តាមសេចក្តីរាយការណ៍របស់នគរបាលស្រុកជីក្រែង បានឲ្យដឹងថា នៅវេលាម៉ោងប្រមាណជាង៣រសៀល ថ្ងៃទី០៩ ខែសីហា ឆ្នាំ២០១៨នេះ មានករណីគ្រោះថ្នាក់ចរាចរណ៍មួយបានកើតឡើង នៅចំណុចលើផ្លូវជាតិលេខ៦ ស្ថិតក្នុងភូមិគោកអំពិល ឃុំល្វែងឬស្សី ស្រុកជីក្រែង រវាងរថយន្តស្តែនដឹកសាំងជាមួយនឹងរថយន្តកែច្នៃដាក់ម៉ាស៊ីនកិនស្រូវចល័ត បណ្ដាលឲ្យមនុស្សម្នាក់ស្លាប់ និង ម្នាក់ទៀតបានរងរបួសធ្ងន់ ។
សេចក្តីរាយការណ៍បានបញ្ជាក់ទៀតថា មុនពេលកើតហេតុ គឺមានរថយន្តស្តែនដឹកសាំង ជារបស់ក្រុមហ៊ុន ហុងអ៊ីនខេមបូឌា ពាក់ស្លាកលេខភ្នំពេញ 3E-0279 បើកបរពីទិសដៅពីទិសខាងលិចទៅទិសខាងកើត គឺធ្វើដំណើរចេញពីខេត្តសៀមរាប ឆ្ពោះទៅរាជធានីភ្នំពេញ បើកបរក្នុងល្បឿនលឿន ហើយមិនបានប្រុងប្រយ័ត្ន លុះដល់ចំណុចកើតហេតុ បានបុករថយន្តកែច្នៃដាក់ម៉ាស៊ីនកិនស្រូវចល័ត ដែលបានបើកបរមកពីទិសខាងត្បូងឡើងមកលើផ្លូវជាតិ រួចបត់ស្ដាំទៅទិសខាងកើត បណ្ដាលឲ្យម្ចាស់រថយន្តកែច្នៃ ២នាក់ប្រពន្ធ ក្នុងនោះ ឈ្មោះ គាត គា អាយុ៤៤ភេទប្រុស ត្រូវជាប្ដី មានទីលំនៅភូមិតាអុង ឃុំល្វែងឬស្សី ស្រុកជីក្រែង បានស្លាប់នៅនឹងកន្លែងកើតហេតុ និង ឈ្មោះ ឈន ឃន់ អាយុ៤៥ឆ្នាំ ភេទស្រី ត្រូវជាប្រពន្ធ បានទទួលរងរបួសធ្ងន់ ហើយត្រូវបានដឹកសង្គ្រោះទៅពេទ្យបង្អែកសូទ្រនិគម រីឯអ្នកបើកបររថយន្តស្តែនដឹកសាំងបានរត់គេចខ្លួនបាត់ក្រោយពីហេតុ ។
ក្រោយពីកើតហេតុការណ៍នេះ សមត្ថកិច្ចបាននាំយករថយន្តទាំងពីរទៅរក្សាទុកនៅអធិការដ្ឋាននគរបាលស្រុកជីក្រែងដើម្បីដោះស្រាយទៅតាមផ្លូវច្បាប់ ហើយសពជនរងគ្រោះ ត្រូវបានប្រគល់ឲ្យក្រុមគ្រួសារយកធ្វើបុណ្យតាមប្រពៃណី៕
អត្ថបទ និង រូបថត ៖ លោក ថាច់ ពិសុទ្ធ និង លោក គឿន វេត
កែសម្រួលអត្ថបទ ៖ លោក លីវ សាន្ត
