ដើម្បីឲ្យព្រឹត្តិការណ៍បុណ្យទន្លេលើកទី៨ កាន់តែមានភាពទាក់ទាញកាន់តែខ្លាំង អាជ្ញាធរខេត្តសៀមរាប បានបើកកិច្ចប្រជុំជាបន្ទាន់មួយដើម្បីស្វែងរកធាតុចូលនានាពីបណ្តាមន្ទីរអង្គរភាព និងវិស័យឯកជន នាព្រឹកថ្ងៃទី០៧ ខែកុម្ភៈ ឆ្នាំ២០២៤ ។
លោក សំកុល សុចិត្រា អភិបាលរងខេត្តសៀមរាប មានប្រសាសន៍ថា បុណ្យទន្លេលើកទី៨ ដែលនឹងប្រារព្ធធ្វើនៅក្នុងខេត្តសៀមរាប រយៈពេលបីថ្ងៃ ចាប់ពីថ្ងៃទី១៦ដល់១៨ ខែមីនា ឆ្នាំ២០២៤ ឆាប់ៗខាងមុខនេះ។ លោកបន្តថា បើគិតជារយៈពេល យើងនៅមិនមានពេលវេលាច្រើនប៉ុន្មាននោះទេ ដូច្នេះលោករំពឹងថា កិច្ចប្រជុំនេះនឹងផ្តល់ធាតុចូលសំខាន់ៗនានា ដើម្បីឲ្យព្រឹត្តិការណ៍នេះ កាន់តែមានសារប្រយោជន៍ កាន់តែប្លែក និងកាន់តែទាក់ទាញ។
សូមជម្រាបថា នៅក្នុងកិច្ចប្រជុំនេះ ទាំងវិស័យឯកជន និងមន្ទីរអង្គភាពនានា បានលើកឡើងនូវគំនិតផ្តួចផ្តើមនានាជាច្រើនសម្រាប់បង្កើនភាពទាក់ទាញនិងមានអត្ថន័យអប់រំផងដែរ។ គំនិតផ្តួចផ្តើមទាំងនោះមានដូចជា ការរៀបចំបង្ហាញនូវរូបភាពត្រីទឹកសាប ជាពិសេសប្រភេទត្រីដែលជិតផុតពូជ ការដាំកូនឈើនៅមាត់បឹងទន្លេសាប ការជិះទូកកម្សាន្តនៅសហគមន៍ទេសចរណ៍នានា ការរៀបចំប្រកួតប្រដាល់គុនខ្មែរ ការបង្ហាញនូវមុខម្ហូបរបស់ខ្មែរដែលផលិតអំពីសាច់ត្រីទឹកសាបកម្ពុជា ការប្រកួតគូគំនូររបស់កុមារដែលមានខ្លឹមសារអប់រំបរិស្ថានជាដើម។
ជុំវិញមតិលើកឡើងនេះ លោក សំកុល សុចិត្រា បានបញ្ជាក់ថា ការលើកឡើងទាំងអស់នេះ គឺពិតជាបានផ្តល់នូវខ្លឹមសារសំខាន់សម្រាប់ដាក់ជូនឯកឧត្តម អភិបាលខេត្តសៀមរាបពិនិត្យ សម្រេច ដាក់ជូនទៅខាងក្រសួងទេសចរណ៍ដែលជាអ្នករៀបចំពិធីបុណ្យ។
សូមជម្រាប់ថា តាមការគ្រោងបុណ្យទន្លេលើទី៨ ដែលធ្វើឡើងនៅខេត្តសៀមរាប នឹងធ្វើនៅលើទីតាំងសួនច្បារកន្លែងហាត់ប្រាណជិតព្រះរាជដំណាក់ និងនៅតាមដងស្ទឹងសៀមរាប ដោយព្រឹត្តិការណ៍នេះនឹងត្រូវរៀបចំឲ្យសម្បូរបែបដូចជា៖ ទស្សនីយភាពសិល្បៈ ការតាំងពិព័រណ៍ និងសកម្មភាពកម្សាន្តផ្សេងៗ ការប្រណាំងកង់ ការរត់កម្សាន្ត ការប្រណាំងទូក ការប្រកួតវាយកូនគោល នឹងការរៀបចំទីតាំងសម្រាប់ប្រារព្ធពិធីបើកជាផ្លូវការ និងទីតាំងកម្មវិធីតន្ត្រីកម្សាន្តនានាក្នុងខេត្ត ដើម្បីទាក់ទាញភ្ញៀវទេសចរជាតិ និង អន្តរជាតិឲ្យបានច្រើនមកទស្សនានៅក្នុងអំឡុងពេលបុណ្យទន្លេនោះ។ ជាមួយគ្នានេះ អ្នកពាក់ព័ន្ធក៏ពិនិត្យមើលអំពីលទ្ធភាពពន្លាតទីតាំងកម្សាននានានៅតាមបណ្តារមណីយដ្ឋានទេសចរណ៍ដែលនៅមាត់បឹងទន្លេសាបផងដែរ៕
អត្ថបទ និងរូបភាព៖ លោក ជា ស្រស់
