នៅព្រឹកថ្ងៃទី ១៣ ខែឧសភា ឆ្នាំ២០១៩ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោកជំទាវ ទេព រង្ស៊ី ខៀវ កាញារីទ្ធ បានអញ្ជើញ ប្រគល់អំណោយជាស្បៀងអាហារជូនបងប្អូនខ្មែរឥស្លាម ចំនួន៤៥០គ្រួសារ នៅឃុំព្រែកតានង់ ស្រុកកោះសូទិន ខេត្តកំពង់ចាម។
ឯកឧត្តម ខៀវ កាញារីទ្ធ បានមានប្រសាសន៍ក្នុងឱកាសនោះថា ទោះបីសាសនាព្រះពុទ្ធ ជាសាសនារបស់រដ្ឋ ក៏ប៉ុន្តែគោលនយោបាយសុខដុមបនីយកម្ម បានកំពុងផ្តល់សិទ្ធសេរីភាពដូចៗគ្នា ជូនដល់ប្រជាពលរដ្ឋកម្ពុជាស្របច្បាប់ ជាមួយការផ្តល់ភាពកក់ក្តៅ និង ចូលរួមដោះស្រាយរាល់ទុក្ខលំបាកដល់សាសនិកនានាទៀត ក្នុងក្របខណ្ឌនៃប្រជាជាតិតែមួយ ដែលរួមរស់រួមសុខក្នុងម្លប់សន្តិភាពតែមួយ។
ឆ្លៀតក្នុងឱកាសនោះ ឯកឧត្តមរដ្ឋមន្ត្រី ក៏បានពាំនាំដំណឹងល្អ អំពីគោលនយោបាយសុខដុមបនីយកម្មថ្មីមួយទៀត ក្នុងចំណោមគោលនយោបាយសុខដុមនីយកម្មនានាជាច្រើន ដែលសម្តេចតេជោប្រមុខរាជរដ្ឋាភិបាលកម្ពុជា បានប្រកាសកាលពីថ្ងៃទី ០៧ ខែឧសភា ឆ្នាំ២០១៩ កន្លងទៅ នៅក្នុងពិធីទទួលទានអាហារស្រាយបួសជាមួយសាសនិកឥស្លាមជិត ៥០០០នាក់ បានប្រកាសឲ្យមន្ទីរពេទ្យរដ្ឋ និងបង្អែកគ្រប់ខេត្តក្រុង ជួយសម្រួលដោះស្រាយបន្ទប់ថ្វាយបង្គំដល់សាសនិកឥស្លាម ដែលមកទទួលសេវាព្យាបាល ក៏ដូចជាបុគ្គលិកពេទ្យដែលកាន់សាសនាឥស្លាម ដែលពួកគាត់ធ្លាប់តែមានកង្វល់ នៅពេលដល់វេលាថ្វាយបង្គំ តែមិនមានបន្ទប់ត្រឹមត្រូវនៅតាមទីសាធារណៈ ជាពិសេសមន្ទីរពេទ្យ ខណៈនៅអាកាសយាន្តដ្ឋាន និងទីប្រជុំធំៗ មួយចំនួនបានដោះស្រាយរួចរាល់ជាបណ្តើរៗ។
សូមជម្រាបថា អំណោយដែលប្រគល់ជូនបងប្អូនខ្មែរឥស្លាម ចំនួន៤៥០គ្រួសារ នៅឃុំព្រែកតានង់ ស្រុកកោះសូទិន ខេត្តកំពង់ចាមនាឱកាសនោះ រួមមាន កញ្ចប់អំណោយនីមួយៗ មានអង្ករ៥០គីឡូក្រាម មី១កេះ ប្រេងឆា២លីត្រ ស្ករស ២គីឡូក្រាម មីឡូ១កំប៉ុង ទឹកដោះគោ២កំប៉ុង សាប៊ូ១កញ្ចប់ និងថ្នាំដុសធ្មេញ៤ប្រអប់។ ក្នុងនោះ ឯកឧត្តមរដ្ឋមន្ត្រីក្រសួងព័ត៌មានក៏បានផ្តល់ថវិកាសម្រាប់ដោះស្រាយចាក់ដីតារាងបាល់ទាត់ភូមិតានង់ទី៧ ចំនួន៣០០ឡានផងដែរ។
គួរបញ្ជាក់ថា អំណោយខាងលើជាការឧបត្ថម្ភពីសប្បុរសជនសាសនិកឥស្លាមនៅប្រទេសបារាំង តាមរយៈអង្គការ LiFE សហការជាមួយអង្គការមូលនិធិអភិវឌ្ឍន៍មូស្លីមកម្ពុជា និងមានការចូលរួមសហការពីថ្នាក់ដឹកនាំ ក្រុមការងាររបស់ក្រសួងព័ត៌មានផងដែរ។
អត្ថបទ និង រូបថត ៖ ក្រសួងព័ត៌មាន
