នៅព្រឹកថ្ងៃទី ២២ ខែមករា ឆ្នាំ២០២៤នេះ លោក អ៊ឹង គឹមលាង អភិបាលរងខេត្តសៀមរាប តំណាងឯកឧត្តម ប្រាក់ សោភ័ណ អភិបាលខេត្ត បានដឹកនាំក្រុមការងាររដ្ឋបាលជលផល នៃមន្ទីរកសិកម្មរុក្ខាប្រមាញ់និងនេសាទខេត្ត ក្រុមការងារអធិការដ្ឋានរដ្ឋបាលជលផលខាងជើងបឹងទន្លេសាប ក្រុមអន្តរាគមន៍បង្ក្រាបបទល្មើសថ្នាក់ជាតិប្រចាំនៅឃុំកំពង់ភ្លុក ក្នុងស្រុកប្រាសាទបាគង ការិយាល័យនគរបាលចរាចរណ៍ជើងទឹកប្រចាំសង្កាត់ចុងឃ្នៀស និងសហគមន៍នេសាទចុងឃ្នៀស បើកយុទ្ឋនាការត្រួតពិនិត្យ ទប់ស្កាត់ និងបង្ក្រាបភ្លាមៗ ចំពោះឧបករណ៍នេសាទខុសទៅច្បាប់ស្តីពីជលផល និងសង្កេតពីសកម្មភាពការប្រើឧបករណ៍នេសាទ ចាប់ពីចំណុចសង្កាត់ចុងឃ្នៀស ក្រុងសៀមរាប ទៅដល់ឃុំកំពង់ភ្លុក ស្រុកប្រាសាទបាគង ។
លោក ធិននី សុទ្ធី នាយខណ្ឌរដ្ឋបាលជលផលសៀមរាប បានឲ្យដឹងថា បន្ទាប់ពីបើកយុទ្ឋនាការចុះពិនិត្យទបទល្មើសនេសាទក្នុងតំបន់ភូមិសាស្ត្រសង្កាត់ចុងឃ្នៀស និង ឃុំកំពង់ភ្លុករួចមក ជាលទ្ធផល ក្រុមការងារបានបំផ្លាញឧបករណ៍នេសាទល្មើសច្បាប់ចោលនៅនឹងកន្លែង ជាឧបករណ៍ ប ក្រឡាសាច់អួនក្រោម០,០៣ម៉ែត្រ រួមមាន៖ឧបករណ៍.ប ចំនួន ០៨គ្រឿង , ក្បាល .ប ចំនួន០៨គ្រឿង , របាំងសាច់អួនប្រវែង១ ៦០០ម៉ែត្រ , ចម្រឹងចំនួន៤០០ដើម និង ព្រលែងត្រីចម្រុះចំនួន២០គីឡូក្រាម ។
មានប្រសាសន៍ក្នុងឱកាសនោះ លោក អ៊ឹង គឹមលាង អភិបាលរងខេត្ត បានជំរុញដល់ថ្នាក់ដឹកនាំ និងមន្ត្រីជលផល អាជ្ញាធរដែនដី និងកម្លាំងមានសមត្ថកិច្ចក្នុងមូលដ្ឋាន ត្រូវបន្តយកចិត្តទុកដាក់សហការគ្នាចេញត្រួតពិនិត្យឱ្យបានញឹកញាប់ បន្តការពិនិត្យទប់ស្កាត់បទល្មើសជលផលក្នុងភូមិសាស្ត្ររបស់ខ្លួនឱ្យបានជាប្រចាំ ពិសេសត្រូវសហការតាមដានស្ថានភាពប្រជាសាស្ត្រនិងភូមិសាស្ត្រជលផលឱ្យបានច្បាស់លាស់ ដើម្បីស្រង់ទិន្នន័យប្រជានេសាទក្នុងមូលដ្ឋាន ដើម្បីក្តាប់ជាប់នូវមុខសញ្ញាអ្នកប្រព្រឹត្តបទល្មើសនេសាទ ។
ជាមួយគ្នានេះដែរ លោក អ៊ឹង គឹមលាង បានអំពាវនាវដល់ប្រជានេសាទ សូមកុំប្រើប្រាស់ឧបករណ៍នេសាទខុសច្បាប់ ព្រោះថា ដើម្បីឱ្យផលនេសាទទទួលបានទិន្នផលខ្ពស់ប្រកបដោយនិរន្តរភាព និងការបង្រ្កាបទប់ស្កាត់បទល្មើសនេសាទ បានលទ្ឋផលល្អប្រសើរ គឺទាមទារការចូលរួមពីប្រជាពលរដ្ឋ ដែលយល់ពីធនធានជលផល ព្រោះជាទ្រព្យសម្បត្តិរបស់យើងទាំងអស់គ្នា ហើយជួយការពារទាំងអស់គ្នា ៕
អត្ថបទ និងរូបភាព៖ លោក យូ វង្ស
កែសម្រួល៖ លោក លីវ សាន្ត
