ផ្លូវបេតុងមួយខ្សែ មានប្រវែងជាង ១.៦០០ម៉ែត្រ ស្ថិតក្នុងសង្កាត់ស្លក្រាម ក្រុងសៀមរាប ត្រូវបានរៀបចំពិធីក្រុងពាលីបើកការដ្ឋានសាងសង់ជាផ្លូវការ នោព្រឹកថ្ងៃទី១៩ ខែមករា ឆ្នាំ២០២៤នេះ ក្រោមអធិបតីភាព ឯកឧត្តម ញ៉ែម វ៉ាលី រដ្ឋលេខាធិការក្រសួងធម្មការ និងសាសនា និងលោក ពិន ប្រាកដ អភិបាលរងខេត្ត រួមនឹងវត្តមានប្រធានអនុព័ន្ធយោធារៀតណាមប្រចាំកម្ពុជា ថ្នាក់ដឹកនាំខេត្ត មន្ទីរអង្គភាព អាជ្ញាធរមូលដ្ឋាន និងប្រជាពលរដ្ឋជាច្រើនរូប។
លោក ខៀវ សត ចៅសង្កាត់ស្លក្រាម ក្រុងសៀមរាប បានឲ្យដឹងថា ផ្លូវមួយខ្សែនេះ មានប្រវែងជាង ១.៦០០ម៉ែត្រ ចាប់ពីចំនុចផ្លូវសម្ដេចវិបុលបញ្ញា សុខ អាន (ផ្លូវ៦០ម៉ែត្រ) ចូលទៅកាន់ស្តូប និងជុំវិញស្តូបមិត្តភាពកម្ពុជា-វៀតណាម និងចេញពីស្តូបចូលទៅក្នុងភូមិ ស្ថិតក្នុងភូមិដូនប៉ា សង្កាត់ស្លរក្រាម ក្រុងសៀមរាប។ ផ្លូវបេតុងដែលបានបើកការដ្ឋានស្ថាបនានាពេលនេះ បន្ទាប់ពីសាងសង់រួច ផ្លូវនេះក៏នឹងក្លាយទៅជាផ្លូវមួយដែលមានសក្តានុពលសម្រាប់បម្រើឲ្យសេចក្តីត្រូវការចាំបាច់របស់ប្រជាពលរដ្ឋ មានភាពងាយស្រួលក្នុងការធ្វើចរាចរណ៍ឆ្លងកាត់។ ជាពិសេសនៅពេលផ្លូវនេះរួចរាល់ ទីតាំងស្តូបមិត្តភាពកម្ពុជា-វៀតណាម ក៏នឹងក្លាយជាកន្លែងសម្រាប់អ្នកទេសចរ ក៏ដូងជាពលរដ្ឋសម្រាប់មកកំសាន្ត និងហាត់ប្រាណផងដែរ។
លោកចោសង្កាត់បន្តថា សមិទ្ធផលថ្មីយើងទទួលបានជាបន្ដបន្ទាប់នេះ កើតឡើងក្រោមដំបូលសន្តិភាព ស្ថិរភាពនយោបាយ ក្រោមការដឹកនាំប្រកបដោយសម្តេចតេជោ ហ៊ុន សែន អតីតនាយករដ្ឋមន្ត្រី និងសម្ដេចធិបតី ហ៊ុន ម៉ាណែត នាយករដ្ឋមន្ត្រីបច្ចុប្បន្ន ដែលធ្វើឲ្យយើងមានឱកាសគ្រប់គ្រាន់ ក្នុងការអភិវឌ្ឍមូលដ្ឋាន ក៏ដូចជាសេដ្ឋកិច្ចគ្រួសាររបស់យើងទាំងអស់គ្នា ឲ្យកាន់តែមានជីវភាពធូរធារសម្បូរសប្បាយ។ លោកក៏បានសូមឲ្យប្រជាពលរដ្ឋដែឡធ្វើដំណើរឆ្លងកាត់ផ្លូវនេះ ចូលរួមថែរក្សាផ្លូវ និងបរិស្ថាន ឲ្យបានល្អ ដើម្បីឲ្យយើងបានប្រើប្រាស់បានយូរអង្វែង៕
អត្ថបទ និងរូបភាព៖ លោក អ៊ុន ណារាជ្យ
