នៅទូទាំងប្រទេសមានមន្ទីរពេទ្យកុមារចំនួន២ បានទទួលព្យាបាលកុមារដែលកើតជម្ងឺហេម៉ូហ្វីលា និងជម្ងឺឈាមកម្រ កក ហើយសម្រាប់មនុស្សពេញវ័យលើសពី១៦ឆ្នាំ ពុំមានមន្ទីពេទ្យព្យាបាលជំងឺនេះឡើយ សមាគមជំងឺហេម៉ូហ្វីលា( Haemophilia )កម្ពុជា សំណូមពរសូមឲ្យក្រសួងសុខាភិបាល បង្កើតមជ្ឈមណ្ឌលព្យាបាលជម្ងឺហេម៉ូហ្វីលា និង ជម្ងឺឈាមកម្រ កក សម្រាប់មនុស្សពេញវ័យ លើសពី១៦ឆ្នាំ !
ជំងឺហេម៉ូហ្វីលា ( Haemophilia ) គឺជាជំងឺម្យ៉ាងដែលអាចបណ្តាលឲ្យហូរឈាម ។ អ្នកជំងឺហេម៉ូហ្វីលា គឺមិនត្រឹមតែមានការហូរឈាមលឿនជាងធម្មតានោះទេ ប៉ុន្តែការហូរឈាមនេះ មានរយៈពេលយូរជាងធម្មតា ដោយសារតែឈាមរបស់អ្នកជំងឺហេម៉ូហ្វីលា មិនមានសារធាតុកត្តាឈាម កក (clotting Factor) គ្រប់គ្រាន់។
លោក សែម សុខបញ្ញា ប្រធានសមាគមជម្ងឺហេម៉ូហ្វីលាកម្ពុជា បានបង្ហាញឲ្យដឹងយ៉ាងដូច្នេះ ក្នុងពេលដែលសមាគមមួយនេះ ប្រារព្ធទិវា ជំងឺហេម៉ូហ្វីលាពិភពលោកឆ្នាំ២០១៩ លើកទី២៩ ក្រោមប្រធានបទ “ឈានមួយជំហ៊ានដំបូង ដើម្បីថែទាំសុខភាព” នាព្រឹកថ្ងៃទី១២ ខែឧសភា ឆ្នាំ២០១៩ នៅក្រុងសៀមរាប ក្រោមកិច្ចសហការជាមួយមន្ទីរពេទ្យកុមារអង្គរ ដោយភ្ជាប់ជាមួយនឹងសិក្ខាសាលាស្តីពីការព្យាបាលដោយចលនាសម្រាប់អ្នកជំងឺហេម៉ូហ្វីលា ក្រោមការរួមដោយតំណាងមកពីមន្ទីរពេទ្យកុមារជាតិ តំណាងមកពីសមាគមអ្នកព្យាបាលដោយចលនាកម្ពុជា សមាជិក សមាជិកា សមាគមជំងឺហេម៉ូហ្វីលាកម្ពុជា ក្មួយៗ បងប្អូន សាច់ញាតិអ្នកជម្ងឺផងដែរ ។
លោកបានឲ្យដឹងទៀតថា ៖ ជំងឺហេម៉ូហ្វីលា និង ជំងឺឈាមកម្រ កក មិនអាចព្យាបាលឲ្យជាសះស្បើយបានទេ អ្នកជម្ងឺត្រូវរស់នៅជាមួយជម្ងឺនេះមួយជីវិត តែអាចព្យាបាលសង្គ្រោះនៅពេលអ្នកជម្ងឺមានបញ្ហាតែប៉ុណ្ណោះ វាគឺជាជំងឺដែលមានតាំងពីកំណើតនិងតំណរពូជ ដែលកើតមកពីឪពុកម្តាយ ជាពិសេសគឺម្តាយជាអ្នកផ្ទុកជំងឺនេះមកឲ្យកូន ហើយភាគច្រើនវាកើតមានទៅលើកូនប្រុស ហើយកូនស្រីមិនមានកើតជម្ងឺនេះទេ តែជាអ្នកផ្ទុកជំងឺនេះ ចម្លងបន្តទៅឲ្យកូនបន្តទៀត ។ ជំងឺនេះធ្វើអ្នកជំងឺហើម ជាំ ទៅលើសារពាង្គកាយ ឬបង្កឲ្យមានការហូរឈាមទៅតាមសន្លាក់ ហើយអ្នកជម្ងឺមានការឈឺចាប់ខ្លាំងបំផុតនៅពេលដែលប៉ះពាល់ទង្គិចអ្វីមួយទៅលើសរីរាង្គ និង ធ្ងន់ធ្ងរបំផុតគឺមានការហូរឈាមនៅខួរក្បាល អ្នកជម្ងឺអាចទទួលពិការភាព និងបាត់បង់ជីវិត ។
