អភិបាលខេត្តសៀមរាប ឯកឧត្តម ប្រាក់ សោភ័ណ មានប្រសាសន៍ថា ខេត្តសៀមរាប ជាគោលដៅរបស់ភ្ញៀវទេសចរណ៍វប្បធម៌ និងប្រវត្តិសាស្ត្រ ដែលមានប្រាង្គប្រាសាទបុរាណរាប់ពាន់ជាមរតកដូនតាខ្មែរយើង ជាតំបន់រមណីយដ្ឋានទាំងធម្មជាតិ និងកែច្នៃជាច្រើនកន្លែង ព្រមទាំងមានតំបន់អេកូទេសចរណ៍សហគមន៍ជាច្រើនកន្លែងផងដែរ ដែលរងចាំទទួលស្វាគមន៍ភ្ញៀវទេសចរជាតិ អន្តរជាតិចូលមកទស្សនាកម្សាន្ត ដូច្នេះសូមលើកទឹកចិត្តដល់សមាគមសហគ្រិនស្ត្រីកម្ពុជាខេត្តសៀមរាប ចូលរួមថែរក្សា និងលើកតម្កើងនូវសម្បត្តិវប្បធម៌ ប្រពៃណី ទំនៀមទម្លាប់របស់ខ្មែរ ដែលបុព្វបុរសខ្មែរបានបន្សល់ទុកមកដល់បច្ចុប្បន្ននេះ ក្នុងនោះដូចជាការស្លៀកពាក់សម្លៀកបំពាក់ប្រពៃណីខ្មែរយើង ដែលជាការបង្ហាញ និងរំលឹកអំពីអត្តសញ្ញាណរបស់ជាតិខ្មែរយើងផង។
ឱកាសជួបចំណេះសំណាលជាមួយក្រុមប្រតិភូសមាគមសហគ្រិនស្ត្រីកម្ពុជាសាខាខេត្តសៀមរាប ដឹកនាំដោយលោកស្រី ជា សុកនួន ប្រធានសមាគម នាថ្ងៃទី៦ ខែកុម្ភៈ ឆ្នាំ២០២៤នេះ ឯកឧត្តម ប្រាក់ សោភ័ណ មានប្រសាសន៍ទៀតថា ក្នុងយន្តការរបស់រាជរដ្ឋាភិបាលកម្ពុជា ក្រោមកិច្ចដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដាក់ចេញយុទ្ធសាស្ត្របញ្ចកោណដំណាក់កាលទី១ ដោយផ្តោតសំខាន់ទស្សនាសៀមរាប ឆ្នាំ២០២៤ ដើមី្បជំរុញដល់វិស័យទេសចរណ៍ក្នុងខេត្ត ឲ្យមានសន្ទុះកើនឡើងដែលវបញ្ហានេះ រដ្ឋបាលខេត្តសៀមរាប បានលើកផែនការក្នុងរៀបចំនូវព្រឹត្តិការណ៍ផ្សេងៗ ដូចជាបង្កើតឲ្យមានកីឡាទេសចរណ៍ ព្រឹត្តិការណ៍សៀមរាបផ្ទះខ្ញុំ រួមទាំងមាននៅតាមសហគមន៍ ដើមី្បក្នុងការទាក់ទាញភ្ញៀវ ជាតិ អន្តរជាតិចូលមកកម្សាន្ត និង បង្កើននូវប្រាក់ចំណូលជូនប្រជាពលរដ្ឋក្នុងខេត្តសៀមរាប ។
ឯកឧត្តម អភិបាលខេត្តសៀមរាប បន្តទៀតថា ដើមី្បឲ្យការងារទាំងនេះដំណើរការទៅបានរលូន សូមឲ្យគ្រប់ស្ថាប័នពាក់ព័ន្ធទាំងរដ្ឋ និង វិស័យឯកជន រួមគ្នាធ្វើការផ្សព្វផ្សាយពីវិស័យទេសចរណ៍ក្នុងខេត្ត ក្នុងនោះសមាគមសហគ្រិនស្ត្រីកម្ពុជាសាខាខេត្តសៀមរាប ក៏ត្រូវពង្រឹង និង បង្កើនគុណភាពផលិតផលរបស់ខ្លួន ទាំងការវេចខ្ចប់ផលិតផលនាំចេញឲ្យមានស្តង់ដា ការស្វែងរកដៃគូសហការដើម្បីពង្រីកទីផ្សារផ្គត់ផ្គង់ រួមទាំងការចូលរួមធ្វើសម្អាតបរិស្ថាន និង អនាម័យក្នុងខេត្ត ។
ក្នុងប្រសាសន៍របស់លោកស្រី ជា សុកនួន ប្រធានសមាគមសហគ្រិនស្ត្រីកម្ពុជា សាខាខេត្តសៀមរាប ក៏បានលើកបង្ហាញពីភាពខ្លាំងរបស់ស្ត្រីក្នុងភាពជាអ្នកដឹកនាំទាំងក្នុងសង្គម និង គ្រួសារ ព្រមទាំងបានបញ្ជាក់ពីចក្ខុវិស័យគោលបំណងរបស់ សាខាសមាគមសហគ្រិនស្ត្រីកម្ពុជាខេត្ត ដើមី្បបង្កើនសហគ្រិនភាពស្ត្រីក្នុងខេត្ត ដោយគាំទ្រគ្រួសារ និងសង្គម, ការចូលរួមចំណែកធ្វើឲ្យសេដ្ឋកិច្ចក្នុងតំបន់មានការរីកចម្រើន ការពង្រឹងសាមគ្គីភាពរបស់សហគ្រិនស្ត្រីពីគ្រប់វិស័យ និងការរួមចំណែកលើកកម្ពស់អាជីវកម្មរបស់ស្ដ្រីនៅកម្ពុជា។ ពិសេសការប្រមូលផ្តុំសមាជិក, ការលើកកម្ពស់សហគ្រិនស្ត្រី តាមរយៈការចែករំលែកជាសាធារណៈ ការប្រកួតថ្នាក់ជាតិ អន្តរជាតិ និងការដឹកនាំសមាគម ព្រមទាំងគាំទ្រពង្រីកទីផ្សារ តាមរយៈការភ្ជាប់បណ្តាញទំនាក់ទំនងអាជីវកម្ម និងការផ្គូរផ្គងអាជីវកម្មជាដើម៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក លីវ សាន្ត
