នៅសាលាខេត្តសៀមរាប នារសៀលថ្ងៃទី៦ ខែកុម្ភៈ ឆ្នាំ២០២៤ ឯកឧត្តម ប្រាក់ សោភ័ណ អភិបាលខេត្ត និងលោក អូនីស្ហ៊ិ ហ៊ីដេតុ(ONISHI Hideto) អភិបាលក្រុង TAKAMATSU ខេត្ត KAGAWA នៃប្រទេសជប៉ុន បានចុះហត្ថលេខាលើអនុស្សរណៈនៃការយោគយល់គ្នាស្តីពីការអនុវត្តគំនិតផ្តួចផ្តើមទីក្រុងឆ្លាតវៃរវាងខេត្តសៀមរាប នៃប្រទេសកម្ពុជា និងក្រុង TAKAMATSU ខេត្ត KAGAWA នៃប្រទេសជប៉ុន តាមរយៈប្រព័ន្ធអនឡាញ។
ឯកឧត្តម ប្រាក់ សោភ័ណ មានប្រសាសន៍ថា ខេត្តសៀមរាបត្រូវបានដាក់បញ្ចូលជាសមាជិកនៃបណ្តាញទីក្រុងឆ្លាតវៃអាស៊ាន (ASEAN Smart City Network) ក្នុងកិច្ចប្រជុំកំពូលអាស៊ានលើកទី៣២ នាឆ្នាំ២០១៨ នៅប្រទេសសិង្ហបុរី។ នៅឆ្នាំ២០១៩ រដ្ឋបាលខេត្តសៀមរាប បានទទួលជំនួយកិច្ចសហប្រតិបត្តិការបច្ចេកទេស ពីទីភ្នាក់ងារសហប្រតិបត្តិការអន្តរជាតិជប៉ុន (JICA) ទៅលើការសិក្សា និងការរៀបចំផែនការយុទ្ធសាស្រ្តអភិវឌ្ឍន៍ទីក្រុងសៀមរាប នៃខេត្តសៀមរាប ឱ្យក្លាយទៅជាទីក្រុងឆ្លាតវៃ ព្រមទាំងទទួលបាននូវការគាំទ្រយ៉ាងពេញទំហឹងពីទីភា្នក់ងារ JICA ទៅលើការអនុវត្តគម្រោងសាកល្បងទីក្រុងឆ្លាតវៃចំនួន៨ នៅក្នុងក្រុងសៀមរាប។ អ្វីដែលពិសេសជាងនេះទៅទៀត ទីភា្នក់ងារ JICA ជាតួអង្គមួយដ៏សំខាន់ ដែលបានជួយជ្រោមជ្រែងលើការងារកិច្ចសហប្រតិបត្តិការទីក្រុងឆ្លាតវៃរវាងខេត្តសៀមរាប នៃព្រះរាជាណាចក្រកម្ពុជា និងក្រុង TAKAMATSU ខេត្ត KAGAWA នៃប្រទេសជប៉ុន រហូតដល់មានការចុះអនុស្សរណៈនៃការយោគយល់គ្នារវាងភាគីទាំងពីរនាពេលនេះ។
ឯកឧត្តមអភិបាលខេត្ត បានសំដែងនូវការអរគុណចំពោះរដ្ឋាភិបាលនៃប្រទេសជប៉ុន ក៏ដូចជាប្រជាពលរដ្ឋជប៉ុន និងទីក្រុង Takamatsu នៃខេត្ត KAGAWA ផ្ទាល់ដែលជានិច្ចជាកាល តែងតែផ្តល់នូវការជួយឧបត្ថម្ភគាំទ្រគ្រប់បែបយ៉ាងដល់ប្រទេសកម្ពុជា ក៏ដូចជាខេត្តសៀមរាបនាពេលកន្លងមក។ និងបានថ្លែងអំណរគុណដល់ លោក លោកស្រី អភិបាលរងខេត្តទទួលបន្ទុកទីក្រុងឆ្លាតវៃ និងភាគីJICA ដែលបានផ្តល់កិច្ចសហការ ក្នុងការអនុវត្តគម្រោងទីក្រុងសៀមរាបឆ្លាតវៃប្រកបដោយផ្លែផ្កាក្នុងរយៈកាលកន្លងមកនេះ។ ឯកឧត្តម ប្រាក់ សោភ័ណ ជឿជាក់ថាកិច្ចសហការនេះនឹងនាំមកនូវលទ្ធផលជាទីមោទនៈបន្ថែមទៀតដើម្បីញ៉ាំងឱ្យការអនុវត្តទីក្រុងឆ្លាតវៃរវាងខេត្ត ក្រុងទាំងពីរកាន់តែមានភាពរីកចម្រើន ស្របតាមនិន្នាការសកលនៃបរិបទឧស្សាហកម្មជំនាន់ទី៤។
ក្នុងឱកាសនោះដែរ លោក អូនីស្ហ៊ិ ហ៊ីដេតុ(ONISHI Hideto) បានលើកឡើងពីទំនាក់ទំនងនិងកិច្ចសហប្រតិបត្តិការរវាងខេត្តទាំងពីរ តាមរយៈផ្លាស់ប្តូរទសនស្សកិច្ចសិក្សាទៅវិញទៅមក និងបានទស្សនាប្រព័ន្ឋការពារគ្រោះមហន្តរាយ និងជួបសំណេះសំណាលជាមួយបណ្តាវិស័យនានាជាច្រើន និងបានប្រជុំតាមប្រព័ន្ឋអនឡាញពាក់ព័ន្ឋទៅនឹងគម្រោងផែនការទីក្រុងឆ្លាតវៃនេះផងដែរ។ តាមរយៈទំនាក់ទំនងបែបនេះ យើងក៏បានចូលរួមបណ្តុះបណ្តាលធនធានមនុស្សក្នុងវិស័យទីក្រុងឆ្លាតវៃ ហើយការចុះអនុស្សារៈណៈយោគយល់គ្នានាពេលនេះនឹងជំរុញឱ្យទំនាក់ទំនងកិច្ចប្រតិបត្តិការអនុវត្តទីក្រុងឆ្លាតវៃរវាងក្រុង TAKAMATSU ខេត្ត KAGAWAនៃប្រទេសជប៉ុន និងទីក្រុងសៀមរាប ខេត្តសៀមរាប នៃព្រះរាជាណាចក្រកម្ពុជា កាន់តែដំណើរការទៅដោយរលូន និងជោគជ័យ។
លោក KAWAMURA Kenichi អនុប្រធានជាន់ខ្ពស់នៃទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) មានប្រសាសន៍ថា ការចុះអនុស្សារៈណៈនៃការយោគយល់នេះជាសក្ខីភាពមួយបង្ហាញអំពីកិច្ចសហប្រតិបត្តិការក្នុងការជំរុញនិងអភិវឌ្ឍវិស័យនានាដោយប្រើប្រាស់បច្ចេកវិទ្យាឌីជីថល និងការបណ្តុះបណ្តាលធនធានមនុស្សនិងការផ្លាស់ប្តូរទំនាក់ទំនងពាក់ព័ន្ឋនឹងទីក្រុងឆ្លាតវៃរវាងទីក្រុងនៃខេត្តទាំងពីរ។ ទំនាក់ទំនងនិងកិច្ចសហប្រតិបត្តិការនេះចាប់ផ្តើមនៅឆ្នាំ២០២០ ហើយ នៅខែឧសភាឆ្នាំ២០២២ យើងចាប់អនុវត្តគម្រោងនិងវិធីសាស្ត្រទីក្រុងឆ្លាតវៃជាគម្រោងបច្ចេកទេសដែលមានភាគីពាក់ព័ន្ឋចូលរួមាច្រើនដោយប្រើប្រាស់បច្ចេកវិទ្យាឆ្លាតវៃដើម្បីសម្រេចបាននូវការគ្រប់គ្រងនិងដោះស្រាយបញ្ហាដែលកើតមានឱ្យមានភាពល្អប្រសើរ។ ក្នុងគម្រោងនេះរដ្ឋបាលខេត្តសៀមរាប និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន បានសហការគ្នាយ៉ាងស្អិតរមួតទាំងទាំងជំរុញការអនុវត្ត និងពង្រឹងការអនុវត្តសមត្ថភាពជាដើម។ នៅខែកក្កដា ឆ្នាំ២០២៣ ទីក្រុង TAKAMATSU បានរៀបចំកិច្ចប្រជុំG7 ហើយបានបង្កើតនូវគោលការណ៍ ដូចជាការអនុវត្តវីធីសាស្ត្រគោលនយោបាយកម្រិតខ្ពស់សម្រាប់ក្រុមប្រកបដោយនិរន្តរភាព ផ្សព្វផ្សាយផែនការទីក្រុងឆ្ពោះទៅកាន់ការអភិវឌ្ឍប្រកបដោយនិរន្តរភាព និងសហប្រតិបត្តិការគាំទ្រដល់ការផ្លាស់ប្តូរទំនាក់ទំនងអន្តរជាតិជាមួយប្រទេសកំពុងអភិវឌ្ឍ។
សូមជំរាបថា តាមរយៈការអនុវត្តគំនិតផ្តួចផ្តើមគម្រោងទីក្រុងឆ្លាតវៃ នេះនឹងអនុញ្ញាតឱ្យទីក្រុងទាំងពីរទទួលបាននូវការផ្លាស់ប្តូរបទពិសោធល្អៗលើការប្រើប្រាស់បច្ចេកវិទ្យាឌីជីថល និងសកម្មភាពទីក្រុងឆ្លាតវៃជាមួយគ្នានឹងការអភិវឌ្ឍធនធានមនុស្ស ក៏ដូចជាការលើកកម្ពស់ការប្រើប្រាស់បច្ចេកវិទ្យាឌីជីថលក្នុងខេត្តសៀមរាប និងក្រុង Takamatsu ឱ្យកាន់តែមានភាពជឿនលឿន និងប្រកបដោយប្រសិទ្ធភាពបន្ថែមមួយកម្រិតទៀត៕
អត្ថបទ និងរូបភាព៖ លោក យូ វង្ស លោក បូ សាវី
