ថ្លែងក្នុងសន្និបាតឆ្នាំទី៦ នៃសមាគមកែលម្អជីវភាពកសិករប្រចាំឆ្នាំ២០២៣ ដែលធ្វើឡើងនៅសៀមរាប នាថ្ងៃទី៦ ខែកុម្ភៈ ឆ្នាំ២០២៤នេះ លោក លី សំរិទ្ធ អភិបាលរងខេត្ដសៀមរាប មានប្រសាសន៍ សមាគមកែលម្អជីវភាពកសិករបានដើរតួនាទីសំខាន់ណាស់ក្នុងការជួយគាំទ្រ និងរក្សាបាននូវនិរន្តរភាពរបស់ក្រុមកែលម្អជីវភាពប្រជាជាពលរដ្ឋ នៅក្នុងខេត្តគោលដៅទាំង៧ រួមមានខេត្តបាត់ដំបង ខេត្តបន្ទាយមានជ័យ ខេត្តសៀមរាប ខេត្តកំពង់ធំ ខេត្តកំពង់ចាម ខេត្តត្បូងឃ្មុំ និងខេត្តព្រៃវែង។
លោកអភិបាលរងខេត្ត បានបង្ហាញថា ក្នុងនាមជាអាជ្ញាធរខេត្ដ មិនទាន់មានលទ្ធភាពគ្រប់គ្រាន់ ដើម្បីជួយដល់កសិករទាំងការផលិត និងទីផ្សារ ប៉ុន្ដែអាជ្ញាធរខេត្ដមានដៃគូរច្រើនសម្រាប់អភិវឌ្ឍន៍ជីវភាពកសិករ។ ជាក់ស្ដែងតាមរយៈគម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចនៅតំបន់បឹងទន្លេសាបជំហ៊ានពីរនេះ សមាគមកែលម្អជីវភាពកសិករ ត្រូវបន្តការយកចិត្តទុកដាក់ក្នុងការជួយតម្រង់ទិសសមាគម និងជួយដោះស្រាយបញ្ហានានាដែលកើតមានឡើងក្នុងសមាគម ដើម្បីរក្សាបាននូវនិរន្តរភាព ភាពរីកចម្រើនដល់ក្រុមកែលម្អជីវភាព ពីព្រោះក្រុមកែលម្អជីវភាពទាំង ១.៩០៦ក្រុមនេះ មានសមាជិកក្រុមប្រមាណ ៤៥.៧៣៣គ្រួសារ ហើយកន្លងមកក៏បានទទួលទុនបង្វិលពីគម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចតំបន់ទន្លេសាបជាង ១១លានដុល្លារផងដែរ។
លោកបន្តថា សម្រាប់ខេត្តសៀមរាប ក្រុមកែលម្អជីវភាពកសិករ មានចំនួន ៣៥៦ក្រុម នៅក្នុងភូមិ ៣៤៤ភូមិគោលដៅ និងមានសមាជិកសរុបចំនួន ៨.៣៣១នាក់ ដែលក្នុងនោះប្រភេទក្រ១ ប្រមាណ ២.៧២៩នាក់ និងក្រ២ ប្រមាណ ២.៧៤៦នាក់ ខណៈដែលទុនបង្វិលដែលគាំទ្រដោយគម្រោង និងសមាជិកក្រុមទាំងអស់ គឺជាកម្លាំងផលិតយ៉ាងខ្លាំង នូវផលិតផលកសិកម្ម និងផលិតផលនានា សម្រាប់អភិវឌ្ឍន៍ប្រទេសជាតិ។ ជាមួយគ្នានេះអាជ្ញាធរខេត្ដសៀមរាប សូមលើទឹកចិត្ដដល់សមាគមកែលម្អជីវភាពកសិករ និងដៃគូអភិវឌ្ឍន៍ ព្រមទាំងមូលនិធិអន្តរជាតិសម្រាប់អភិវឌ្ឍកសិកម្ម ក្នុងការជួយកាត់បន្ថយភាពក្រីក្ររបស់ប្រជាពលរដ្ឋ និងអភិវឌ្ឍន៍សេដ្ឋកិច្ចក្នុងប្រទេសកម្ពុជា តាមរយៈគម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចនៅតំបន់បឹងទន្លេសាប។
ប្រធានសមាគមកែលម្អជីវភាពកសិករ លោកស្រី ម៉ន លក្ខិណា មានប្រសាសន៍ថា ក្រោយពីសមាគមបានបង្កើតទ្បើងក្នុងឆ្នាំ២០១៧ ក្រុមការងារសេវាទី២ និងទី៧ នៃក្រុមហ៊ុន អេស ប៊ី ខេ បានផ្តល់សេវាក្នុងការពង្រឹងសមត្ថភាព និងតាមដានត្រួតពិនិត្យ និងធ្វើសវនកម្មដល់ក្រុមកែលម្អជីវភាព និងបានសម្របសម្រួលក្នុងរៀបចំបង្កើតសមាគមកែលម្អជីវភាពកសិករក្រោមក្របខណ្ឌនៃគម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចតំបន់ទន្លេសាប និងមានការគាំទ្រពេញទំហឹងពី គម្រោង TSSD (NCDDS)។
លោកស្រីបន្ដថា នៅក្នុងឆ្នាំ២០២៣កន្លងទៅនេះ សមាគមបានដឹកនាំ និងគ្រប់គ្រងសមាគមដោយខ្លួនឯង ហើយមានការជួយជ្រុមជ្រែងពីគម្រោង TSSD-AF (NCCDS) និងស្ថាប័នពាក់ព័ន្ធ ព្រមទាំងអាជ្ញាធ័រមូលដ្ឋានគ្រប់លំដាប់ថ្នាក់។លោកស្រីបន្ដថា ការរៀបចំសន្និបាតនេះ បានបង្ហាញសមាសភាពក្រុមប្រឹក្សាភិបាលអាណត្តិទី៣ បង្ហាញអំពីលទ្ធផលសម្រេចបានក្នុងឆ្នាំ២០២៣ បង្ហាញអំពីស្ថានភាពហិរញ្ញវត្ថុរបស់ក្រុម និងសមាគម ឆ្នាំ២០២៣ ផែនការសកម្មភាព និងថវិកា ឆ្នាំ២០២៤។លោកស្រីបានបន្ដថា សន្និបាតនៅថ្ងៃនេះ ដើម្បីតាមដានពិនិត្យមើលនូវរបាយការណ៍រីកចម្រើន និងរបាយការណ៍ហិរញ្ញវត្ថុក្រុមកែលម្អជីវភាពឆ្នាំ២០២២ និងឆ្នាំ២០២៣។របាយការណ៍ហិរញ្ញវត្ថុរបស់សមាគមឆ្នាំ២០២២ និងឆ្នាំ២០២៣ និងពិនិត្យ អនុម័តលើផែនការសកម្ម និងថវិកាប្រចាំឆ្នាំ២០២៤ និងការចែករំលែកបទពិសោធន៍ជោគជ័យរបស់តំណាងក្រុម និងបុគ្គលិក៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
