នៅព្រឹកថ្ងៃទី៦ ខែមីនា ឆ្នាំ២០២៤នេះ គណៈកម្មាធិការពិគ្រោះយោបល់កិច្ចការស្ត្រី និងកុមារខេត្តសៀមរាប សហការជាមួយ អង្គការសង្គមស៊ីវិល ប្រារព្ភទិវាសិទ្ធនារីអន្ដរជាតិ ៨មីនា លើកទី១១៣ ក្រោមប្រធានបទ ´´ ស្ដ្រីនិងក្មេងស្រីក្នុងបរិវត្ដកម្មឌីជីថល´´ ដោយមានអ្នកចូលរួមជាច្រើននាក់ នៅសាលាគរុកោសល្យ និងវិក្រិត្យការខេត្ដ។
លោកស្រី ឃឹម ពិសី នាយិកាអង្គការមជ្ឍមណ្ឌលធនធានស្ដ្រី មានប្រសាសន៍ថា ក្នុងនាមអង្គការសង្គមស៊ីវិល មានចក្ខុវិស័យចង់ឃើញស្ត្រីនិងកុមារីកម្ពុជា មានសមត្ថភាពលើកកម្ពស់សុខុមាលភាពសង្គម និងសមភាពយេនឌ័រនៅកម្ពុជា ព្រមទាំងមានបេសសកម្មបង្កើតការងារជាមួយស្ត្រី និងគាំទ្រដល់ស្ត្រី និងកុមារីកម្ពុជាឱ្យធ្វើការសម្រេចចិត្ត ប្រកបដោយការយល់ដឹងអំពីជីវិតរបស់ពួកគេ។ ការងារចូលរួមរបស់ស្ត្រីនេះក៏ត្រូវការគាំទ្រគ្រប់ភាគីពាក់ព័ន្ធទាំងក្នុងគ្រួសារ ស្ថាប័ន អង្គភាព និងក្នុងសហគមន៍ ដើម្បីបង្កើនបរិយាកាសមួយសុវត្ថិភាពមួយជូនដល់ស្ត្រី ក្មេងស្រី និងកុមារ ព្រមទាំងបានឆ្លុះបញ្ចាំងពីគុណតម្លៃនៃសាមគ្គីភាព និងភាពវ័យឆ្លាតរបស់មនុស្សគ្រប់រូប។
លោកជំទាវ ស៊ិន ណម ប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារខេត្តសៀមរាប មានប្រសាសន៍ថា ទិវាអន្តរជាតិនារី ៨មីនា ខួបទី១១៣ នៅក្នុងឆ្នាំ២០២៤ ក្រោមប្រធានបទ ´´ ស្ដ្រីនិងក្មេងស្រីក្នុងបរិវត្ដកម្មឌីជីថល´´ គោលបំណងបន្តរំលេចពីតម្លៃនៃការចូលរួមរបស់ស្រ្តី ដែលមិនអាចកាត់ថ្លៃបាន ក្នុងការថែរក្សា សុខសន្តិភាព ក៍ដូចជាកំពុងចូលរួមយ៉ាងសកម្ម ក្នុងការពន្លឿនកិច្ចអភិវឌ្ឃលើគ្រប់វិស័យ។ ក្នុងភាពជាដៃគូ ប្រជាពលរដ្ឋកម្ពុជាទាំងស្រ្តី និងបុរស នឹងចូលរួមដោយស្មើរភាព និងស្មើរសិទ្ធិជាមួយប្រជាពលរដ្ឋនៃបណ្តាប្រទេសនានា ទាំងក្នុងតំបន់និងសកលលោក ជាពិសេសនៅក្នុងយុគសម័យឌីជីថល និងនៅក្នុងរបៀបវារៈស្តារសេដ្ឋកិច្ច-សង្គមក្រោយវិបត្តកូវីដ-១៩ ក៍ដូចជាការកសាងភាពធនរឹងម៉ាំ និងការអភិវឌ្ឍប្រកបដោយចីរភាព។ យើងត្រូវរួមគ្នាលើកកំពស់ និងជំរុញការអនុវត្តគោលនយោបាយពង្រឹងសមភាពយេនឌ័ររបស់រាជរដ្ឋាភិបាល ដែលបានចាត់ទុក ស្រីជាឆ្អឹងខ្នងនៃការអភិវឌ្ឍសេដ្ឋកិច្ចនិងសង្គមជាតិ និងការងារបញ្ជ្រាបយេនឌ័រ ដែលជាកិច្ចការអន្តរវិស័យ ក្នុងការធានាបាននូវចីរភាពនៃសុខសន្តិភាព និងពន្លឿនកិច្ចអភិវឌ្ឍជាតិ ជាពិសេសក្នុងយគសម័យឌីជីថល និងការកសាងមូលដ្ឋានឆ្ពោះទៅសម្រេចចក្ខុវិស័យកម្ពុជាជាប្រទេសដែលមានចំណូលខ្ពស់ នៅឆ្នាំ២០៥០ខាងមុខ។
លោកជំទាវបន្ដថា ក្នុងបរិយាការណ៍នេះ ការយកចិត្តទុកដាក់និងការពង្រឹងសមភាពយេនឌ័រ នៅតែបន្តជាកិច្ចការអាទិភាព ដើម្បីធានាថា ស្រ្តីនិងក្មេងស្រីគ្រប់រូបទទួលបានសមភាពនៅក្នុងគ្រប់ទិដ្ឋភាព ទាំងនៅក្នុងវិស័យនយោបាយ សេដ្ឋកិច្ច និងសង្គម ព្រមទាំងអនុវត្តនូវសិទ្ធិ ចូលរួមដោយស្មើភាព ជាធនធានដ៍មានតម្លៃ និងជាដៃគូមិនអាចខ្វះបានជាមួយបុរស ក្នុងការអភិវឌ្ឍប្រទេសជាតិ និងរស់នៅក្នុងសង្គម ដោយភាពថ្លៃថ្នូរ ជីវភាពល្អប្រសើរ និងប្រកបដោយសុខមាលភាព ខណៈដែលអំពើហិង្សាលើស្រ្តី ជាទម្រង់ដ៍អាក្រក់មួយនៃការរំលោភបំពានសិទ្ធីស្រ្តី ដោយបានបង្ករគ្រោះថ្នាក់ភ្លាមៗដល់អាយុជីវិតរបស់ស្រ្តីរងគ្រោះ ក៍ដូចជាផលប៉ះពាល់អវិជ្ជមានយូរអង្វែងផ្នែករាងកាយ ប្រាជ្ញាស្មារតី សុខភាពផ្លូវចិត្ត ផ្លូវភេទ និងសុខភាពបន្តរពូជរបស់ស្រ្តីរងគ្រោះ និងកូនៗរបស់ពួកគេផងដែរ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
