នាព្រឹកថ្ងៃទី៧ ខែកុម្ភៈ ឆ្នាំ២០២៤នេះ ក្រុមការងារដឹកនាំសម្របសម្រួលវិស័យសន្តិសុខស្បៀង និងអាហារូបត្ថម្ភខេត្តសៀមរាប បានបើកកិច្ចប្រជុំបូកសរុបការងារឆ្នាំ២០២៣ និងលើកទិសដៅអនុវត្តការងារបន្តឆ្នាំ២០២៤ របស់ខ្លួន ដើម្បីផ្តល់មតិយោបល់ដល់ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ នៃប្រើប្រាស់ជាធាតុចូលសម្រាប់រៀបចំគោលនយោបាយ យុទ្ធសាស្ត្រ កម្មវិធី និងគម្រោងនានាដែលពាក់ព័ន្ធនឹងវិស័យសន្តិសុខស្បៀង និងអាហារូបត្ថម្ភ ដែលអនុវត្តកន្លងមក។
លោក អ៊ឹង គឹមលាង អភិបាលរងខេត្ត មានប្រសាសន៍ថា ក្រុមការងារដឹកនាំសម្របសម្រួលវិស័យសន្តិសុខស្បៀង និងអាហារូបត្ថម្ភថ្នាក់ខេត្តសៀមរាប ត្រូវបានបង្កើតឡើងជាផ្លូវការកាលពីខែមិថុនា ឆ្នាំ២០២១ ក្នុងគោលបំណងបង្កើនការយល់ដឹង និងចូលរួមអនុវត្តន៍យុទ្ឋសាស្ត្រជាតិសន្តិសុខស្បៀង និងអាហារូបត្ថម្ភលើកទី២ និងលើកទី៣ នៅពេលដ៏ខ្លីខាងមុខ និងជាពិសេសចូលរួមអនុវត្តទៅតាមផែនទីបង្ហាញផ្លូវ ស្តីពីប្រព័ន្ឋស្បៀងសម្រាប់ការអភិវឌ្ឍប្រកបដោយចីភាពនៅកម្ពុជាឆ្នាំ២០៣០។
លោកអភិបាលរងខេត្ត មានប្រសាសន៍ទៀតថា រដ្ឋបាលខេត្តសៀមរាប ក៏ដូចជាក្រុមការងារក្រុមដឹកនាំសម្របសម្រួលវិស័យសន្តិសុខស្បៀង និងអាហារូបត្ថម្ភខេត្ត បានគាំទ្រ និងចូលរួមអនុវត្តន៍ផែនការយុទ្ធសាស្ត្រជាតិស្តីពីសន្តិសុខស្បៀង និងអាហារូបត្ថម្ភ ឆ្នាំ២០១៩-២០២៣ និងអនុវត្តន៍ផែនការសកម្មភាព ដើម្បីស្តារសេដ្ឋកិច្ច និងសង្គមឡើងវិញ ពីវិបត្តិកូវីដ-១៩ និងការរៀបចំផែនទីបង្ហាញផ្លូវ សម្រាប់ប្រព័ន្ធស្បៀងប្រកបដោយចីរភាព ឆ្នាំ២០៣០ រួមមាន៖ការលើកកម្ពស់របស់អាហារសុខភាពសម្រាប់ទាំងអស់គ្នា, ការលើកម្ពស់ភាពអង់អាចរបស់យុវជន ស្រី្ត និងជនងាយរងគ្រោះ, ការពង្រឹងភាពធន់លើមុខរបរចិញ្ចឹមជីវិត និងប្រព័ន្ធស្បៀង និងការពង្រឹងអភិបាលកិច្ច ដើម្បីធ្វើឱ្យប្រព័ន្ធស្បៀងកាន់តែមានបរិយាប័ន្ន។
ឯកឧត្តម សំ សារ៉ាត អនុប្រធាននៃក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ មានប្រសាសន៍ថា បច្ចុប្បន្ននេះនៅថ្នាក់ជាតិយើងមានយន្តការល្អប្រសើរដើម្បីដឹកនាំសម្របសម្រួលការកែលម្អរវិស័យ សន្តិសុខស្បៀង និងអាហារូបត្ថម្ភ និងបរិវត្តកម្មប្រព័ន្ធស្បៀង ហើយនៅថ្នាក់ក្រោមជាតិ យើងទើបនឹងបានបង្កើត បាននូវយន្តការសម្របសម្រួលវិស័យសន្តិសុខស្បៀង និងអាហារូបត្ថម្ភរាជធានីខេត្ត។ ការងារនេះក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ សហការជាមួយរដ្ឋបាលខេត្តសៀមរាប ដោយមានការគាំទ្រថវិការដោយអង្គការទស្សនៈពិភពលោកខេត្តព្រះវិហារ, អង្គការហេឡែនខេលល័រអន្តរជាតិកម្ពុជា, សមាជិកសម្ព័ន្ធអង្គការសង្គមស៊ីវិលដើម្បីអាហារូបត្ថម្ភកម្ពុជា និងគាំទ្របច្ចេកទេសដោយកម្មវិធីសហប្រតិបត្តិការសម្រាប់ការអភិវឌ្ឍរបស់អាល្លឺម៉ង់, មូលនិធិសហប្រជាជាតិ ដើម្បីកុមារប្រចាំប្រទេសកម្ពុជា កម្មវិធីស្បៀងអាហារពិភពលោកប្រចាំប្រទេសកម្ពុជា និងអង្គការស្បៀងនិងកសិកម្មនៃសហប្រជាជាតិ បានសម្របសម្រួលបង្កើតក្រុមការងារដឹកនាំសម្របសម្រួលវិស័យសន្តិសុខស្បៀង និងអាហារូបត្ថម្ភខេត្តសៀមរាប។
ក្នុងឱកាសនោះដែរ ឯកឧត្តមអនុប្រធាន ក៏បានវាយតម្លៃលទ្ធផលអនុវត្តគម្រោងនានា ដែលពាក់ព័ន្ធនឹងសន្តិសុខប្រព័ន្ធស្បៀងសម្រាប់វិស័យសន្តិសុខស្បៀង និងអាហារូបត្ថម្ភ ដោយយុទ្ធសាស្ត្របញ្ចកោណ ដំណាក់កាលទី១ ឆ្នាំ២០២៣-២០២៨ ប្រព័ន្ធស្បៀងសម្រាប់វិស័យសន្តិ សុខស្បៀង និងអាហារូបត្ថម្ភ ស្ថិតនៅបញ្ចកោណទី១ មុំទី៤ គឺជាអាទិភាពសម្រាប់ការពង្រឹងប្រព័ន្ធគាំពារ សង្គម និងប្រព័ន្ធស្បៀង ដើម្បីផ្តល់សន្តិសុខស្បៀង និងអាហារូបត្ថម្ភដល់ប្រជាជនកម្ពុជាគ្រប់រូប គ្រប់ពេល វេលា។ ប្រព័ន្ធស្បៀងត្រូវបានពង្រឹងឱ្យរឹងមាំ ឆ្លាត ធន់ និងបរិយាបន្នល្អប្រសើរជាដើម៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
