កាលពីឆ្នាំ២០២៣កន្លងទៅ នៅទូទាំងប្រទេសកម្ពុជា មានករណីគ្រោះថ្នាក់ចរាចរណ៍កើតឡើងសរុប ៣ ៣១៧លើក ដែលបង្កឱ្យជនរងគ្រោះ១ ៥៩០នាក់ បានស្លាប់ និងរបួសធ្ងន់ ស្រាលសរុប ៧ ២៨១នាក់ នេះបើតាមរបាយការណ៍ឆ្នាំ២០២៣ របស់អនុគណៈកម្មការទី២ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក កាលពីចុងខែមករានេះ។
តាមការឱ្យដឹងពី លោក វរសេនីយ៍ទោ ជា វុទ្ធី នាយរងការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប នៅថ្ងៃទី៨ ខែកុម្ភៈនេះ បង្ហាញថា នាពេលកន្លងមក កងកម្លាំងនគរបាលចរាចរណ៍ តែងតែបានធ្វើការអប់រំ និងផ្សព្វផ្សាយទៅដល់អ្នកប្រើប្រាស់ផ្លូវនៅតាមគោលដៅសំខាន់ៗដូចជា ទីប្រជុំជនមមាញឹក គ្រឹះស្ថានអប់រំ សាធារណៈ និងឯកជនជាដើម។ លោកបន្ថែមថា ក្នុងឆ្នាំ២០២៣ ខេត្តសៀមរាប មានគ្រោះថ្នាក់ចរាចរណ៍កើតឡើងសរុបចំនួន ៩០ករណី និងបង្កឱ្យស្លាប់មនុស្សសរុបចំនួន ៧៦នាក់ ប៉ុន្តែលោកថា តួលេខនេះមានការថយចុះ បើធៀបនឹងឆ្នាំ២០២២។
ព័ត៌មានជាតិ ថ្មីៗ
លោក វរសេនីយ៍ទោ ជា វុទ្ធី បញ្ជាក់បន្ថែមថា ទោះជាករណីគ្រោះថ្នាក់មានការថយចុះក្ដី ប៉ុន្តែចំនួនអ្នកស្លាប់ នៅមានកម្រិតខ្ពស់នៅឡើយ។ ក្នុងនោះដែរ លោកបានអំពាវនាវដល់អ្នកបើកបរទាំងអស់ សូមចូលរួមគោរពច្បាប់ចរាចរណ៍បានខ្ជាប់ខ្ជួន និងចូលរួមសហការជាមួយនគរបាលចរាចរណ៍ ក្នុងករណីអ្នកបើកបរ បញ្ជាយានយន្តខុសច្បាប់ចរាចរណ៍។
ស្របពេល ពិធីបុណ្យចូលឆ្នាំប្រពៃណីចិន-វៀតណាម ចូលមកដល់ចាប់ពីថ្ងៃស្អែក ប្រជាពលរដ្ឋក្នុងខេត្តសៀមរាប បានអំពាវនាវដល់អ្នកបើកបរទាំងអស់ សូមចូលរួមគោរពច្បាប់ចរាចរណ៍ទាំងអស់គ្នា ជាពិសេសសូមទទួលទានគ្រឿងស្រវឹងដោយមានការទទួលខុសត្រូវ និងចៀសវាងការបើកបរក្នុងស្ថានភាពស្រវឹង។
គួររំលឹកថា កាលពីថ្ងៃទី២៣ ខែមករា ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានណែនាំដល់អគ្គស្នងការនគរបាលជាតិ ត្រូវបន្តធ្វើការរឹតបន្តឹងការអនុវត្តច្បាប់ចរាចរណ៍ផ្លូវគោក និងពិនិត្យជាតិអាកុល ចំពោះអ្នកបើកបរតាមដងផ្លូវ ពីព្រោះបញ្ហាគ្រោះថ្នាក់ចរាចរណ៍នេះ បានបង្កឱ្យប្រជាពលរដ្ឋរងរបួស និងស្លាប់ជាបន្តបន្ទាប់។
រូបភាព និងអត្ថបទ៖ ក្រុមការងារការិយាល័យទូរទស្សន៍
កែសម្រួល៖ សេង ផល្លី
