កុំព្យូទ័រចំនួន១៥គ្រឿង កង់៥០គ្រឿង រួមនឹងសម្ភារសិក្សា និងកីឡាមួយចំនួនទៀត ដែលជាអំណោយរបស់អង្គការរ៉ូតារីក្លឹប សិនតូសាសាំងហ្គាពួរ និងអង្គការសុបិន្តសហគមន៍កម្ពុជា ត្រូវបានចែកជូនដល់សាលា និងសិស្សក្រីក្រដែលកំពុងសិក្សានៅក្នុងអនុវិទ្យាល័យដូនកែវ ឃុំដូនកែវ ស្រុកពួក ខេត្តសៀមរាប នៅរសៀលថ្ងៃទី១៨ ខែមករា ឆ្នាំ២០២៤នេះ។
លោកស្រី សៀន សាអែម នាយិការអនុវិទ្យាល័យដូនកែវ បានឲ្យដឹងថា អនុវិទ្យាល័យដូនកែវ មានគ្រូបង្រៀន ២១នាក់ ស្រី១៤នាក់ និង មានសិស្សសរុប ៥៣៣នាក់ ស្រី៣០៦នាក់ ក្នុងនោះសិស្សថ្នាក់ទី៧ មាន ២០៧នាក់ ស្រី១១២នាក់ ថ្នាក់ទី៨ មាន១៧៩នាក់ ស្រី១០៣នាក់ និង សិស្សថ្នាក់ទី៩ មាន ១៤៧នាក់ស្រី៩១នាក់ ។
លោកស្រី ជេនី លីប៉ា ប្រធានអង្គការសុបិន្តសហគមន៍ប្រចាំនៅកម្ពុជា បានសម្តែងនូវភាពត្រេកអរ ដែលបានជួបជាមួយសិស្សានុសិស្ស ក្នុងការទទួលស្វាគមន៍ប្រកបដោយភាពរាក់ទាក់សុភាពរាបសា ដែលធ្វើឲ្យប្រតិភូមិនអាចបំភ្លេចបាននូវអនុស្សាវរីយ៍របស់សិស្សអនុវិទ្យាល័យដូនកែវ កម្ពុជារស់នៅក្រោមដំបូលសុខសន្តិភាព។ អំណោយជូនដល់សិស្សក្រីក្រនៅកម្ពុជា គឺមិនខុសពីបំណងរបស់អង្គការរ៉ូតារីក្លឹបសិនតូសាសាំងហ្គាពួរឡើយ ដែលធ្វើឲ្យមានសង្ឃឹមជឿជាក់ថា បានចូលរួមជាមួយរាជរដ្ឋាភិបាលកម្ពុជា ក្នុងការបណ្តុះបណ្តាលធនធានមនុស្សនៅតាមមូលដ្ឋានដាច់ស្រយ៉ាល។
លោកស្រីក៏បានណែនាំដល់ប្អូនសិស្សានុសិស្ស ត្រូវប្រកាន់ភ្ជាប់នូវចរិកសីលធម៌ ត្រូវគោរពស្តាប់ដំបូន្មានលោកគ្រូអ្នកគ្រូ ឪពុកម្តាយ អាណាព្យាបាល ព្រមទាំងរៀមច្បង ដើមី្បឲ្យយើងក្លាយទៅជាធនធានដ៏សំខាន់របស់ប្រទេសជាតិ ជាពិសេសចូលគ្រប់គ្នាត្រូវខិតខំសិក្សារៀនសូត្រ ដែលជាទ្រព្យសម្បត្តិជាប់ខ្លួនមិនបាត់ទៅណាឡើយ។ ដើមី្បឲ្យក្លាយជាសិស្សពូកែ ចូលសិស្សគ្រប់គ្នា មានការអំណត់អត់ធន ឧស្សាហ៍ព្យាយាមសិក្សាស្វែងយល់រាល់កិច្ចការទៅតាមកម្មវិធីសិក្សា និងស្តាប់ការពន្យល់របស់គ្រូ និងមានភាពក្លាហានក្នុងការសិក្សា។ ជាមួយនេះដែរ អង្គការនឹងនៅតែបន្តជួយដល់សិស្សក្រីក្រនៅកម្ពុជា ទៅតាមលទ្ធភាពដែលអង្គការធ្វើទៅបានបន្ថែមទៀត៕
