នៅថ្ងៃទី០៧ ខែមីនា ឆ្នាំ២០២៤ ឯកឧត្តម ហោ សុភាព រដ្ឋលេខាធិការ ទទួលបន្ទុកសវនកម្មផ្ទៃក្នុងក្រសួងព័ត៌មាន និងលោក ឆុន រាសី ប្រធាននាយកដ្ឋានសវនកម្មផ្ទៃក្នុងក្រសួងព័ត៌មាន ព្រមទាំងសហការី បានអញ្ជើញចុះពិនិត្យ ស្ថានភាព នៃការគ្រប់គ្រង យន្តការងារ ដើម្បីវិភាគវាយតម្លៃលើ ប្រសិទ្ឋិភាព ប្រសិទ្ឋផលការងារ ដែលមន្ទីរព័ត៌មានខេត្តសៀមរាប បានអនុវត្តកន្លងមក ឱ្យស្របតាមគោលនយោបាយកំណែទម្រង់រដ្ឋបាលសាធារណៈរបស់ក្រសួងព័ត៌មាន និងរាជរដ្ឋាភិបាលនីតិកាលទី៧នៃរដ្ឋសភា ។
ឯកឧត្តម ហោ សុភាព មានប្រសាសន៍ថា ការចុះមកពិនិត្យនេះគឺជាការកែលំអ ចៀសផុតពីហានិភ័យ និងការពិន័យតាមផ្លូវច្បាប់ណាមួយ និងដើម្បីពង្រឹងយន្តការការងារឱ្យកាន់តែប្រសើរ តាមរយៈជួយជំរុញដល់ដំណើរការកំណែទម្រង់របស់រាជរដ្ឋាភិបាល ក៏ដូចជាក្រសួងព័ត៌មាន សំដៅកាត់បន្ថយហានិភ័យ ដែលមាននៅក្នុងប្រព័ន្ធផ្ទៃក្នុងរបស់ខ្លួន ជួយពង្រឹងការគោរពច្បាប់ និងបទប្បញ្ញត្តិ ការសន្សំសំចៃ ការបង្កើនប្រសិទ្ធភាព និងប្រសិទ្ធផលនៃការប្រើប្រាស់ធនធានឱ្យស្របតាមទិសដៅរបស់ក្រសួងក៏ដូចជារាជរដ្ឋាភិបាលកម្ពុជា។ ឯកឧត្តមថា កន្លងមកឱ្យតែលឺថាចុះក្រុមការងារធ្វើសវនកម្ម អង្គភាពមន្ទីរមួយចំនួនតែងតែច្រឡំថាជា អង្កេតឬចាប់កំហុស។ ការពិតមិនដូច្នោះទេ គឺចុះមកជួយសម្របសម្រួល កែលំអ ដើម្បីគេចចេញពីហានិភ័យដុលមកត្រឹមជាហានិភ័យតិចតួចដែលអាចសម្របសម្រួលនិងដោះស្រាយបាន។
លោក ឆុន រាសី បានឲ្យដឹងថា នេះជាលើកដំបូង ដែលនាយកដ្ឋានសវនកម្មនៃក្រសួងព័ត៌មានបានចុះមកធ្វើសវនកម្មផ្ទៃក្នុងជាមួយមន្ទីរព័ត៌មានខេត្តសៀមរាប ដើម្បីប្រមូលទិន្នន័យ ពិនិត្យវិភាគទៅលើរបាយការណ៍ទាំងវិជ្ជមាននិងអវិជ្ជមាន ពីបញ្ហាហានិភ័យផ្សេងៗ និងរួមគ្នាកែលំអ បំភ្លឺឆ្លើយតបបំពេញបន្ថែមនូវចំណុចខ្វះខាតលើរបាយការណ៍ពាក់ព័ន្ឋផ្សេងៗទាំងនោះ។ ការចុះធ្វើសវនកម្មនេះដើម្បីសំដៅចូលរួមចំណែកដល់ដំណើរការប្រព្រឹត្តទៅរបស់ក្រសួងព័ត៌មានប្រកបដោយប្រសិទ្ឋភាព និរន្តរភាពនិងបំពេញភារកិច្ចសម្រេចបានលទ្ឋផលល្អប្រសើរស្របតាមកម្មវិធីនយោបាយនិងយុទ្ឋសាស្ត្របញ្ចកោណដំណាក់កាលទី១របស់រាជរដ្ឋាភិបាលកម្ពុជានិតិកាលទី៧នៃរដ្ឋសភា។
ព័ត៌មានជាតិ ថ្មីៗ
លោក លីវ សុខុន ប្រធានមន្ទីរព័ត៌មានខេត្តសៀមរាប បានថ្លែងស្វាគមន៍ និងរាយការណ៍ អំពីស្ថានភាពការងាររបស់មន្ទីរព័ត៌មានអនុវត្តនិងសម្រេចបាននាពេលកន្លងមក ។ក្នុងនាមថ្នាក់ដឹកនាំមន្ទីរ លោក លីវ សុខុន បានទទួលយកនូវការដាស់តឿន និងកែលំអពីក្រុមការងារសវនកម្មផ្ទៃក្នុងទៅលើចំណុចខ្វះខាត របស់មន្ទីរ ដើម្បីយកទៅអនុវត្ត និងពង្រឹងយន្តការងាររបស់ខ្លួនឱ្យកាន់តែទទួលបានប្រសិទ្ឋិផលនិងលទ្ឋផលគាប់ប្រសើរជាបន្តៗទៀត៕
អត្ថបទ និងរូបភាព៖ លោក យូ វង្ស
