ក្រុមហ៊ុនកែច្នៃកសិផលកសិកម្មប្រទេសចិន មើលឃើញពីឱកាសវិនិយោគ ទៅកសិផលកសិកម្មក្នុងខេត្តសៀមរាចំនួន ៤ប្រភេទ រួមមានស្រូវ គ្រាប់ស្វាយចន្ទី ដំឡូងមី និង ស្វាយកែវរមៀត ។
ក្នុងជំនួបពិភាក្សាការងារ កាលពីថ្ងៃទី ១៦ ខែ ឧសភា ឆ្នាំ២០១៩ រវាងលោក នាក់ ណេរ៉ុន អភិបាលរងខេត្តសៀមរាប តំណាង ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប និងលោក ម៉ៃឃើល ហ្វូ នាយកក្រុមហ៊ុនកែច្នៃកសិផលកសិកម្ម នៃសាធារណរដ្ឋប្រជាមានិតចិន តាមរយៈសភាពាណិជ្ជកម្មខេត្តសៀមរាប ឧត្តរមានជ័យ ក្រុមហ៊ុនចិនមួយនេះ មានគោលបំណងចង់លើកស្ទួយវិស័យកសិកម្មកម្ពុជា សំខាន់នៅខេត្តសៀមរាប និង ការស្វែងរកនូវ ទីផ្សារកសិកម្ម ដើម្បីបង្កើនកម្រិតជីវភាពរបស់ប្រជាកសិករក្នុងខេត្ត ឲ្យបានកាន់តែល្អប្រសើរឡើង ។
ព័ត៌មានជាតិ ថ្មីៗ
លោក ស៊ឹម រ៉ាស៊ី ប្រធានស្តីទី សភាពាណិជ្ជកម្មខេត្តសៀមរាប ឧត្តរមានជ័យ បានបញ្ជាក់ថា រាល់ការកែច្នៃកសិផលកសិកម្មនេះ នឹងផ្តល់នូវផលចំណេញជាច្រើនដល់កម្ពុជា ទាំងពេលវេលា តម្លៃកសិផលនៅលើទីផ្សារសម្រាប់ប្រជាកសិករ និង បង្កើនការងារដល់ប្រជាពលរដ្ឋ នៅតាមមូលដ្ឋាន ព្រមទាំងចូលរួមកាត់បន្ថយការធ្វើចំណាកស្រុករបស់ប្រជាពលរដ្ឋកម្ពុជាទៀតផង ។
លោក ម៉ៃឃើល ហ្វូ នាយកក្រុមហ៊ុនកែច្នៃកសិផលកសិកម្មចិន បានបង្ហាញថា ដើម្បីធានាដល់ការផ្គត់ផ្គង់នូវផលិតផលកសិកម្មកែច្នៃ ទាំងទាំង៤ប្រភេទ ក្រុមហ៊ុនត្រូវផលិតយ៉ាងហោចណាស់ ចាប់ពី១លានតោនឡើងទៅ ហើយដើម្បីសម្រេចដំណើរការនេះ ក្រុមហ៊ុនត្រូវចុះធ្វើការសិក្សាស្រាវជ្រាវ អំពីទន្និន័យកសិផលកសិកម្មនៅក្នុងខេត្តមួយនេះជាមុនសិន។
លោកនាយកក្រុមហ៊ុន ក៏បានឲ្យដឹងផងដែរថា ក្រៅពីការកែច្នៃកសិផលកសិកម្ម ក្រុមហ៊ុនក៏នឹងមានគម្រោង ធ្វើការកែច្នៃសំរាម និងកាកសំណល់ ឲ្យទៅជាថាមពល និង សម្ភារៈប្រើប្រាស់ផ្សេងៗផងដែរ ។
តាមរយៈការរាយការណ៍ អំពីទន្និផល និងផ្ទៃដីបង្កបង្កើនផល ក្នុងខេត្តសៀមរាប របស់មន្ទីរជំនាញ លោក នាក់ ណេរ៉ុន បានវាយតម្លៃថា ការងារកសិកម្មនៅក្នុងខេត្តសៀមរាប នៅទទួលបានទិន្នផលទាប បញ្ហានេះដោយសារប្រជាកសិករនៅមានចំណេះដឹងផ្នែកកសិកម្មទាប កង្វះនូវប្រព័ន្ធស្រោចស្រព រួមផ្សំនឹងកត្តាអាកាសធាតុផងដែរ។
លោក អភិបាលរងខេត្ត ក៏បានធ្វើការសាទរផងដែរ ការចុះសិក្សាស្វែងយល់របស់ក្រុមហ៊ុន ក្នុងប្រទេសកម្ពុជា ជាពិសេសក្នុងខេត្តសៀមរាប ហើយនេះគឺពិតជាឱកាសមួយសម្រាប់ខេត្តសៀមរាប ប្រសិនបើមានអ្នកវិនិយោគលើការកែច្នៃផលិតផលកសិកម្ម វានឹងជួយដល់បងប្អូនប្រជាកសិករក្នុងការផលិត កសិផលកសិកម្ម មានទីផ្សារ និង មានក្តីសង្ឃឹមក្នុងការផលិតកសិកម្មទាំងនោះ ដោយមិនមានការភ័យព្រួយឡើយ ។
ទន្ទឹមនឹងនោះ លោកអភិបាលរងខេត្ត ក៏នឹងបានលើកនូវអនុសាស្ត្រ និងលើកនូវសំណូមពរមួយចំនួន ដល់អ្នកពាក់ព័ន្ធក្នុងវិស័យកសិកម្មក្នុងខេត្ត ព្រមទាំងក្រុមហ៊ុន សូមជួយការបណ្តុះបណ្តាលពីបច្ចេកទេស ការងារកសិកម្មដល់ប្រជាកសិករក្នុងការផលិតឲ្យបានត្រឹមត្រូវ ទៅតាមស្តង់ដារបស់ក្រុមហ៊ុន ក្នុងគោលដៅផ្តល់ផលប្រយោជន៍សម្រាប់យើងទាំងអស់គ្នា ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក សេង ផល្លី
