បង្កើតឡើងនៅឆ្នាំ១៩៩៥ សមាគមខ្មែរ-ចិន ខេត្តសៀមរាប មានគោលបំណងជារួម បង្រួបបង្រួមកូនចៅចិន និងខ្មែរ ជាប់សែស្រឡាយចិន ដែលរស់នៅក្នុងខេត្តសៀមរាបទាំងអស់ អាចជួបជុំគ្នា និងថែរក្សាប្រពៃណីទំនៀមទម្លាប់របស់បុព្វបុរស នៃជនជាតិចិន និងមួយវិញទៀតរឹតចំណងសាមគ្គីភាព រវាងជនជាតិខ្មែរ និងចិន និងរស់នៅជាមួយគ្នាប្រកបដោយភាពសុខដុម ដូចពីសម័យបុរាណកាលរៀងមក។
តាមការលើកឡើងរបស់ លោក តាំង គឹមហួរ ប្រធានសមាគមខ្មែរ-ចិន ខេត្តសៀមរាប បច្ចុប្បន្ន គោលដៅចម្បងរបស់សមាគមខ្មែរ-ចិន ខេត្តសៀមរាប គឺចូលរួមលើកកម្ពស់វិស័យអប់រំ ដល់កូនខ្មែរ និងខ្មែរសែស្រឡាយចិន ជាពិសេសជំនាញភាសាចិន។
លោក តាំង គឹមហួរ បញ្ជាក់បន្ថែមថា សាលារៀនចំណេះដឹងទូទៅភាសាខ្មែរ និងភាសាចិន ចុងសាន ក្រុងសៀមរាប គឺស្ថិតនៅក្រោមការទទួលខុសត្រូវទាំងស្រុង របស់សមាគមខ្មែរ-ចិន ខេត្តសៀមរាប ចំពោះកម្មវិធីសិក្សារៀបចំដោយសមាគមសម្ព័ន្ធខ្មែរ-ចិន កម្ពុជា ដែលមានការទទួលស្គាល់ពីមន្ទីរអប់រំ យុវជន និងកីឡាខេត្តសៀមរាប។
លោក តាំង គឹមហួរ បន្តថា គិតមកដល់ឆ្នាំ២០២៤ នេះ សមាគមខ្មែរ-ចិន ខេត្តសៀមរាប មានសមាជិកបម្រើការសកម្ម ២៨នាក់ និងសមាជិកគាំទ្រប្រមាណ ១០០០នាក់។ តាមរយៈការគាំទ្ររបស់សមាជិក សមាគមបានចូលរួមសកម្មភាពសង្គម និងការអភិវឌ្ឍសេដ្ឋកិច្ចក្នុងខេត្តសៀមរាប ជាច្រើនដូចជា ឧបត្ថម្ភសម្ភារៈបរិក្ខារសុខាភិបាល ក្នុងការប្រយុទ្ធប្រឆាំងនឹងជំងឺកូវីដ ជាមួយមន្ទីរសុខាភិបាលខេត្ត ឧបត្ថម្ភគ្រឿងឧបភោគបរិភោគ ដល់ជនទីទ័លក្រ ឧបត្ថម្ភដល់គ្រួសារសពជាប់សែស្រឡាយចិន ទីទ័លក្រជាដើម។
យោងតាមឯកសារប្រវត្តិសាស្ត្រ ដែលចុះផ្សាយសារព័ត៌មាន Fresh News បង្ហាញថា ប្រទេសកម្ពុជាមានទំនាក់ទំនងពាណិជ្ជកម្ម ជាមួយឈ្មួញជនជាតិចិន ចាប់តាំងពីដើមសតវត្សរ៍ទី ១ នៃគ្រិស្តសករាជ ប៉ុន្តែអ្នកស្រាវជ្រាវខ្លះបានអះអាងថា ប្រទេសកម្ពុជាមានទំនាក់ទំនងពាណិជ្ជកម្ម ជាមួយឈ្មួញជនជាតិចិន តាំងពីប្រហែល ៣០០ឆ្នាំមុនគ្រិស្តសករាជ មកម្ល៉េះ។ ជនជាតិចិនដែលរស់នៅកម្ពុជាអាចត្រូវបែងចែកជា ៥ក្រុមផ្សេងៗគ្នា ដោយផ្អែកលើអម្បូរភាសារបស់ពួកគេ ពោលគឺ ចិនទាជីវ ចិនកាតាំង ចិនហុកគៀន ចិនហៃណាណ និងចិនហាក់កាឬចិនខិ។ ចិនទាជីវ មានចំនួនច្រើនជាងគេបំផុត ដោយអ្នកសិក្សាស្រាវជ្រាវមួយចំនួនបានសន្និដ្ឋានថា ប្រហែល៨០ភាគរយ នៃជនជាតិចិនដែលរស់នៅកម្ពុជា គឺជនជាតិចិនទាជីវ។ ជនជាតិចិនអម្បូរភាសាទាជីវ គឺជាជនជាតិហាន ដែលមានប្រភពមកពីតំបន់ចៅហ្សាននៃខេត្តក្វាងទុង ហើយពួកគេភាគច្រើនរស់នៅក្នុងទីក្រុងភ្នំពេញ ខេត្តកំពត និងខេត្តកំពង់ចាម។ អម្បូរភាសាកាតាំង ត្រូវគេប្រើប្រាស់ភាគច្រើននៅទីក្រុងកាន់តុននៃខេត្តក្វាងចូវ ទីក្រុងហុងកុង ទីក្រុងម៉ាកាវ និងតំបន់ប៉ែកខាងកើតនៃខេត្តគ័ងស៊ី។ ភាគច្រើននៃជនជាតិចិនអម្បូរភាសាកាតាំងនៅក្នុងប្រទេសកម្ពុជា បានធ្វើចំណាកស្រុកមកពីតំបន់ក្បែរៗទីក្រុងកាន់តុងនៃខេត្តក្វាងចូវ។ ពួកគេភាគច្រើន រស់នៅក្នុងក្រុងភ្នំពេញ ខេត្តបាត់ដំបង និងខេត្តកំពង់ចាម។
រូបភាព៖ ស៊ុំ គីន
អត្ថបទ៖ សេង ផល្លី
