ជារៀងរាល់ឆ្នាំ អ្នកភូមិបង្កោង ឃុំអំពិល ស្រុកប្រាសាទបាគង តែងជួបជុំគ្នានៅបឹងសហគមន៍ ដើម្បីចាប់ត្រីរួមគ្នា យកមកធ្វើម្ហូបអាហារ សម្រាប់ពិធីឡើងមាឃ ដែលជាប្រពៃណីពីបុរាណរបស់អ្នកស្រុកក្នុងតំបន់អង្គរ។
នៅថ្ងៃទី១១ ខែកុម្ភៈ ឆ្នាំ២០២៤នេះ គេសង្កេតឃើញថា ក្រៅពីអ្នកភូមិបង្កោង ក៏មានប្រជាពលរដ្ឋមកពីបណ្ដាភូមិផ្សេងៗ មកចូលរួមផងដែរ។ ប៉ុន្តែ លោក ពេជ្រ ឃិន មេភូមិបង្កោង លើកឡើងថា ត្រីដែលប្រជាពលរដ្ឋចាប់បាន ហាក់មានបរិមាណតិចជាងឆ្នាំ២០២៣។
តាមការប៉ាន់ស្មាន របស់លោកមេភូមិបង្កោង បរិមាណត្រីចុះថយនេះ អាចបណ្តាលមកពីកត្តាធម្មជាតិ ដោយសារកន្លងមក លោកបានយកកូនត្រី មកប្រលែងក្នុងបឹងអភិរក្សនេះមួយចំនួនដែរ តែលោកសង្កេតឃើញថាបរិមាណទឹកក្នុងបឹង ហាក់មានសភាពរាក់ជាងឆ្នាំមុន។
ព័ត៌មានជាតិ ថ្មីៗ
គួរជម្រាបថា ពិធីចាប់ត្រីរួមគ្នា របស់អ្នកស្រុកប្រាសាទបាគងនេះ តែងប្រារព្ធឡើង ក្រោយពេលបញ្ចប់ការងារប្រមូលផលស្រូវរួចរាល់។ ក្នុងពិធីនេះដែរ អ្នកចូលរួមតម្រូវឲ្យ ប្រើឧបករណ៍នេសាទប្រពៃណីដូចជា សំណាញ់ អង្រុត ឈ្នាងជាដើម។
អត្ថបទ និងរូបភាព: ហែម បូរ៉ានី
កែសម្រួល : សេង ផល្លី