លោក ស៊ិន ចាន់ថុល អភិបាលស្រុកពួក ក្នុងនាមតំណាងឲ្យប្រជាពលរដ្ឋទូទាំងស្រុកពួក ក៏ដូចសិស្សានុសិស្សនៃអនុវិទ្យាល័យដូនកែវ បានថ្លែងអំណរគុណដល់អង្គការរ៉ូតារីក្លឹបសិនតូសាសាំងហ្គាពួរ និងអង្គការសុបិន្តសហគមន៍ប្រចាំនៅកម្ពុជា ដែលបានជួយដល់សិស្សក្រីក្រនៅតាមតំបន់ជនបទសំខាន់ក្នុងស្រុកពួក។ អំណោយកុំព្យូទ័រ កង់ទាំងនេះ ក៏ជាយានជំនឹះរបស់ក្មួយៗ សម្រាប់ធ្វើដំណើរមកសិក្សា និងបានផ្តល់នូវផលប្រយោជន៍ដល់ក្មួយៗ ក្នុងការកសាងអនាគតខ្លួនដល់ត្រើយសុភមង្គមនៃក្រុមគ្រួសារ ដោយក្មួយៗនេះហើយដែលជាសសរស្តម្ភដ៏រឹងមាំនៃធនធានមនុស្ស ក្នុងការអភិវឌ្ឍសង្គមជាតិទៅអនាគត។ លោកក៏បានសម្តែង ចំពោះទឹកចិត្តដ៏សប្បុរសធម៌របស់អង្គការ ដែលតែងយកចិត្តទុកដាក់ជាមួយរាជរដ្ឋាភិបាលកម្ពុជា ក្នុងការបណ្តុះបណ្តាលនូវធនធានមនុស្សនៅថ្នាក់មូលដ្ឋាន ដោយមានការផ្គត់ផ្គង់ជាមធ្យោបាយធ្វើដំណើរ និងសម្ភារៈសិក្សា ជូនដល់សិស្សក្រីក្រ ដែលខ្វះមធ្យោបាយធ្វើដំណើរមកសាលារៀន សំខាន់ការផ្តល់កុំព្យូទ័រដល់សាលា ដើមី្បបណ្តុះបណ្តាលសិស្សទៀតផង។
លោកក៏បានសំណូមពរដល់អង្គការ សូមឲ្យបន្តនូវប្រពៃណី នៃការគាំទ្រដល់វិស័យអប់រំនៅកម្ពុជា ក៏ដូចនៅតាមមូលដ្ឋានខេត្ត សៀមរាប ដែលមានសាលាជួបនូវការខ្វះខាតទៀតផង។ លោកក៏បានផ្តាំផ្ញើផងដែរ ដល់លោកគ្រូ អ្នកគ្រូ សិស្សានុសិស្ស ក៏ដូចជាមាតាបិតា អាណាព្យាបាល គណៈកម្មការគ្រប់គ្រងសាលា ចូលរួមថែរក្សានូវទ្រព្យសម្បត្តិក្នុងសាលា ដែលបានការបំពាក់ដោយអង្គការ ដើមី្បប្រើប្រាស់បានយូរអង្វែង និង ដើមី្បបង្កើននូវចំណេះដឹងកូនចៅរបស់ខ្លួន។ ម៉្យាងទៀត ចូលមាតាបិតា អាណាព្យាបាលសិស្សទាំងអស់ ចូលរួម តាមដាននូវការសិក្សារបស់កូនខ្លួន និង ចូលរួមអប់រំណែនាំដល់ពួកគាត់ ឲ្យជៀសឲ្យឆ្ងាយពីគ្រឿងញៀន និងត្រូវគោរពឲ្យបានជាប្រចាំ និងគ្រប់វិនាទីក្នុងពេលបើកបរ ត្រូវគោរពច្បាប់ចរាចរណ៍៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
