នៅព្រឹកព្រលឹមម៉ោងប្រមាណ៦ ថ្ងៃទី១៥ ខែមីនានេះ ព្រឹត្តិការណ៍កីឡាទេសចរណ៍ Raid Amazons ដ៏មានប្រជាប្រិយភាពនៃតំបន់អឺរ៉ុប បានធ្វើការប្រកួតជាផ្លូវការហើយ ដែលមានអត្តពលិកជាស្ត្រីប្រមាណជិត ៣០០នាក់ និង បានចាប់ផ្ដើមការប្រកួតនៅចំណុចក្លោងទ្វារខាងលិច នៃប្រាសាទតាព្រហ្ម តំបន់រមណីយដ្ឋានអង្គរ។
ក្នុងពិធីស្វាគមន៍ក្រុមអត្តពលិកជាស្ត្រី ក្នុងក្រុងសៀមរាប កាលពីល្ងាចម្សិលមិញនេះ លោក យុន លីនណេ អភិបាលរងខេត្ត តំណាង ឯកឧត្តម ប្រាក់ សោភ័ណ អភិបាលខេត្តសៀមរាប លើកឡើងថា ការប្រកួតកីឡា ដែលរៀបចំដោយក្រុមហ៊ុន ZBO នេះ បានបង្ហាញពីការលើកកម្ពស់ និង គាំទ្រស្ត្រី ក្នុងការចូលរួមនូវគ្រប់សកម្មភាព និងមានសមត្ថភាពសិទ្ធស្មើគ្នាដូចនឹងបុរសផងដែរ។ បន្ថែមលើនេះ ព្រឹត្តិការណ៍កីឡាទេសចរណ៍ដ៏អស្ចារ្យនេះ ក៏បានចូលរួមលើកស្ទួយ និងផ្សព្វផ្សាយពីប្រពៃណី វប្បធម៌ និងប្រវត្តិសាស្ត្ររបស់ប្រទេសកម្ពុជាទៅកាន់ឆាកអន្តរជាតិ តាមរយៈសកម្មភាពប្រកួតប្រជែងដូចជា ការសិក្សា ស្រាវជ្រាវមុននឹងចូលរួមប្រកួត ដំណើរស្វែងរកការពិតពីប្រវត្តិសាស្រ្តនៅតាមប្រាសាទ ព្រមជាមួយសកម្មភាពសប្បុរសធម៌នានាជាដើម។
ស្របពេលនៃការប្រកួតកីឡាទេសចរណ៍ ដែលមានរយៈពេល ៥ថ្ងៃចាប់ពីថ្ងៃទី១៥-២០ ខែមីនា ក្នុងខេត្តសៀមរាប n អត្តពលិក និងក្រុមការងារ Raid Amazons ក៏នឹងបានស្វែងយល់កាន់តែស៊ីជម្រៅ ពីជីវភាពរស់នៅរបស់ប្រជាជនខ្មែរ តាមរយៈការចូលរួមពិធីបុណ្យទន្លេលើកទី៨ ដែលជាពិធីបុណ្យដ៏ធំកម្រិតជាតិ នៅតាមបណ្ដោយស្ទឹង ក្នុងក្រុងសៀមរាប ដែលនឹងចាប់ផ្ដើមនៅល្ងាចថ្ងៃទី១៥-១៧ ខែមីនានេះផងដែរ។
គួរជម្រាបថា នៅឆ្នាំ២០២៤នេះ រាជរដ្ឋាភិបាលកម្ពុជា ដែលមានសម្ដេចធិបតី ហ៊ុន ម៉ាណែត ជានាយករដ្ឋមន្ត្រី បានយកចិត្តទុកដាក់ខ្ពស់ក្នុងការស្ដារវិស័យទេសចរណ៍ក្នុងប្រទេស ជាពិសេសខេត្តសៀមរាប ដែលរងគ្រោះធ្ងន់ធ្ងរដោយសារវិបត្តិជំងឺកូវីដ១៩។ ក្នុងនោះ សម្ដេចបានដាក់ចេញនូវយុទ្ធនាការ ឆ្នាំទស្សនាសៀមរាប២០២៤ ដែលជាចេញនូវកម្មវិធីជួយស្ដារ និងការលើកស្ទួយវិស័យទេសចរណ៍ក្នុងខេត្តសៀមរាប តាមរយៈការរៀបចំកម្មវិធីថ្នាក់ជាតិ និងអន្តរជាតិជាច្រើន រួមជាមួយនឹងវិធានការធំៗ ចំនួន៨ចំណុច សំដៅជួយជំរុញឱ្យវិស័យទេសចរណ៍នៅក្នុងខេត្តមួយនេះមានសន្ទុះងើបឡើងវិញ៕
អត្ថបទ៖ សេង ផល្លី
