អាជ្ញាធរខេត្តសៀមរាប នឹងធ្វើការពិន័យអន្តរការណ៍ ចំពោះប្រតិបត្តិករផ្តល់សេវាកម្មបូម ដឹកជញ្ជូន និងបោះចោលសំណល់ភក់បង្គន់ពីអាងស៊ិបទិច ដែលពុំមានលិខិតអនុញ្ញាតពីរដ្ឋបាលក្រុង-ស្រុក ឬដឹកជញ្ជូនយកទៅបញ្ចេញចោលខុសទីតាំង ឬតាមទីសាធារណៈដែលកំណត់ដោយស្ថាប័នជំនាញចំនួន ៤០០.០០០រៀល ចំពោះអាជីវកម្មជាលក្ខណៈគ្រួសារ និង ១.០០០.០០០រៀល ចំពោះអាជីវកម្មជាលក្ខណៈក្រុមហ៊ុន ហើយក្នុងករណីមិនរាងចាលត្រូវទទួលការពិន័យអន្តរការណ៍ជាប្រាក់ទ្វេរដងនៃប្រាក់ពិន័យអន្តរការណ៍លើកមុន។
ថ្លែងក្នុងកិច្ចប្រជុំការគ្រប់គ្រង និងការប្រើប្រាស់ចំណូលពីការពិន័យអន្តរការណ៍ ចំពោះអំពើល្មើសនឹងអនុក្រឹត្យស្តីពីការគ្រប់គ្រងសំរាម សំណល់រឹងទីប្រជុំជន នៅរសៀលថ្ងៃទី៥ ខែមីនា ឆ្នាំ២០២៤ លោក អុឹង គឹមលាង អភិបាលរងខេត្តសៀមរាប មានប្រសាសន៍ថា ការគ្រប់គ្រង និងការប្រើប្រាស់ចំណូលពីការពិន័យអន្តរការណ៍នេះ គឺដើម្បីធ្វើឱ្យប្រសើរឡើងនូវការគ្រប់គ្រងសំណល់ភក់បង្គន់ចេញពីអាងស៊ិបទិច ប្រកបដោយប្រសិទ្ធិភាព តម្លាភាព និងគណនេយ្យភាព សំដៅធានាឱ្យបាននូវសុវត្ថិភាព សុខុមាលភាពសាធារណៈ សោភ័ណភាព និងការអភិរក្សជីវចម្រុះជាដើម។
លោក អុឹង គឹមលាង បន្តថា ចំពោះរដ្ឋបាលក្រុង-ស្រុក ត្រូវផ្តល់លិខិតអនុញ្ញាតការធ្វើអាជីវកម្មបូម ដឹកជញ្ជូន និងការបោះចោលសំណល់ភក់បង្គន់ពីអាងស៊ិបទិចតាមការស្នើសុំរបស់ប្រតិបត្តិករផ្តល់សេវាកម្មដោយមានការផ្តល់យោបល់បច្ចេកទេសពីមន្ទីរបរិស្ថានខេត្តផង ហើយប្រតិបត្តិករផ្តល់សេវាកម្មទាំងអស់ ត្រូវមានលិខិតអនុញ្ញាចំពោះអាជីវកម្មខ្លួនដែលផ្តល់ឱ្យដោយរដ្ឋបាលក្រុង-ស្រុក និងត្រូវបំពាក់សម្ភារការពារសុវត្ថិភាពឲ្យបានត្រឹមត្រូវផងដែរ។ លោកក៏បានជំរុញដល់រដ្ឋបាលក្រុង-ស្រុក ត្រូវរៀបចំបង្កើតក្រុមការងារទទួលបន្ទុកអនុវត្តការពិន័យអន្តរការណ៍នៅក្នុងដែនសមត្ថកិច្ចឲ្យបានត្រឹមត្រូវ ហើយចំពោះការកំណត់អំពីបែបបទ នៃបង់ប្រាក់ពិន័យអន្តរការណ៍ការប្រមូល និងការគ្រប់គ្រងប្រាក់ ពិន័យអន្តរការណ៍ ត្រូវអនុវត្តតាមប្រកាសអន្តរក្រសួងលេខ ៨៦៨២ ប្រក ចុះថ្ងៃទី១០ ខែកញ្ញា ឆ្នាំ២០១៩កន្លងមក។ ក្នុងនោះដែររដ្ឋបាលក្រុង-ស្រុក ត្រូវសហការជាមួយមន្ទីរបរិស្ថានខេត្ត និងអ្នកពាក់ព័ន្ធ ធ្វើការផ្សព្វផ្សាយ ជំរុញ និងលើកទឹកចិត្តដល់ប្រតិបត្តិករបូម ដឹកជញ្ជូន និងការបោះចោលសំណល់ភក់បង្គន់ពីអាងស៊ិបទិចទាំងអស់ ឱ្យមកស្នើសុំលិខិតអនុញ្ញាតមុននឹងប្រតិបត្តិការអាជីវកម្មនៅក្នុងភូមិសាស្រ្តក្រុង-ស្រុក របស់សាមីខ្លួនផងដែរ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
