុងស្រុកមួយចំនួន ក្នុងខេត្តសៀមរាប នៅព្រឹកថ្ងៃទី១៩ ខែមករា ឆ្នាំ២០២៤ បានទទួលកង់ ម្នាក់មួយគ្រឿង និងសម្ភារៈសិក្សាម្នាក់មួយឈុត ពីមូនិធិពិភពលោកដ៏ស្រស់ត្រកាល តាមរយៈអង្គការឡុតទុសវើល (Lotus World) សហការជាមួយ អាជ្ញាធរខេត្តសៀមរាប និងអង្គការដៃគូ ស្ថិតក្នុងភូមិជ័យ សង្កាត់ទឹកវិល ក្រុងសៀមរាប ខេត្តសៀម។
លោក ស៊ីន យ៉ុនសប់ នាយកប្រចាំប្រទេសនៃអង្គការមជ្ឈមណ្ឌលកុមារឡូតធឹសវើល (IOSB) បានឲ្យដឹងថា ចាប់ពីខែធ្នូ ឆ្នាំ២០២៣ ដល់ខែមករា ឆ្នាំ២០២៤ អង្គការបានសហការជាមួយមន្ទីរសង្កមកិច្ចអតីតយុទ្ធជន និងយុវនិតិសម្បទាខេត្តសៀមរាប មន្ទីរការងារនិងបណ្តុះបណ្តាលវិជ្ជាជីវៈខេត្តសៀមរាប តាមរយៈនាយកសាលាផ្សេៗ ជ្រើសបានកុមារចំនួន ១០០នាក់ និងបណ្តាអង្គការដៃគូរបានកុមារចំនួន ៤០នាក់ ព្រមទាំងកុមារក្រីក្រដែលស្ថិតក្នុងគម្រោងរបស់អង្គការផ្ទាល់ និងកុមារក្រីក្រតាមសហគន៍ផ្សេងៗបានចំនួន ៦០នាក់។ ដូចនេះកុមារចំនួន២០០នាក់ ត្រូវបានជ្រើសរើសដើម្បីប្រគល់កង់ និងសម្ភារៈសិក្សា ជូននាពេលនេះ។
មានសង្ឃដីកាក្នុងឱកាសនោះ ព្រះតេជគុណ ឆង់ យ៉ ប្រធានមូលនិធិពិភពលោកដ៏ស្រស់ត្រកាល បានបង្ហាញក្ដីសង្ឃឹមថា ការជួយជាកង់ថ្ងៃនេះ និងជួយសម្រួលការធ្វើដំណើរ ចំពោះសិស្សដែលរស់នៅឆ្ងាយពីសាលារៀន ដើម្បីបំពេញក្ដីសង្ឃឹមនិងបង្កើតក្ដីសុបិន្តរបស់ពួកគេ។ ព្រះតេជគុណសង្ឃឹមថាសិស្សានុសិស្សនិងគោរពស្តាប់ដំបូន្មានលោកគ្រូអ្នកគ្រូ ឪពុកម្តាយ អាណាព្យាបាល ខិតខំសិក្សារៀនសូត្រដើមី្បឲ្យក្លាយជាធនធានមនុស្សដ៏សំខាន់របស់ប្រទេសជាតិ សម្រាប់ថ្ងៃអនាគត់។
លោក សុខ ថុល អភិបាលរងខេត្តសៀមរាប បានថ្លែងអំណរគុណចំពោះសប្បុរស់ជន និងប្រជាជនកូរ៉េទាំងអស់ តាមរយៈអង្គការ Lotus World ដែលជានិច្ចកាលបានលះបង់នូវកម្លាំងកាយចិត្ត និងធនធានថវិកាផ្ទាល់ខ្លួន ដើម្បី ធ្វើសកម្មភាពមនុស្សធម៌ជូនចំពោះប្រជាជនកម្ពុជា ក្នុងការផ្តល់ឱកាសឲ្យសិស្សស្នាក់នៅក្នុងមណ្ឌលព្រមទាំងផ្ដល់ឱកាសទទួលបានការអប់រំទាំងក្នុងប្រព័ន្ធ និងក្រៅប្រព័ន្ធ ផ្តល់ប្រាក់ឧបត្ថម្ភ គ្រឿងឧបភោគ បរិភោគ និងសម្ភារសិក្សា សាងសង់អគារសិក្សា បណ្ណាល័យ បង្គន់អនាម័យ អាងស្តុបទឹក អណ្តូងស្នប់ ការរួមចំណែកលើផ្នែកសុខាភិបាល សាងសង់លំនៅដ្ឋានសមរម្យសម្រាប់ប្រជាជនក្នុងខេត្ត និងការផ្តល់មធ្យោបាយធ្វើដំណើរដល់សិស្សមានជីវភាពខ្វះខាត។
សូមជម្រាបថាក្នុងរយះពេល៨ឆ្នាំ ចាប់ពីឆ្នាំ២០១៦មក មូលនិធីពិភពលោក ដ៏ស្រស់ត្រកាល របស់ ព្រះតេជគុណ ឆង់ យ៉ បានចែកកង់ចំនួន ២.១៥០គ្រឿង និងផ្ទះ៣ខ្នង ជូនដល់សិក្សានុសិស្ស និងប្រជាពលរដ្ឋមានជីវភាពខ្វះខាតក្នុងខេត្តសៀមរាប៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
