យោងតាមរបាយការណ៍របស់មន្ទីរទេសចរណ៍ខេត្តសៀមរាប ព្រឹត្តិការណ៍បុណ្យទន្លេលើកទី៨ រយៈពេល៣ថ្ងៃ ចាប់ថ្ងៃទី១៥ ដល់ទី១៧ ខែមីនា ឆ្នាំ២០២៤នេះ ខេត្តសៀមរាប ទទួលបានភ្ញៀវទេសចរជាតិ-អន្តរជាតិចំនួន ៥៥៣.៧៩៤នាក់ ក្នុងនោះភ្ញៀវទេសចរជាតិ និងបងប្អូនប្រជាពលរដ្ឋក្នុងខេត្តមានប្រមាណ ៥២ម៉ឺននាក់ និងភ្ញៀវទេសចរបរទេសមានចំនួន ៣៣.៧៧០នាក់។
ឯកឧត្តម សុខ សុកេន រដ្ឋមន្ត្រីក្រសួងទេសចរណ៍ នៅថ្ងៃទី១៧ ខែមីនា ឆ្នាំ២០២៤ បានបញ្ជាក់ថា ពិធីបុណ្យទន្លេត្រូវបានរៀបចំឡើងក្នុងគោលបំណងបំផុសចលនាមហាជនឲ្យចូលរួមក្នុងការងារអភិវឌ្ឍ និងអភិរក្សធនធានទន្លេប្រកបដោយនិរន្តភាព និងចូលរួមសម្របយុទ្ធនាការពិធិកម្មទេសចរណ៍ តាមរយៈកាបង្កើតព្រឹត្តិការណ៍ទេសចរណ៍ថ្មីៗ សម្រាប់ខេត្តតាមដងទន្លេនៃកម្ពុជា។ សម្រាប់ខេត្តសៀមរាប ការប្រារព្ធបុណ្យទន្លេនេះ មិនត្រឹមតែជាការរំលឹកអំពីគុណប្រយោជន៍របស់ទន្លេប៉ុនណោះទេ ប៉ុន្តែវាជាបង្កើននូវកិច្ចសហប្រតិបត្តិការណ៍រវាងបណ្តាប្រទេសតាមដងទន្លេមេគង្គ និងបណ្តាប្រទេសជាដៃគូផងដែរ។ ព្រឹត្តិការណ៍បុណ្យទន្លេ គឺជាឱកាសមួយដ៏សំខាន់មួយសម្រាប់កម្ពុជា ក្នុងការការផ្សព្វផ្សាយសក្តានុពលទេសចរណ៍ខេត្តសៀមរាប និងបណ្តាខេត្តនានា តាមដងទន្លេនៃព្រះរាជាណាចក្រកម្ពុជា ពីព្រោះថាបុណ្យទន្លេនេះ មានការចូលរួមពីមន្រ្តីការទូត និងបវរកញ្ញាពិភពលោកអញ្ជើញមកចូលរួម និងភ្ញៀវទេសចរមកកម្សាន្តជាច្រើន។
ព័ត៌មានជាតិ ថ្មីៗ
ឯកឧត្តមរដ្ឋមន្ត្រី ក៏បានបញ្ជាក់ទៀតថា សម្រាប់ឆ្នាំទស្សនាសៀមរាប ២០២៤ នឹងមានព្រឹត្តិការណ៍ជាបន្តបន្ទាប់ទៀត ដើម្បីជួយគាំទ្រដល់សកម្មភាពសេដ្ឋកិច្ចរបស់ខេត្តសៀមរាប។ ជាមួយនោះរាជរដ្ឋាភិបាល ក៏ដូចជាក្រសួងទេសចរណ៍ បានលើកទឹកចិត្តជំរុញឲ្យមានសកម្មភាពជាច្រើនពាក់ព័ន្ធនឹងវប្បធម៌ ការតភ្ជាប់ទីផ្សារ ដែលនេះជាសកម្មភាពជួយទ្រទ្រង់បន្ថែមនូវអ្វីដែលជាសកម្មភាពសេដ្ឋកិច្ចក្នុងខេត្តសៀមរាប។ កាលពីខែមករា កន្លងទៅនេះ យើងបានបើកជាផ្លូវការឆ្នាំផ្លាស់ប្តូរប្រជាជន និងប្រជាជន កម្ពុជា-ចិន ដោយមានការចូលរួមពីថ្នាក់ដឹកនាំស្ថាប័នវប្បធម៌ចិនកំពូលៗ ដូចនេះយើងចង់បង្ហាញថា យើងយកចិត្តទុកដាក់ខ្ពស់ ហើយសកម្មភាពនឹងមានជាបន្តបន្ទាប់ ប្លែកៗ វប្បធម៌ ទេសចរណ៍ ហើយយើងសង្ឃឹមថា ជាឆ្លើយតបទៅនឹងសកម្មភាពកំណត់នៅពេលខាងមុខដែលមានការតភ្ជាប់ជើងហោះហើរសំខាន់ៗបន្ថែមទៀត ទាំងទីផ្សារនៅស្រុកចិន និងនៅស្រុកឥណ្ឌា។
សូមជម្រាបថា នៅក្នុងសកម្មភាពជួយស្តារសេដ្ឋកិច្ចរបស់ខេត្តសៀមរាប ដែលរងផលប៉ះពាល់ធ្ងន់ធ្ងរដោយសារវិបត្តិជំងឺកូវីដ១៩នោះ រាជរដ្ឋាភិបាលកម្ពុជា ជាពិសេសក្រសួងទេសចរណ៍ បានខិតខំដាក់ចេញនូវយុទ្ធសាស្ត្រនានា ក្នុងនោះការកំណត់យកឆ្នាំ២០២៤ ជាឆ្នាំទស្សនាសៀមរាប ដោយបង្កើតនូវព្រឹត្តិការណ៍នានានៅក្នុងខេត្តមួយនេះ៕
អត្ថបទ៖ លោក ជា ស្រស់
កែសម្រួល៖ លោក អ៊ុន ណារាជ្យ
