កង់ចំនួន ១.១៧១គ្រឿង ជាអំណោយរបស់អង្គការឡូតារីក្លឹប សិនតូសាសាំងហ្គាពូរ និងអង្គការសុបិន្តសហគមន៍កម្ពុជា ត្រូវបានចែកជូនដល់សិស្សានុសិស្សមកពីតាមបណ្ដាសាលាបឋមសិក្សា និងអនុវិទ្យាល័យមួយចំនួន ក្នុងក្រុងស្រុកចំនួន១២ នៃខេត្ដសៀមរាប ដែលការចែកនេះធ្វើឡើងនៅក្នុងសាលាគរុកោសល្យ និងវិក្រិត្យការខេត្ដសៀមរាប នៅព្រឹកថ្ងៃទី១៩ ខែមករា ឆ្នាំ២០២៤នេះ។
លោក យុន លីនណេ អភិបាលរងខេត្ដសៀមរាប មានប្រសាសន៍ថា កិច្ចខិតខំប្រឹងប្រែងគ្រប់អ្នកពាក់ព័ន្ធទាំងអស់ សមស្របតាមគោលនយោបាយយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ ក្នុងអាទិភាពគន្លឹះទាំង៥ ក្នុងបញ្ចកោណទី១ លើការអភិវឌ្ឍមូលធនមនុស្ស ដែលរួមមាន៖ការពង្រឹងគុណភាពវិស័យអប់រំ កីឡា វិទ្យាសាស្ត្រ និងបច្ចេកវិទ្យា ការបណ្តុះបណ្តាលជំនាញបច្ចេកទេស ការលើកកម្ពស់សុខភាព និងសុខមាលភាពប្រជាជន ការពង្រឹងការគាំពារសង្គម និងប្រព័ន្ធស្បៀង ការពង្រឹងភាពជាពលរដ្ឋក្នុងសង្គម ដែលមានអារ្យធម៌ខ្ពស់ ប្រកបដោយសីលធម៌ សមធម៌ និងបរិយាបន្ន។
គឺពិតជាបានមកពីពលិកម្មដ៏ធំធេង ទាំងកម្លាំងកាយចិត្ត ប្រាជ្ញា ស្មារតី និងធនធានសម្ភារៈ ថវិការបស់សង្គមទាំងមូល ពិសេសគំនិតផ្តួចផ្តើម គំរូដឹកនាំរបស់ថ្នាក់ដឹកនាំមន្ទីរ និងអាជ្ញាធរដែនដីគ្រប់លំដាប់ថ្នាក់។
លោកអភិបាលរងខេត្ដ មានប្រសាសន៍បន្ដថា សមិទ្ធផលរបស់វិស័យអប់រំ នឹងរួមចំណែកយ៉ាងធំធេង ដើម្បីជោគជ័យនៃការអនុវត្តនូវគោលនយោបាយរបស់រាជរដ្ឋាភិបាលក្នុងការស្តារ និងអភិវឌ្ឍសង្គម-សេដ្ឋកិច្ច ជាពិសេសគឺការកាត់បន្ថយភាពក្រីក្រ និងការលើកកម្ពស់សុខុមាលភាពរបស់ ប្រជាពលរដ្ឋយើងឱ្យកាន់តែប្រសើរឡើងជាលំដាប់។ ជាក់ស្តែងពិធីចែកកង់ជូនដល់សិស្សជួបការលំបាកចំនួន១.១៧១នាក់ ក្នុងខេត្តសៀមរាបនាពែលនេះ ពិតជាបានបញ្ជាក់នូវការយកចិត្តទុកដាក់ ក្នុងការជំរុញកុមារ យុវជនឲ្យចូលសាលារៀន និងបានផ្តល់ឱកាសដល់សិស្សានុសិស្ស ដែលកំពុងជួបការលំបាក មានលទ្ធភាពក្នុងការមករៀន បានទាន់ពេលវេលា។ ក្នុងនាមអាជ្ញាធរខេត្ត លោកសូមថ្លែងអរគុណដល់ក្រុមអង្គការ ឡូតារិក្លឹបសិនតូសាសិងហ្កាពួរ(សិង្ហបូរី) អង្គការសុបិន្តសហគមន៍កម្ពុជា ដែលបានផ្តល់កង់ និងរៀបចំឲ្យមានពិធីចែកកង់នៅពេលនេះ។
តំណាងអង្គការសុបិន្តសហគមន៍ប្រចាំនៅកម្ពុជា និងតំណាងអង្គការរ៉ូតារីក្លឹបសិនតូសាសាំងហ្គាពូរ បានសម្តែងនូវភាពត្រេកអរដែលបានជួបជាមួយប្អូនសិស្សានុសិស្សមកពីទីជិតឆ្ងាយ ទៅទទួលយកកង់ម្នាក់មួយគ្រឿង។ អំណោយមនុស្សធម៌ បានជូនដល់សិស្សក្រីក្រនៅកម្ពុជានេះ គឺចែករំលែកមនុស្សធម៌ជាមួយរាជរដ្ឋាភិបាលកម្ពុជា ក្នុងការបណ្តុះបណ្តាលធនធានមនុស្សនៅតាមបណ្ដាស្រុក ក្រុងទាំង១២ ក្នុងខេត្ដសៀមរាប ដើម្បីឲ្យសិស្សានុសិស្សទៅសិក្សាទាន់ពេលវេលា និងក្លាយជាសិស្សពូកែគ្រប់ៗគ្នា ព្រមទាំងលើកទឹកចិត្ដឱ្យពួកគាត់ឧស្សាហ៍ព្យាយាមសិក្សាស្វែងយល់រាល់កិច្ចការទៅតាមកម្មវិធីសិក្សា និងស្តាប់ការពន្យល់របស់គ្រូ និងមានភាពក្លាហានក្នុងការសិក្សាផងដែរ។ ក្រុមអង្គការមនុស្សធម៌នៅតែបន្តជួយដល់សិស្សក្រីក្រនៅកម្ពុជា ទៅតាមលទ្ធភាព៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
