ពិធីបំបួសកុលបុត្រកុលធីតា លើកទី៩នៅខេត្តសៀមរាប មានអ្នកចូលរួមបំបួសចំនួន៤៤៩នាក់ ច្រើនជាងឆ្នាំ២០១៨ ដែលមានតែចំនួន ៤២១អង្គនាក់ប៉ុណ្ណោះ ហើយពិធីនេះចាប់ផ្ដើមពីថ្ងៃទី១៤ ដល់ថ្ងៃទី១៩ខែឧសភាឆ្នាំ២០១៩ នៅវត្តអង្គរខាងត្បូង ក្នុងក្រុងខេត្តសៀមរាប។
ពិធី បំបួសកុលបុត្រកុលធីតា រៀបចំឡើងនៅឆ្នាំ២០១៩នេះ គឺដើម្បីដាស់តឿនដល់ស្មារតីយុវជនខ្មែរ ឲ្យភ្ញាក់រលឹកលះបង់អំពើឧបាយមុខទាំងឡាយ និងជាការតបស្នង ដល់គុណមាតាបិតា អាណាព្យាបាល គ្រូបាធ្យាយ និង ព្រះមហាក្សត្រជាដើម ហើយក៏ស្របពេលនឹងពិធីរំលឹកខួប ២៦០០ឆ្នាំ នៃការត្រាស់ដឹងរបស់ព្រះសម្មាសម្ពុទ្ធ និងពិធីបុណ្យវិសាខបូជាផងដែរ។
ពិធីបំបួសរយៈពេលខ្លី ៥យប់៦ថ្ងៃនេះ (ចាប់ពីថ្ងៃទី១៤ ដល់ថ្ងៃទី១៩ខែឧសភាឆ្នាំ២០១៩) បានបង្កើតជាគណៈកម្មការរៀបចំពិធីបំបួសកុលបុត្ររយៈពេលខ្លីមួយ ដឹកនាំដោយព្រះគ្រូប្រាសាទរង្សី សាសនធរោ ឡាច លាង ព្រះអនុគណក្រុងសៀមរាប។ ក្នុងទិដ្ឋភាពពិធីកោរសក់ បួងសក់ និងគ្រោងស្បង់ជីវរនៅរសៀលថ្ងៃទី១៤ខែឧសភាឆ្នាំ២០១៩ ក៏មានធ្វើពិធីដង្ហែរជុំវិញប្រាង្គប្រាសាទអង្គរវត្ត ក្រោមព្រះអធិបតីភាព ព្រះធម្មសិរី អាភាករោ ជុំ គឹមឡេង ព្រះរាជាគណៈកិត្តិយស និងជាព្រះសុមង្គលសិលាចារ្យព្រះមេគណខេត្ត រួមនិងមន្ត្រីសង្ឃព្រមទាំងពុទ្ឋបរិស័ទជាច្រើនផងដែរ។
ព្រះគ្រូធម្មវិសុទ្ធិកោសល ឥន្ទបាលី កែវ អាន ព្រះវិន័យធរអនុគណក្រុងសៀមរាប និងជាចៅអធិការវត្តអង្គរខាងត្បូង មានថេរៈដិកា ចាត់ទុកការបំបួសកុលបុត្រ កុលធីតាខ្មែរ នាឱកាសនេះថា ជាការតបគុណដល់មាតាបិតាអាណាព្យាបាល គ្រូបាធ្យាយ និង ព្រះមហាក្សត្រព្រមទាំងថ្នាក់ដឹកនាំជាតិរបស់យុវជន និងរឹងរឹតតែជម្រុញឲ្យកុលបុត្រ កុលធីតាខ្មែរមានការភ្ញាក់រលឹក និង ធ្វើការលះបង់នូវអំពើឧបាយមុខទាំងឡាយដែលបាន ប្រព្រឹត្តខុស ចំពោះមាតាបិតា គ្រូបាធ្យាយ និង សង្គមជាតិនាពេលកន្លងមក។
