ព្រឹត្តិការណ៏ដង្ហែតុក្កតាយក្សក្នុងក្រុងសៀមរាប គ្រោងរៀបចំនៅចុងខែកុម្ភៈ ឆ្នាំ២០២៤នេះ ដើម្បីលើកស្ទួយនូវិស័យសិល្បៈ វប្បធម៌ បរិស្ថាន និងស្ដារឡើងវិញនូវក្បួនដង្ហែតុក្កតាយក្ស និងទាក់ទាញភ្ញៀវទេសចរណ៍ជាតិ និងអន្តរជាតិឲ្យមកទស្សនាខេត្តសៀមរាប ស្របតាមយុទ្ធសាស្រ្តរបស់ក្រសួងទេសចរណ៏បានដាក់ចេញ។
អ្នកគ្រប់គ្រងកិច្ចការទូទៅគម្រោងតុក្កតាយក្ស លោក អ៊ុន សាវ៉ាន់ បានបញ្ជាក់ថា ការរៀបចំសូន្យរូប និងដំឡើងរូប ត្រូវបានរៀបចំនៅក្នុងបរិវេណវត្តដំណាក់ ដោយគ្រោងនឹងរៀបចំការដង្ហែនៅថ្ងៃទី២៤ ខែកុម្ភ: ឆ្នាំ២០២៤ខាងមុខនោះ ដោយពេលល្ងាចក្បួនដង្ហែតុក្កតាយក្ស នឹងធ្វើការរៀបចំដង្ហែរចេញពីវត្តដំណាក់ ឆ្វែលជុំវិញរួចហើយយកទៅដាក់តាំងនៅក្នុងសួនច្បារព្រះដំណាក់រយៈពេល ៥ថ្ងៃ ទុកឲ្យភ្ញៀវជាតិ និងអន្តរជាតិថតយករួបភាពទុកធ្វើជាអនុស្សាវរីយ៍។ លោកជឿជាក់ថា ព្រឹត្តិការណ៏ដង្ហែតុក្កតាយក្សសម្រាប់ឆ្នាំនេះ នឹងមានភ្ញៀវជាតិ អន្តរជាតិចូលរួមច្រើន ហើយក្នុងនោះយើងក៏មានការសហការជាមួយមន្ទីរពាណិជ្ជកម្មខេត្ត រៀបចំស្តង់តាំងពិព័ណនានាជាច្រើនក្នុងគោលបំណងទាក់ទាញភ្ញៀវទេសចរណ៍ជាតិ និងអន្តរជាតិ ឲ្យមកទស្សនានៅខេត្តសៀមរាប ស្របតាមយុទ្ធសាស្រ្តរបស់ក្រសួងទេសចរណ៏បានដាក់ចេញ ដែលជាកន្លែងតំបន់ទេសចរណ៏ពិភពលោកបានស្គាល់បានឃើញយ៉ាងពិតប្រាកដ។
លោក ស៊ា សុផល ប្រធានអង្គការទំពាំងស្នងឬស្សី បានវាយតម្លៃខ្ពស់ចំពោះការរៀបចំឲ្យមានកម្មវិធីនេះឡើងជារៀងរាល់ឆ្នាំ ដើម្បីទាក់ទាញភ្ញៀវជាតិ និងអន្តរជាតិឲ្យមកទស្សនានៅខេត្តសៀមរាប ដែលជាខេត្តពោរពេញទៅដោយអរិយធម៍ វប្បធម៍ផូរផង់ ជាពិសេស គឹសកម្មភាពក្មេងៗនៅទីនេះតែម្តង ដែលពួកគាត់បានចូលរួមជាមួយព្រឹត្តិការណ៍តុក្កតាយក្សក្នុងឆ្នាំនេះ។ លោកបន្តថា យើងឃើញស្រាប់ហើយថា នៅខេត្តសៀមរាបយើង គឺសម្បុរកម្មវិធីណាស់ក្នុងគោលបំណងទាក់ទាញនោះ ហើយគម្រោងតុកតាយក្សនេះ មិនមែនជាលើកទី១ទេ គឺជាលើកទី១១ហើយ។
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