បើយោងតាមរបាយការណ៍របស់សហព័ន្ធជំងឺហេម៉ូហ្វីលាពិភពលោក ក្នុងចំណោមមនុស្សមួយម៉ឺននាក់ គឺមានម្នាក់ប៉ុណ្ណោះដែលអាចកើតមកមានជំងឺនេះ ដោយមូលហេតុតំណរពូជ ៧០% និងកើតឡើងដោយឯកឯង ៣០% ។ ដោយឡែកនៅប្រទេសកម្ពុជា បើគិតតាមប្រជាសាស្ត្រដែលកម្ពុជាមានប្រជាជន១៥លាននាក់ គឺអាចមានអ្នកកើតជម្ងឺហេម៉ូហ្វីលាប្រហែលពី ២០០០ ទៅ ៣០០០នាក់ ប៉ុន្តែជាក់ស្តែង គឺមានអ្នកជំងឺនេះត្រឹមតែ១៧៤នាក់ប៉ុណ្ណោះ ដែលបានមកទទួលការថែទាំ-ព្យាបាលនិងធ្វើរោគវិនិច្ឆ័យ ក្នុងនេះនៅមន្ទីរពេទ្យកុមារជាតិ(រាជធានីភ្នំពេញ)ចំនួន៧៤នាក់ និងនៅមន្ទីរពេទ្យកុមារអង្គរ(ខេត្តសៀមរាប) ចំនួន១០៤នាក់ ។ សមាគមជម្ងឺហេម៉ូហ្វីលាកម្ពុជាសង្កេតឃើញថា អ្នកជំងឺទាំងអស់ភាគច្រើនជាក្មេងប្រុស ស្ថិតនៅក្នុងគ្រួសារក្រីក្រតាមជនបទ ក្នុងនេះអ្នកជំងឺចំនួន៥០% ត្រូវបានធ្លាក់ខ្លួនពិការ ។
បើទោះជាយ៉ាងណា លោក ផេង វ៉ាន់ អ្នកជំនាញព្យាបាលដោយចលនាមកពីមន្ទីរពេទ្យកុមារជាតិ បានឲ្យដឹងថា ការព្យាបាលដោយចលនាដល់អ្នកជម្ងឺហេម៉ូហ្វីលា និង ជម្ងឺឈាមកម្រ កក វាធ្វើឲ្យអ្នកជម្ងឺចៀសផុតពីគ្រោះថ្នាក់ពិការភាពបាន ។
លោក សែម សុខបញ្ញា បង្ហាញថា ៖ សមាគមជម្ងឺហេម៉ូហ្វីលាកម្ពុជា កំពុងមានការព្រួយបារម្ភចំពោះបញ្ហាប្រឈមមួយចំនួន ដែលបច្ចុប្បន្ននេះនៅទូទាំងប្រទេស មានវេជ្ជបណ្ឌិតតិចតួចណាស់ ដែលមានសមត្ថភាពក្នុងការព្យាបាលជំងឺនេះ ហើយក៏មានតែមន្ទីរពេទ្យកុមារចំនួនពីរប៉ុណ្ណោះទទួលព្យាបាលជម្ងឺនេះ និងមាន៣កន្លែងសម្រាប់ធ្វើរោគវិនិច្ឆ័យ ។ បញ្ហាលំបាកលើសពីនេះ គឺពុំមានមន្ទីរពេទ្យព្យាបាលអ្នកជំងឺហេម៉ូហ្វីលាដែលមានអាយុលើសពី១៦ឆ្នាំ ។ នៅក្នុងបទសម្ភាសន៍ លោក សឺមសុខបញ្ញា បានធ្វើសំណូមពរ សូមឲ្យក្រសួងសុខាភិបាល បង្កើតមជ្ឈមណ្ឌលផ្តល់សេវាសម្រាប់អ្នកជំងឺហេម៉ូហ្វីលានេះ ។
អត្ថបទ និង រូបថត ៖ លោក ងិន គឹមឡេង
