ការបោះឆ្នោតក្រុមប្រឹក្សារាជធានី/ខេត្ដ/ក្រុង/ស្រុក/ខណ្ឌ អាណត្តិទី៣ នឹងប្រព្រឹត្តទៅនៅទូទាំងប្រទេស នៅថ្ងៃទី២៦ ខែឧសភា ឆ្នាំ២០១៩នេះ ក្នុងនោះសម្រាប់ខេត្តសៀមរាប មានបេក្ខជនឈរឈ្មោះសរុបចំនួន ១៦៣៤នាក់ ស្រីចំនួន៥១៨នាក់ ។
លោក នឹម វណ្ណសំ ប្រធានគណៈកម្មការរៀបចំការបោះឆ្នោតខេត្តសៀមរាប បានបញ្ជាក់ថា បេក្ខជនទាំងអស់នេះ មកពីគណបក្សនយោបាយចំនួន ០៦គណបក្ស រួមមានគណបក្សប្រជាជនកម្ពុជា គណបក្សហ្វ៊ុនស៊ិនប៉ិច គណបក្សខ្មែររួបរួមជាតិ គណបក្សយុវជនកម្ពុជា គណបក្សសញ្ជាតិកម្ពុជា និងគបក្សឆន្ទៈខ្មែរ។
លោកបន្តថា ចំណែកឯអ្នកសង្កេតការបោះឆ្នោតមានចំនួន៥៦នាក់ ក្នុងនោះ ៤៤នាក់ មកពីបណ្ដាគបក្សនយោបាយ និងចំនួន១២នាក់ មកពីសមាគមគ្រឹះស្ថានសិក្សា។
លោក នឹម វណ្ណសំ បញ្ជាក់បន្ថែមថា យុទ្ធនាការឃោសនា សម្រាប់ការបោះឆ្នោតក្រុមប្រឹក្សារាជធានី/ខេត្ដ ក្រុង/ស្រុក/ខណ្ឌ អាណត្តិទី៣ នឹងចាប់ផ្តើមនៅថ្ងៃទី១៧ ខែឧសភាស្អែកនេះ ប៉ុន្តែគិតមកត្រឹមព្រឹកថ្ងៃទី១៦ ខែឧសភានេះ នៅមិនទាន់មានគណបក្សនយោបានណាមួយ ជូនដំណឹងពីការឃោសនាបោះឆ្នោតនៅឡើយទេ។
លោកបានអំពាវនាវ ដល់គណបក្សនយោបាយទាំងអស់ ត្រូវជូនដំណឹងមកដល់ គណៈកម្មការខេត្តរៀបចំការបោះឆ្នោត (គខប) ដើម្បីងាយស្រួលគណៈកម្មការនេះ រៀបចំទីតាំង ទៅតាមប្រតិទិននៃការឃោនាបោះឆ្នោត៕
អត្ថបទ និង រូបថត ៖ លោក ខេង ឧត្ដម
កែសម្រួលអត្ថបទ ៖ លោក សេង ផល្លី
