នៅរសៀលថ្ងៃទី១៥ ខែមីនានេះ នៅតាមបណ្ដោយស្ទឹងសៀមរាប ស្ថិតក្នុងសៀមរាប នឹងមានរៀបចំពិធីសាសនា ប្រុងពាលី បុណ្យទន្លេលើកទី៨ ក្រោមអធិបតីភាព ឯកឧត្តម សុខ សុកេន រដ្ឋមន្ត្រី ក្រសួងទេសចរណ៍ និងឯកឧត្តម ប្រាក់ សោភ័ណ អភិបាលខេត្តសៀមរាប។
បើយោងតាមក្រសួងទេសចរណ៍ ពិធីបុណ្យ ថ្នាក់ជាតិនេះ មានគោលបំណងជំរុញលើកតម្លៃ និងផ្សព្វផ្សាយសក្តានុពលទេសចរណ៍នៅតាមបណ្ដាខេត្តនានា តាមដងទន្លេ ជាពិសេស លើកទឹកចិត្តដល់ប្រជាជន ឲ្យចូលរួមយ៉ាងសកម្ម ក្នុងការអភិវឌ្ឍទីក្រុងជាប់ដងទន្លេ ការងារអភិវឌ្ឍទេសចរណ៍សហគមន៍។ មួយវិញទៀត ពិធីបុណ្យទន្លេនេះ ក៏រៀបចំឡើង ដើម្បីទាក់ទាញភ្ញៀវទេសចរជាតិ និងអន្តរជាតិ ចូលរួមកម្សាន្តជាមួយនឹងសកម្មភាពជាច្រើនរួមមាន ព្រឹត្តិការណ៍កីឡា ការសម្ដែងទស្សនីយភាពសិល្បៈ ការប្រគំតន្ត្រី ការអុជកាំជ្រួច និងមានការដាក់តាំងពិព័រណ៍ផលិតផលក្នុងស្រុក និងក្រៅស្រុក ព្រមទាំងមហោរស្រពម្ហូបអាហារជាដើម។
ទន្ទឹមនឹងការរៀបចំពិធីបុណ្យដ៏សប្បាយរីករាយនេះ ឯកឧត្ដម ជា ច័ន្ទបរិបូរណ៍ ឯកឧត្តម ជា ច័ន្ទបរិបូរណ៌ រដ្ឋលេខាធិការ ក្រសួងព័ត៌មាន និងជា អនុប្រធានគណ:កម្មាធិការអន្តរក្រសួងដើម្បីរៀបចំបុណ្យទន្លេ បានលើកឡើងថា ស្របពេលដែលពិធីបុណ្យទន្លេ កំពុងរៀបចំឡើងយ៉ាងគគ្រឹកគ្រងនេះ យុវជន ដែលនិយមប្រើប្រាស់បណ្ដាញសង្គមនានា សូមចូលរួមផ្សព្វផ្សាយពីដំណឹងល្អ សកម្មភាពសប្បាយក្នុងពិធីឱ្យបានច្រើន ដើម្បីឱ្យអន្ដរជាតិបានស្គាល់ពីវិស័យទេសចរណ៍នៅកម្ពុជា។ ឯកឧត្តម បន្តថា យុវជនមានគំនិតច្នៃប្រឌិត ជាពិសេសបណ្ដាញច្រើនក្នុងការផ្សព្វផ្សាយដំណឹងល្អៗ ដែលជួយលើកមុខមាត់ប្រទេសជាតិ។
សូមបញ្ជាក់ថា ពិធីបុណ្យទន្លេលើកទី៨ រៀបចំឡើង ក្រោមប្រធានបទ “ទន្លេដើម្បីសន្តិភាព និងការអភិវឌ្ឍ ដែលធ្វើឡើកនៅខេត្ដសៀមរាបចាប់ពីថ្ងៃទី១៥ ១៦ និង១៧ ខែមីនា ឆ្នាំ២០២៤ នៅតាមដងស្ទឹងសៀមរាបចាប់ពីសួនច្បាមាត់ស្ទឹងជិតព្រះអង្គចេកព្រះអង្គចមទៅដល់ផ្សារចាស់៕
អត្ថបទ និងរូបភាព៖ បូ សាវី
កែសម្រួល៖ សេង ផល្លី
