ពលរដ្ឋក្រីក្ររស់នៅទីក្រុងតេជោសែន រុនតាឯក បានចុះឈ្មោះរៀនជំនាញបច្ចេកទេសវិជ្ជាជីវ ដោយមិនគិតថ្លៃ បានសម្ដែងការសប្បាយរីករាយ និងអរគុណដល់រាជរដ្ឋាភិបាល ដែលបានបណ្ដុះបណ្ដាលជំនាញវិជ្ជាជីវៈជំនាញនេះដល់ពួកគាត់។
សិក្ខាកាមមកពីតំបន់រុនតាឯក ដែលកំពុងរៀនជំនាញបរិក្ខាម៉ាស៊ីនត្រជាក់ និងអគ្គីសនី នៅវិទ្យាស្ថានជាតិពហុបច្ចេកទេសអង្គរ ពួកគាត់បានលើកឡើងថា ការរៀនជំនាញនេះ មានការឧបត្ថម្ភថវិកា ២៨ម៉ឺនរៀលទៀតក្នុងមួយខែ សម្រាប់ប្រជាពលរដ្ឋមកពីគ្រួសារក្រ១និងក្រ២។ ពួកគាត់ជឿជាក់ថា ពួកគាត់នឹងមានការងារធ្វើក្រោយរៀនចប់ជំនាញវិជ្ជាជីវៈផ្នែកអគ្គិសនី និងបរិក្ខាម៉ាស៊ីត្រជាក់។ ពួកគាត់បន្ដថា ការផ្ដល់ជំនាញដល់ពួកគាត់នេះ បង្ហាញអោយឃើញថា រាជរដ្ឋាភិបាលបានយកចិត្ដទុកដាក់ដល់ប្រជាពលរដ្ឋក៍ដូចជាយុវជនដែលបានផ្ដល់ប្ដូរទីលំនៅចេញពីតំបន់រមណីយដ្ឋានអង្គរ។
បើតាមលោក រ៉ាត រតនៈ នាកយករងវិទ្យាស្ថានជាតិពហុបច្ចេកទេសអង្គរ បានឲ្យដឹងថា គិតមកទល់នឹងពេលនេះមានសិក្ខាកាមចំនួន ២៧២នាក់ បានចុះក្នុងបញ្ជីឈ្មោះរួចរាល់ ពួកគាត់រៀនមុខជំនាញ ឆុងកាហ្វេ ផលិតនំ ការតបណ្ដាញអគ្គិសនីក្នុងអាគារ ការជួសជុលនិងថែទាំរថយន្ដ និងបរិស្ថានម៉ាស៊ីត្រជាក់។ ក្នុងនោះមានយុវជនមានប័ណ្ណក្រីក្រ នឹងទទួលបានប្រាក់ឧបត្ថម្ភ ២៨ម៉ឺន ក្នុងមួយខែថែមទៀតផង។ លោកថា ការផ្ដល់ជំនាញវិជ្ជាជីវៈដល់យុវជននេះ មិនមែនមានតែយុវជននៅក្រុងតេជោសែន រុនតាឯកនោះទេ គឺធ្វើឡើងទាំង១២ក្រុងស្រុក នៃខេត្ដសៀមរាប។ កន្លែងបណ្ដុះបណ្ដាលមានពីរទីតាំង គឺធ្វើឡើងនៅវិទ្យាស្ថានជាតិពហុបច្ចេកទេសអង្គរ និងនៅអាគារសិក្សាអនុវិទ្យាល័យតេជោសែនរុនតាឯក។
លោក រ៉ាត រតនៈ បានឲ្យដឹងទៀតថា ក្រោយពីពួកគាត់បានបញ្ចប់ការសិក្សានឹងទទួលបានចុះកម្មសិក្សាផ្ទាល់ជាមួយក្រុមហ៊ុនវិស័យឯកជន ឬសហគ្រាស យ៉ាងតិចរយៈពេល២សប្ដាហ៍ ហើយអាចជួយសម្របសម្រួលការងារដល់ពួកគាត់ផងដែរ។ កាសិក្សាមានបីវេន ដែលវេនទីមួយពេលថ្ងៃ ចាប់ពីថ្ងៃចន្ទ ដល់ថ្ងៃសុក្រ មានរយៈពេល៤ខែ និងវេនទី២ សិក្សានៅថ្ងៃសៅរ និងថ្ងៃអាទិត្យ មានរយៈពេល១០ខែ និងវេនទី៣ពេលយប់ ចាប់ពីថ្ងៃចន្ទដល់ថ្ងៃសុក្រ មានរយៈពេល៨ខែ៕
អត្ថបទ៖ លោក បូ សាវី
កែសម្រួល៖ លោក អ៊ុន ណារាជ្យ