ព្រះធម្មសិរី អាភាករោ ជុំ គឹមឡេង មានថេរៈដិកាថា៖ ពិធីកោរសក់ បួងសក់ដល់កុលបុត្រកុលធីតាខ្មែរគឺជាប្រពៃណីទំនៀមទំលាប់របស់ដូនតាខ្មែរមានជាយូរលង់ណាស់មកហើយ ដោយយើងយកតាមលំអានព្រះសម្មាសម្ពុទ្ឋបរមគ្រូនៃយើង ដោយទ្រង់លះបង់ឋានៈកិត្តិយសទ្រព្យសម្បត្តិ និងកោរកាត់កេសាដើម្បីសាងភ្នួស ដូចដែលមានបរិយាយនៅក្នុងគម្ពីរព្រះត្រៃបិតកជាដើម។
ព្រះអង្គមានថេរៈដិកាទៀតថា៖ ការស្មគ្រ័ចិត្តលះបង់សក់ ដែលជាទីស្រឡាញ់ របស់យុវវ័យគឺជាការលះបង់ធំធេង ដើម្បីសាងភ្នួសបួសសងតបគុណ ចំពោះលោកឪពុកអ្នកម្តាយ និងអ្នកមានគុណផងទាំងឡាយ ជាពិសេសបានបំពេញជាកូនប្រុស តាមប្រពៃណីខ្មែរ ព្រោះថា ប្រពៃណីខ្មែរយើងកូនប្រុសត្រូវតែសាងភ្នួសបួសជាភិក្ខុ ឬសាមណេរ ទោះក្នុងរយៈពេលវែង ឬខ្លីក៍ដោយក្តី។
បើតាមកម្មវិធីរបស់គណៈកម្មការរៀបចំបានបែងចែកកាលវិភាគ សម្រាប់អនុវត្តប្រចាំថ្ងៃ ដល់កុលបុត្តកុលធីតា ក្នុងអំឡុងស្ថិតក្នុងភ្នួស ពួកគេនឹង ស្វាធ្យាយសូត្រនមស្កាព្រះរតនត្រៃ សមាទានសីល ស្តាប់ឱវាទ ធ្វើសមាធិ ដើរចង្ក្រម និងទទួលនូវការអប់រំសីលធម៌ ចរិយាធម៌ ចូលរួមស្តាប់ការផ្សព្វផ្សាយពីសុវត្តិភាពចរាចរណ៍ផ្លូវគោក និង ស្តាប់ការផ្សព្វផ្សាយអប់រំផលប៉ះពាល់នៃការប្រើប្រាស់គ្រឿងញៀន ជួយសំអាតបរិស្ថាន ជាដើម។ល។
គណៈកម្មការរៀបចំពិធីរំពឹងថា៖ ក្រោយពីការបួសរយៈពេលខ្លីនេះទៅ កុលបុត្រកុលធីតាខ្មែរអាចនឹងយល់អំពីព្រះពុទ្ធសាសនាកាន់តែច្បាស់ និងមានបំណងចូលរួមក្នុងពិធីបុណ្យវិសាខបូជានាពេលខាងមុខ ដែលនេះជាកាតព្វកិច្ច របស់ពុទ្ឋសាសនិក ដើម្បីបានស្គាល់ពីតម្លៃនៃព្រះពុទ្ឋសាសនា បានយល់ដឹងពីគោលធម៌របស់ព្រះពុទ្ឋសាសនា និង យកព្រះធម៌មកដាក់ខ្លួនដើម្បីតម្រង់ផ្លូវជីវិតរបស់ខ្លួន ហើយព្រះធម៌ក្នុងពិធីនេះ ក៏នឹងជម្រុញឲ្យយុវជនយុវតី ប្រកាន់នូវតួនាទីជាកូនល្អ សិស្សល្អ មិត្តល្អ ប្រជាពលរដ្ឋល្អ និងជាពុទ្ឋសាសនិកល្អ ព្រមទាំងស្គាល់ពីទំនៀមទំលាប់ប្រពៃណី វប្បធម៌ អរិយធម៌ដ៍ល្អផូរផង់របស់ដូនតាខ្មែរផងដែរ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី