លោក គិម ប៊ុនថាន់ ប្រធានក្លឹបជិះកង់ដើម្បីសហគមន៍ បានឱ្យដឹងថា ព្រឹត្តិការណ៍សប្បុរសធម៌ជិះកង់ប្រមូលថវិកាជួយមន្ទីរពេទ្យគន្ធបុប្ផាឆ្នាំទី៦ នឹងរៀបចំនៅចុងខែឧសភាខាងមុខនេះ ខណៈដែលពីមួយឆ្នាំទៅមួយឆ្នាំ ព្រឹត្តិការណ៍នេះបានទាក់ទាញអ្នកចូលរួមជាច្រើន ក្នុងប្រទេសកម្ពុជា ហើយកម្មវិធីចុះឈ្មោះសម្រាប់ការជិះកង់នៅថ្ងៃទី២៦ ខែឧសភា ឆ្នាំ២០១៩នេះ បាន បិទបញ្ចប់ហើយ ជាមួយនឹងអ្នកចូលរួមជិត១ពាន់នាក់ ដែលអ្នកចូលរួមត្រូវបង់ថ្លៃការចុះឈ្មោះចំនួន១៥ដុល្លារអាមេរិក ដោយពួកគេទទួលបានកង់មួយ អាវយឺតមួយ រួមនឹងអាហារភេសជ្ជៈ។
លោក គិម ប៊ុនថាន់ បានឱ្យដឹងទៀតថា សម្រាប់គោលដៅក្នុងការជិះកង់នោះ ឆ្នាំនេះកម្មវិធីជិះនឹងចេញពីហាងកង់នៅអាំង គឹមសាន ជាប់ផ្លូវជាតិលេខ៦ កាត់តាមព្រលានយន្តហោះអន្តរ ជាតិសៀមរាប បន្តឆ្ពោះទៅប្រាសាទអង្គរវត្ត ហើយបន្ទាប់ មកជិះទៅកាន់សួរច្បារព្រះអង្គចេកព្រះអង្គចម ដែលជាគោលដៅនៃការបិទបញ្ចប់ព្រឹត្តិការណ៍នេះ ។
គួររម្លឹកថា ព្រឹត្តិការណ៍មនុស្សធម៌រកថវិកាជួយមន្ទីរពេទ្យគន្ធបុប្ផា បានទាក់ទាញអ្នកចូលរួមកើនពីមួយឆ្នាំទៅមួយឆ្នាំ ដោយឆ្នាំទី១ ព្រឹត្តិការណ៍នេះរកថវិកាបានជាង២ពាន់ដុល្លារ , ឆ្នាំទី២ បានជាង៧ពាន់ដុល្លារ , ឆ្នាំទី៣ បានជាងមួយម៉ឺនដុល្លារ , ឆ្នាំទី៤ ជិត២ម៉ឺនដុល្លារ និង ឆ្នាំទី៥ ជាង២ម៉ឺនដុល្លារ ហើយនៅឆ្នាំទី៦នេះ គ្រោងនឹងទទួលបានជិត៣ម៉ឺនដុល្លារ ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
